ओली–प्रचण्ड ५ घण्टा एउटै मञ्चमा, एक शब्द बोलेनन्

A+ A A-

बिहीबार काठमाडौंको यलम्बर पार्टी प्यालेस रामशाहपथमा सत्तारुढ दल नेपाल कम्युनिस्ट पार्टी(नेकपा)को बागमती प्रदेशका अगुवा कार्यकर्ता प्रशिक्षण कार्यक्रम थियो ।

कार्यक्रममा बागमती प्रदेशका केन्द्रीय स्तरका नेताहरू मञ्चमा बसेका थिए । नेतृत्वमा अध्यक्षद्वय, माधवकुमार नेपाल र ईश्वर पोखरेल थिए । अगाडिको पङ्क्तिमा बीचमा बसेका थिए, ओली र प्रचण्ड ।

ओलीको छेउतर्फ थिए माधवकुमार नेपाल र प्रचण्डको छेउमा थिए सचिवालय सदस्य ईश्वर पोखरेल ।

सधैँ कुर्सी टँसाएर राखेका हुन्थे ओली–प्रचण्डलाई । आज भने अलिक टाढा राखिएका थिए दुवैका कुर्सी ।

प्रशिक्षण ५ घण्टा चल्यो । सबैभन्दा पहिला पोखरेल बोले । उनले पार्टीको विधि विधानका बारेमा करिब पौने घण्टा बोले । उनले एकताको बुझाइमा एकरूपता हुनुपर्ने बताए । उनी बोलिरहँदा ओली र प्रचण्ड भने एक पटक पनि आमुन्ने सामुन्ने भएनन् । एकआपसमा दुई अध्यक्षबीच एक शब्द पनि बोलचाल भएन ।

सधैँ एकआपसमा हाँस्ने अध्यक्षद्वयले आज भने एकअर्काको मुख पनि हेरेनन् । अझ केपी ओली त कार्यक्रम सकियुन्जेल एकछिन पनि हाँसेनन् । प्रचण्ड भने बीचबीचमा हाँस्दै यताउति हेरिरहेका थिए । ओली भने सिधा हेरेर धुमधुम्ती बसिरहे ।

माधवकुमार नेपाल बोल्दा सबैलाई हँसाए तर पनि ओलीको मुहारमा हाँसोको धर्सा पनि देखिएन । प्रचण्ड भने खित्का छाडेर हाँसेका थिए ।

नेपालले पनि प्रमुख नेतृत्वको आलोचना गरेका थिए । पार्टी विधि र विधानमा चल्नुपर्ने हो तर नचलेको बताए । उनले पार्टीलाई आफूले फुट्न नदिने बताउँदा कार्यकर्ताहरूले ताली बजाएर हल्ला गरेका थिए ।

ओली र माधवकुमार नेपाल नजिकै बसेका थिए । यी २ नेताहरूले पनि एक पटक मात्र एकआपसमा कुरा गरेका थिए । नत्र मञ्चको पहिलो लहरमा सन्नाटा छाएजस्तो देखिएको थियो । ओली नेपालसँग पनि खासै बोलेनन् । एक पटक पनि नेपालले नै टाउको ओली नजिक ल्याएर कुरा गरेका थिए ।

उता, अर्का अध्यक्ष प्रचण्ड र पोखरेलले भने धेरै कुराकानी गरेका थिए । नेपाल बोल्दा २ नेताहरूले एकआपसमा कुराकानी गरेका देखिन्थ्यो । तर, ओली र प्रचण्डले भने एकआपसमा कुराकानी नै नगरीकन ५ घण्टा एउटै मञ्चमा बिताए ।

धेरै पटक प्रचण्डले ओलीको र आफ्नो प्रसंग जोडेर बोलेका थिए । तर, अर्का अध्यक्ष ओलीले भने औपचारिक सम्बोधनबाहेक प्रचण्डको नाम उच्चारण पनि गरेनन् ।

ओलीले सरकारको प्रशंसा गरे । पूर्वमन्त्री गोकुल बाँस्कोटाको बचाउ गरे । आफ्ना नेता, कार्यकर्ताको आलोचना गरे– आफ्ना नेताको चरित्र हत्या हुँदा पनि क्या बात भन्दै ताली बजाउँछन् भन्दै ।

प्रतिपक्षले भ्रष्टाचार प्रमाणित भएर जेल गएका आफ्ना नेताको बचाउमा संसद अवरोध गर्ने गरेको तर आफ्नाले भने अरूले लगाएको आरोपमा पनि क्या बात भन्दै ताली बजाएकामा उनको गुनासो थियो ।

प्रचण्डले एकता एकै पटक नभएको बताए । उनले पहिलो संविधानसभाको निर्वाचन हुनुभन्दा पहिला ७ पटक एकता गर्ने प्रयास भएको बताए ।

उनले पहिलो संविधानसभाको निर्वाचनभन्दा पहिला ५०–५० भन्दा पनि तत्कालीन एमालेले नमानेको बताए । उनले भने, ‘म ४५ मा आउँदा पनि एमालेले मानेन । ३० मा आउन मैले मानिनँ र एकता भएन ।’

प्रकाशित मिति: बिहीबार, फागुन १५, २०७६ १८:४८