राष्ट्रपतिद्वारा धनगढीमा विश्व नेपाली साहित्य महोत्सवको उद्घाटन

A+ A A-

धनगढीमा बुधबारदेखि विश्व नेपाली साहित्य महोत्सव सुरु भएको छ । सुदूरपश्चिमाञ्चल साहित्य समाजको आयोजनामा सुरु भएको उक्त महोत्सवको राष्ट्रपति विद्यादेवी भण्डारीले उद्घाटन गरेकी हुन् ।

राष्ट्रपति भण्डारीले नेपाली भाषा, साहित्य र लोक परम्पराको जगेर्नाका लागि सबै एकजुट हुनुपर्ने बताइन् । उनले कला, भाषा र लोक परम्पराको जगेर्नाका लागि राज्यले विशेष कदम चाल्नुपर्ने औँल्याइन् ।

उनले भाषा साहित्यमा सुदूरपश्चिम प्रदेश धनी रहेको बताउँदै यहाँका भाषा, संस्कृति र साहित्यको जगेर्ना गर्नुपर्ने बताइन् । प्राकृतिक सम्पदाले भरिपूर्ण सुदूरपश्चिम प्रदेशबाटै सुखी नेपाली र समृद्ध नेपाल बन्न टेवा पुग्ने उनको धारणा थियो ।

राष्ट्रपति भण्डारीले नेपाली भाषा र संस्कृतिको संरक्षणका लागि शैक्षिक क्षेत्रले टेवा पु¥याउने भएकाले सुदूरपश्चिमाञ्चल विश्वविद्यालयलगायतका शैक्षिक क्षेत्रको स्तरोन्नति गरिनुपर्ने बताइन् ।

२० फागुनसम्म सञ्चालन हुने महोत्सवमा साहित्य, राजनीति, समसामयिकलगायत विभिन्न विषयहरूमा छलफल हुने आयोजक सुदूरपश्चिमाञ्चल साहित्य समाजका अध्यक्ष रामलाल जोशीले बताए ।

महोत्सवमा पूर्वप्रधानमन्त्रीद्वय डा. बाबुराम भट्टराई र लोकेन्द्रबहादुर चन्द, उद्योगमन्त्री लेखराज भट्ट, सुदूरपश्चिम प्रदेशका मुख्यमन्त्री त्रिलोचन भट्ट, सांसद भीम रावल, गगन थापा, नारदमुनि राना, प्रेम आलेलगायत नेताले राजनीति तथा विकासका विषयमा वक्तव्य प्रस्तुत गर्नेछन् ।

साथै, महोत्सवमा सिक्किमका पूर्वमुख्यमन्त्री चाम्लिङ, प्राडा वासुदेव त्रिपाठी, डा विष्णुविभु घिमिरे, मनु मञ्जिलको समेत सहभागिता रहने बताइएको छ ।

प्रकाशित मिति: बुधबार, फागुन १४, २०७६ २०:०१