सिंगटी–लामो साँघु प्रसारण लाइन निर्माणमा स्थानीयको अवरोध

A+ A A-

सिंगटी–लामोसाँघु १३२ केभी प्रसारण लाइन आयोजना निर्माणमा स्थानीय बासिन्दाले अवरोध गरेका छन् । आयोजनाको रुट सार्न माग गर्दै दोलखाको भीमेश्वर नगरपालिकाको वडा ८ को बोझ र ९ को झिंगानेमा भइरहेको अवरोधका कारण आयोजनाले ५ वटा टावरको निर्माण गर्न नसकेकाे नेपाल विद्युत प्राधिकरणले जनाएको छ ।

तिलोत्तमा हिमाली फुड प्रोडक्सन एण्ड रिसर्ज सेन्टरले आफ्नो जग्गाबाट प्रसारण लाइन लैजाँदा व्यवसाय प्रभावित हुने भन्दै बोझमा एउटा टावर खडा गर्न दिएको छैन । प्रसारण लाइनको रुट सार्नुपर्ने र त्यसो गर्न नसकिएमा मुआब्जा तथा क्षतिपूर्ति रकम बढाउन माग गर्दै स्थानीयले झिंगानेमा ४ वटा टावर निर्माण गर्न दिएका छैनन् । स्थानीय सन्तोष तामाङले आफ्नो जग्गामा टावर निर्माण गर्न नदिएपछि निर्माण प्रभावित भएको हो । अन्य प्रभावितले पहिले तामाङको जग्गामा निर्माण गरेपछि मात्रै आफ्नो जग्गामा निर्माण गर्न दिने अडान राखेका छन् ।

दोलखाका सिंगटी खोला र तामाकोसी नदी बेसिनमा निजीक्षेत्रका निर्माणाधीन र निर्माण हुने जलविद्युत आयोजको विद्युत् प्रणालीमा प्रवाह गर्न सिंगटी–लामो साँघु प्रसारण लाइनको निर्माण भइरहेको हो ।

दोलखाका प्रमुख जिल्ला अधिकारी भीमकान्त शर्माले विकास निर्माणमा स्थानी रूपमा भइरहेका अवरोध हटाउनका लागि गृह मन्त्रालयले स्पष्टसँग निर्देशन दिएको बताए । ‘अवरोध गर्नेसँग आवश्यक छलफल गर्छौं, त्यसबाट सहमतिमा पुग्न सकिएन भने यस्तो राष्ट्रिय महत्त्वको प्रसारण लाइनको निर्माण सम्पन्न गर्न प्रशासन कानुनमा भएको व्यवस्थाअनुसार अगाडि बढ्छ,’ उनले भने ।नेपाल विद्युत प्राधिकरणका कार्यकारी निर्देशक कुलमान घिसिङले आयोजना निर्माणमा भइरहेको अवरोध हटाउन आवश्यक सहयोग र समन्वय गरिदिन जिल्ला प्रशासन कार्यालयलाई आग्रह गरेका छन् । ‘यही लाइनमा लोडिने २५ मेगावाटको सिंगटी खोला र अन्य केही आयोजनाको निर्माण अन्तिम चरणमा पुगेको छ, तत्काल लाइन बनाउन सकेनौँ भने पेनाल्टीबापत ठूलो रकम तिर्नुपर्नेछ, यस्तो महत्त्वपूर्ण र संवेदनशील आयोजनाको निर्माण जतिसक्दो छिट्टो सम्पन्न गर्न सहजीकरण गरिदिनुपर्‍याे,’ घिसिङले भने ।

प्रसारण लाइनको निर्माण आर्थिक वर्ष २०६५/६६मा सुरु गरिएको थियो । निर्माणको जिम्मा पाएको भारतीय कम्पनी अरावली इन्फ्रा पावरले आर्थिक संकट देखाउँदै काममा ढिलाइ गरेको थियो । ४० किलोमिटर प्रसारण लाइनमा पर्ने १२४ टावरमध्ये ११७ वटाको जग हालिएको छ । १०७ वटा टावर खडा गरिएको छ । ३२ किलोमिटर सिंगल सर्किट तार टाँगिएको छ । प्रसारण लाइनको निर्माण आगामी वैशाखभित्रमा सक्ने लक्ष्य राखिएको छ ।