नझुक्किनुहोस्, यो ‘बोर्डिङ स्कुल’ हो

A+ A A-

मोरङको धनपालथान गाँउपालिकामा रहेको एक निजी विद्यालयमा विद्यार्थीहरु जोखिमपूर्ण अवस्थामा अध्ययन गर्न बाध्य छन् ।

अनुमित बिना सञ्चालनमा रहेको सो विद्यालयमा अध्ययनरत विद्यार्थीहरु जीर्ण टहरोमा ज्यान जोखिममा राखेर अध्ययन गर्न बाध्य छन् ।

कुनै विद्यालयको भौतिक संरचना कुन हदसम्म जीर्ण र लथालिङ्ग हुनसक्छ उदाहरण हेर्नुपरे धनपालथान गाँउपालिका गए हुन्छ । यो गाँउपालिकाको वडानम्बर ४ मा संचालित द न्यु ब्राईट फ्युचर इंग्लिस बोर्डिङ स्कुल लथालिंग अवस्थामा सञ्चालन भइरहेको छ ।

कुखुरा पाल्ने खोरभन्दा पनि जीर्ण अवस्थामा रहेको यो विद्यालयमा एकसय ७५ जना विद्यार्थी अध्ययनरत छन् ।

नर्सरी देखि कक्षा ६ सम्म अध्यापन हुने यो विद्यालयले प्रतिमहिना विद्यार्थीबाट चारसय देखि १५ सय रुपैयाँसम्म शुल्क असुल्ने गर्छ । तर विद्यालयको भौतिक संरचना भने गाईभैंसी बाँध्ने गोठभन्दा पनि जीर्ण छ ।

अभिभावकले विद्यार्थीको पढाईको स्तरको मूल्यांकन गर्ने भएकाले विद्यालयको भौतिक संरचनाले खासै महत्व नराख्ने लगानीकर्तासमेत रहेका विद्यालयका सहायक प्रिन्सिपल प्रकाश मण्डल दाबी गर्छन् ।

‘ठूल्ठूला भवनले मात्र अर्थ राख्दैन । मुख्यकुरा विद्यार्थीका लागि शैक्षिक गुणस्तरको कुरा हुनुपर्छ,’ उनले भने, ‘हाम्रो पढाई राम्रो अभिभावकले नै महसुस गर्नुभएको छ ।’

बाँसको कर्ची, भाटा र परालको प्रयोगगरी बनाइएको यो विद्यालयको छानोमा भने बाँसले नै कर्कटपाता च्यापिएको छ । हावाहुरीको यो मौसममा जुनसुकै बेला ढल्ने अवस्थामा रहेको विद्यालयको नर्सरी कक्षाको दृष्य अझ कहाली लाग्दो छ ।

अझ यो मौसममा विद्यालयको जीर्ण टहरोबाट जुनसुकै बेला पनि दुर्घटना हुनसक्ने अवस्थाका विषयमा प्रश्नगर्दा प्रिन्सिपल राकेश माझी तर्किए ।

दुई कट्ठा जग्गा भाडामा लिएर संचालनमा ल्याइएको विद्यालय परिसरमा खानेपानीको पनि व्यवस्था छैन । यता गाउँपालिकाकी शिक्षा अधिकृत सीता भट्टराईले भने सो विद्यालयका विषयमा शिक्षा समितिको बैठक आवश्यक निर्णय लिइने बताइन् ।

‘यस विषयमा हामी चाँडै शिक्षा समितको बैठक बसेर निर्णय लिन्छौँ । स्कुलको स्थलगत अनुगमन पनि गर्छौँ,’ उनले भनिन, ‘गलत र मापदण्ड विपरीत सञ्चालन भएको खण्डमा आवश्यक कारबाही समेत गर्छौं ।’

प्रकाशित मिति: बुधबार, फागुन १४, २०७६ १०:३४