एसिया इस्टर्न रिजन टी–२०ः नेपालको लगातार दोस्रो हार

A+ A A-

एशिया इस्टर्न रीजन टी २० क्रिकेट प्रतियोगितामा नेपालले लगातार दोस्रो हार भोगेको छ । आइतबार भएको खेलमा नेपाल हङकङसँग ४३ रनले पराजित भएको हो ।

हङकङले दिएको १५५ रनको चुनौती पछ्याएको नेपाल १११ रनमा अलआउट भयो । हङकङविरुद्धको खेलमा नेपालको ब्याटिङ लाइन निकै कमजोर देखिएको थियो ।

एक पछि अर्को गर्दै ब्याट्सम्यानहरु आउट भएपछि नेपाल १८.१ ओभरमा १११ रनमा समेटियो । शनिबार भएको पहिलो खेलमा नेपाल मलेसियासँग २२ रनले पराजित भएको थियो। यो सँगै नेपालको प्रतियोगितामा अगाडि वढ्ने सम्भावना निकै न्यून बनेको छ।

एसिया कपको छनोटको रुपमा रहेको जारी प्रतियोगितामा शीर्ष दुई टोली मात्र छनोट हुनेछ।

युवा खेलाडी कुशल मल्ललाई प्रारम्भिक ब्याट्सम्यानको जिम्मा दिइएको खेलमा नेपालको मध्यक्रम असफल साबित भयो ।

कुशल १९ रन बनाएर आउट भएपछि आएका ब्याट्सम्यानहरु एकपछि अर्को गर्दै आउट हुन पुगे । पारस खड्का ४, दीपेन्द्र सिंह ऐरी ५, विनोद भण्डारी ५, पवन सर्राफ १ रनमा आउट भए ।

कप्तान ज्ञानेन्द्र मल्लले ४ चौका र १ छक्कासहित ४६ रन बनाएपनि टिमको हार टार्न सकेनन् । आरिफ शेखले १० रन जोडे भने करण केसीले ७ रन बनाए । त्यसपछि आएका सन्दिप लामिछानेले खाता खोल्न सकेनन् । अन्तिम ब्याट्सम्यान अविनाश बोहराले १२ रन बनाए ।

थाईल्यान्डको टेर्डथाइ किक्रेट मैदान भएको आफ्नो दोस्रो खेलमा नेपालले हङ्‍कङसँग १५५ रनको चुनौती पाएको थियो ।
नेपालका लागि स्पीनर सन्दीप लामिछाने र युवा बलर सुशन भारीले दुई–दुई र कुशल मल्लले एक विकेट लिएका थिए।

यो प्रतियोगितामा थाइल्यान्ड, मलेसिया, सिङ्गापुर र हङ्‍कङ समावेश छन् । सबै सहभागी राष्ट्रले एकअर्का विरुद्ध खेलेपछि शीर्ष दुई स्थानमा रहने टोलीले अगस्टमा कुवेत र यूएईसँग खेल्नेछ।

मलेशियामा हुने सो प्रतियोगिताबाट सेप्टेम्बरमा पाकिस्तानमा हुने टी२० एशिया कप खेल्ने देश छनौट हुनेछ।

एशिया कपमा भारत, श्रीलङ्का, बाङ्ग्लादेश र अफगानिस्तान पनि सहभागी हुनेछन्।

प्रकाशित मिति: आइतबार, फागुन १८, २०७६ ११:३१