‘भ्रमण वर्ष’ स्थगित गरौँ

A+ A A-

सुरुमा चीनमा देखिएको कोरोना भाइरस (कोभिड १९) ६५ देशमा फैलिइसकेको छ । विश्व स्वास्थ्य संगठनले जारी गरेको पछिल्लो विवरणअनुसार संसारभर भाइरसका कारण ८६ हजार ९ सय ८३ जनामा यो भाइरसको संक्रमण देखिएको छ । चीनमा मात्रै संक्रमितको संख्या ७८ हजार ८ सय २४ पुगेको छ । विश्वमा यसले २ हजार ९ सय ७८ जनाको ज्यान लिएको छ । मृत्यु हुनेमध्ये चीनका मात्रै २ हजार ७ सय ६१ जना छन् ।

कोरोनालाई अहिलेसम्म वैश्विक खतरा अर्थात् ‘प्यानडेमिक’ (महामारी) घोषित गरिएको छैन । तर, यसको फैलावट र असर यति तीव्र छ कि चाँडै यसले संसारमा महामारीको रूप लिन सक्ने देखिएको छ ।

हाम्रो दुर्भाग्य, भ्रमण वर्ष मनाउन सुरु गरेकै वर्ष कोरोना भाइरसको प्रकोप संसारभर फैलिएको छ । विदेशी पर्यटक बोलाउन सरकारले गरेका अथक प्रयासमा यसले ठूलो धक्का पुर्‍याएको छ ।

भारतपछि नेपाली पर्यटन क्षेत्रका लागि चीन विश्वकै दोस्रो ठूलो स्रोत बजार हो । सन् २०१८ मा १ लाख ५३ हजार ६ सय २ चिनियाँ पर्यटकले नेपाल भ्रमण गरेका थिए । यस पटक अझै बढी चिनियाँ नेपाल भित्र्याउन तथा अन्य मुलुकका पर्यटकलाई पनि आकर्षित गर्न सरकारले व्यापक प्रचार–प्रसार गरेको थियो । तर, चीनबाटै कोरोना फैलियो ।

भाइरसबाट जोगिन र रोकथामका लागि आमचिनियाँले निर्धारित यात्रा रद्द गरेर घरभित्रै बस्ने निर्णय गरेका छन्, अहिलेको सन्दर्भमा यो उनीहरूसँगै हाम्रा लागि पनि हितकर पक्ष हो ।

अमेरिका, अस्ट्रेलिया र साउदी अरेबियाले पछिल्ला ३ साता चीन भ्रमण गरेका विदेशी नागरिकलाई आफ्नो देश प्रवेशमा रोक लगाएका छन् । रुस, जापान, पाकिस्तान र इटलीले यसअघि नै यस्तै यात्रा प्रतिबन्ध लगाइसकेका छन् ।

कोरोना भाइरसको संक्रमण फैलिनबाट रोक्नका लागि जापानले देशभरका सबै प्राथमिक, निम्न माध्यमिक र माध्यमिक विद्यालय २ मार्चदेखि केही समयका लागि अर्थात् हिउँदे बिदासम्मका लागि बन्द गरेको छ ।

होकाइदो शहरमा गत बिहीबार ८० वर्ष पार गरेका वृद्धलाई कोरोना भाइरस संक्रमण पुष्टि भएपछि त्यहाँका सार्वजनिक, प्राथमिक तथा निम्न माध्यमिक विद्यालय यसअघि नै बन्द भइसकेका छन् । ठूला कन्सर्टदेखि जमघटमा समेत प्रतिबन्ध लगाइएकाे छ ।

हामीकहाँ हवाईसँगै स्थलमार्गबाट पनि पर्यटक आउने गरेका छन् । खुला सिमानाका कारण हामी झन् ठूलो जोखिममा छौँ । भारतबाट नेपाल घुम्न आउने कतिपय पर्यटक स्थलमार्गबाट नेपाल छिर्छन् ।

खुला सिमानाका कारण सीमा नाकाका सबै स्थानमा क्वारेन्टाइन नहुँदा भाइरस परीक्षण गर्न सम्भव छैन । जसका कारण जुनसुकै बेला नेपालमा यसको संक्रमण फैलने खतरा बढेको छ ।

सरकारले भ्रमण वर्ष सफल पार्ने उद्देश्यले गरेका पहल अपवादबाहेक प्रशंसायोग्य नै छ । तर, कोरोनाका कारण अब भ्रमण वर्ष मनाउन रोक्नुपर्ने स्थिति आएको छ । सरकारले विभिन्न देशमा पुगेर गरिरहेको प्रचारप्रसार कार्यक्रम स्थगित गर्ने निर्णय गरेको छ । यो स्वागतयोग्य कुरा हो र, अब यात्रा प्रतिबन्धमा पनि विल्कुल ढिला गर्न हुँदैन ।

दक्षिणसँगै मध्य एसियामा कोरोना छिरिसकेको छ । अहिलेकै गतिमा फैलियो भने नेपालमा चाँडै कोरोनाको प्रकोप फैलिन सक्ने खतरा छ ।

त्यसैले प्रचार–प्रसारको कार्यक्रम मात्रै होइन, कोरोना भाइरस देखिएको मुलुकका पर्यटकलाई नेपाल यात्रामा रोक लगाउने बेला आएको छ । अर्थात्, भ्रमण वर्षलाई यो वर्षका लागि स्थगित गर्नु उचित हुन्छ ।

यो वर्ष २० लाख पर्यटक भित्र्याउन नसकेर केही हुँदैन, स्थिति साम्य भए अर्को वर्ष फेरि प्रयास गरौँला । तर, एउटा ठूलो खतराअगाडि खेलाँची गरेर नाच्नु हाम्रा लागि प्रत्युत्पादक हुन सक्छ ।

यति मात्रै होइन, सरकारले अब आफ्नो ध्यान कोरोनाको प्रकोप नेपालमा पनि देखिए कसरी सामना गर्ने भन्नेमा केन्द्रित गर्नुपर्छ । भएका स्रोतलाई एक ठाउँमा ल्याएर तयार अवस्थामा रहनुपर्छ । अस्पतालहरूको क्षमता बढाउनुपर्छ । सचेतनामूलक कार्यक्रम सञ्चालन गर्नुपर्छ । भाइरस संक्रमण भएको पत्ता लगाउने संयन्त्रको विकास गर्न ढिला गर्न हुँदैन ।

प्रकाशित मिति: आइतबार, फागुन १८, २०७६ १२:५५