१७ भन्सार नाकाबाट निर्यात न्यून

A+ A A-

मुलुकको अन्तर्राष्ट्रिय व्यापारका लागि भनेर स्थापना गरिएका कूल २४ भन्सारमध्ये १७ वटा भन्सार नाकाबाट निर्यात असाध्यै न्यून रहेको छ ।

भन्सार विभागले हालै सार्वजनिक गरेको चालू आर्थिक वर्षको सात महिनाको विवरणअनुसार ती भन्सार कार्यालयबाट निर्यात असाध्यै न्यून देखिएको हो ।

त्यसमा ८ भन्सार कार्यालयको निर्यात शून्य प्रतिशत रहेको उल्लेख गरिएको छ । विभागका अनुसार भद्रपुर जलेश्वर, जनकपुर, महेशपुर (नवलपरासी), सर्लाही, सती (कैलाली), सिरहा, सुनसरी, सुथौली (कपिलवस्तु), तातोपानी, ठाँडी (सिरहा) भन्सारलगायतका भन्सार कार्यालयबाट सो अवधिमा निर्यात प्रतिशत शून्य रहेको पाइएको छ ।

विभागको विवरणअनुसार नेपाल र भारतबीचको प्रमुख भन्सार नाका वीरगञ्जबाटै निर्यातसमेत बढी भएको देखिएको छ ।

भन्सारबाट कूल ३१.४१ प्रतिशत निर्यात भएको छ । सो भन्सारबाट चालू आवको सात महिनामा २० अर्ब ४० करोड ५५ लाख १३ हजार रुपैयाँ बराबरको निर्यात भएको छ ।

यस्तै, भैरहवा भन्सारको हिस्सा दोस्रोमा छ । सो भन्सारबाट कूल २८.४५ प्रतिशत निर्यात भएको छ । विभागका अनुसार सो भन्सारबाट १८ अर्ब ४८ करोड ४१ लाख ११ हजार रुपैयाँ बराबरको निर्यात भएको छ ।

त्यस्तै, तेस्रोमा त्रिभुवन अन्तर्राष्ट्रिय विमानस्थल भन्सार कार्यालय छ । सो भन्सारबाट १४ अर्ब ९ करोड ६० लाख ९३ हजार बराबरको निर्यात भएको छ ।

प्रतिशतका आधारमा सो भन्सारबाट २१.७० प्रतिशत निर्यात भएको छ । चालू आवको सात महिनामा कूल ८ खर्ब ३ अर्ब ६० करोड २८ लाख १३ हजार रुपैयाँ बराबरको सामान आयात भएकामा ६४ अर्ब ९७ करोड १२ लाख २७ हजार बराबरको निर्यात भएको छ ।

विभागको विवरणअनुसार सामान आयात गर्नेमा पनि वीरगञ्ज भन्सार नै शीर्ष स्थानमा रहेको छ । सो भन्सारबाट २ खर्ब ७५ अर्ब ६९ करोड २६ लाख ९९ हजार रुपैयाँ बराबरको माल सामान आयात भएको छ । प्रतिशतका आधारमा सो भन्सारको हिस्सा ३४.३१ प्रतिशत रहेको छ ।

यस्तै, दोस्रोमा भैरहवा भन्सार कार्यालय रहेको छ । सो भन्सार कार्यालयबाट मात्रै १ खर्ब ३७ अर्ब ३० करोड ४१ लाख १८ हजार बराबरको सामान आयात भएको छ । त्यो भनेको कूल आयातको १७.०९ प्रतिशत हो ।

यस्तै, वीरगञ्ज सुक्खा बन्दरगाहबाट १ खर्ब १ अर्ब ३५ करोड ९५ लाख ९६ हजार रुपैयाँ बराबरको मालवस्तु आयात भएको छ । विराटनगर भन्सारबाट ८४ अर्ब ७६ करोड ६६ लाख ८९ हजार रुपैयाँ बराबरको आयात भएको छ ।

त्रिभुवन अन्तर्राष्ट्रिय विमानस्थल भन्सार कार्यालयबाट ८१ अर्ब ५० करोड ६८ लाख ५३ हजार रुपैयाँ बराबरको माल वस्तु आयात भएको छ । प्रतिशतका आधारमा कूल आयातमध्ये १०.१४ प्रतिशत हिस्सा सो भन्सार कार्यालयले राखेको छ ।

विभागका अनुसार रसुवा भन्सारबाट २६ अर्ब २३ करोड ३६ लाख ८७ हजार, नेपालगञ्ज भन्सारबाट ३० अर्ब ४० करोड २६ लाख ७६ हजार, कृष्णनगर भन्सारबाट १२ अर्ब २६ करोड २४ लाख छ हजार, कैलाली भन्सारबाट १० अर्ब ९७ करोड ५७ लाख २९ हजार रुपैयाँ बराबरको मालवस्तु आयात भएको छ ।

चालु आवको ७ महिनाको अवधिमा मुलुकको कूल व्यापार घाटा भने ७ खर्ब ३८ अर्ब ६३ करोड १५ लाख ८६ हजार रहेको छ । रासस

प्रकाशित मिति: शुक्रबार, फागुन १६, २०७६ १५:५६