विमानस्थलबाट ५८ विद्यार्थी फर्काइएकोमा इक्यानको आपत्ति

A+ A A-

नेपाल शैक्षिक परामर्श संघ (इक्यान) ले उच्चशिक्षा अध्ययन गर्न साइप्रस जाने क्रममा त्रिभुवन अन्तर्राष्ट्रिय विमानस्थलको अध्यागमनबाट ५८ जना विद्यार्थी फर्काइएकोमा आपत्ति जनाएको छ।

शिक्षा मन्त्रालयले जारी गरेको ‘नो अब्जेक्सन सर्टिफिकेट’ (एनओसी) आशयपत्र गलत भएको आशंकामा विभागले विद्यार्थी फर्काएको थियो। इक्यानले विद्यार्थी फिर्ता भएको घटनालाई गम्भीर भएको जनाउँदै सरकारले ती विद्यार्थीलाई क्षतिपूर्ति दिन माग गरेको छ।

शिक्षा मन्त्रालय र अध्यागमन विभागबीच आवश्यक समन्वय अभावको कारण विद्यार्थीहरू मर्कामा परेको आरोप लगाउँदै इक्यानका अध्यक्ष प्रकाश पाण्डेले त्यस विषय तत्काल छानबिन गर्न माग गरेका छन् ।

‘सरकारी निकायको समन्वयात्मक व्यवस्थापन कमजोरीका कारण यात्रा गर्न नपाई मर्कामा परेका विद्यार्थीलाई पर्न गएको आर्थिक तथा मानसिक क्षतिपूर्ति दिन हामीले शिक्षा, विज्ञान तथा प्रविधि मन्त्रालय र अध्यागमन विभागलाई अनुरोध गरेका छौं’–इक्यानका अध्यक्ष पाण्डेले भने ।

गएको ८ गते बिहान २ बजे बोर्डिङ पास लिएर विमानतर्फ जाने क्रममा अध्यागमन विभागका कर्मचारीले ती विद्यार्थीको एनओसी नक्कली भएको आशंकामा विमानस्थलबाटै फिर्ता गरेको थियो।

घटनाको बारेमा जानकारी पाउनासाथ बुधबार शिक्षा मन्त्रालय र विभागका अधिकारीसँग भेट गरी क्षतिपूर्ति मागेका थियौं –पाण्डेले भने । उनले सो घटनाले गर्दा सरकारप्रति नै विश्वास गुमेको आरोप लगाए ।

यो विषयमा शिक्षा मन्त्रालयसमक्ष बारम्बार आग्रह गर्दा पनि कतैबाट सुनुवाइ नहुँदा निर्दोष विद्यार्थीले समस्या भोग्नुपरेको उहाको भनाइ छ। ‘यसले गर्दा केही दलाल तथा बिचौलियाले फाइदा उठाउँदै नक्कली कागजात बनाएर सोझासाझा विद्यार्थीलाई फसाएको प्रस्ट हुन्छ’ –अध्यक्ष पाण्डेले भने ।

तर, विभागका अधिकारीसँग भेट गर्ने क्रममा ५८ मध्ये ४ जनाको नक्कली एनओसी भेटिएको बताएको अध्यक्ष पाण्डेले जानकारी दिए । नेपाल समाचारपत्र

प्रकाशित मिति: बिहीबार, फागुन १५, २०७६ ०७:०४