आयोजक सुदूरपश्चिम– ११ पुग्याे सेमिफाइनलमा

A+ A A-

नेपाल आइस सुदूरपश्चिम अन्तर्राष्ट्रिय आमन्त्रण चौथो सुदूरपश्चिम खप्तड गोल्डकपअन्तर्गत मंगलबारदेखि क्वार्टरफाइनलका खेलहरू सुरू भएका छन् । धनगढी रंगशालामा मंगलबार भएको पहिलो क्वार्टरफाइनल खेलमा आयोजक सुदूरपश्चिम–११ स्पोर्ट्स क्लब विजयी हुँदै सेमिफाइनलको बाटो तय गरेको छ ।

पहिलो चरणमा वाई पाएर क्वार्टरफाइनल पुगेको सुदूरपश्चिम–११ भारतको कञ्चनजंघा फुटबल क्लबलाई ४–२ ले हराउँदै अन्तिम चारमा पुगेको हो । सुदूरपश्चिमको जितमा विक्रम सिंह ठकुरीले २ गोल गरे भने फिलिप तामाङ र दिपेश श्रेष्ठले १/१ गोल गरे । कञ्चनजंघाका अभिषेक दर्जी र छिरिङ तामाङले १/१ गोल फर्काए ।

खेलको १०औँ मिनेटमा विक्रमको गोलबाट घरेलु टिमले अग्रता बनायो । उद्धव खत्रीको पासमा विक्रमले डिबक्सभित्रबाट दोस्रो बारमा उत्कृष्ट गोल गरे । १९औँ मिनेटमा फिलिपले गोल गर्दै आयोजकको अग्रता २–० को बनाए ।

कञ्चनजंघाका गोलरक्षक निगम सिंह अगाडि बढेको अवस्थामा फिलिपले सहजै खाली पोष्टमा गोल गरे । खेलको २३औँ मिनेटमा विक्रमले व्यक्तिगत दोस्रो गोल गर्दा आयोजक सुदूरपश्चिम–११ ३–० ले अघि रह्यो । उनले पुन उद्धवको पासलाई सदुपयोग गरे । २८औँ मिनेटमा अभिषेकको पेनाल्टी गोलबाट कञ्चनजंघाले अग्रता ३–१ मा झार्‍यो ।

सुदूरपश्चिमका धनबहादुर थापाले डिबक्सभित्र अमीर लामालाई खराब ट्याकल गरेपछि पाएको पेनाल्टीलाई अभिषेकले गोलमा परिणत गरे । खेलको ३९औँ मिनेट कञ्चनजंघाका छिरिङले गोल गर्दा पहिलो हाफ ३–२ को अवस्थामा सकिएको थियो ।

डिबक्सनजिकै आयोजकका डिफेन्डरले क्लियर गर्न नसकेको बललाई छिरिङले जाली चुमाए । खेलको ४६औँ मिनेटमा दिपेशले गोल गर्दै सुदूरपश्चिमलाई ४–२ को सहज जित दिलाए । दिपेशले गोलरक्षकसँगको वान भर्सेस वानको अवस्थामा आकर्षक गोल गरेका थिए । त्यसपछि दुवै टिमले गोल गर्ने प्रयासहरू गरे पनि सफल हुन सकेनन् ।

खेलको म्यान अफ द म्याच आयोजकका विक्रम चुनिए । उनले १० हजार नगदसहित ट्रफी प्राप्त गरे ।

खेलपछि प्रतिक्रिया दिँदै आयोजक सुदूरपश्चिम– ११ का प्रशिक्षक रोहित भण्डारीले सोचेअनुसारको नतिजा भए पनि खेलाडीहरू केही नयाँ भएकाले तालमेल राम्ररी मिल्न नसकेको बताए । उनले भने, ‘सबै खेलाडीबीच तालमेल राम्रो भएन । गोलकिपर पनि घाइते भएर समस्या भयो । तर पनि हाम्रो डिफेन्स लाइन राम्रो थियो ।’

पहिलो पटक सुदूरपश्चिम गोल्डकप खेल्न आएको भारतको कञ्चनजंघा फुटबल क्लबले उद्घाटन खेलमा बागमती युवा क्लबलाई टाइब्रेकरमा हरायो । क्लबका प्रशिक्षक डिङ्कर क्षत्रीले देशकै उत्कृष्टमध्येको गोल्डकपको बारेमा युट्युबमा हेरेर प्रतियोगिता खेल्न आएको र आगामी दिनमा पनि आउने बताए ।

अब सुदूरपश्चिम– ११ ले फाइनल प्रवेशका लागि विभागीय टिम नेपाल पुलिस क्लब र एपीएफबीचको विजेतासँग खेल्नेछ । प्रतियोगिताको दोस्रो क्वार्टरफाइनलमा बुधबार थ्री स्टार र नवजनजागृति क्लबबीच प्रतिस्पर्धा हुनेछ ।

प्रकाशित मिति: मंगलबार, फागुन १३, २०७६ १९:५२