कास्कीमा नेविसंघले गर्‍यो अनिश्चितकालीन शैक्षिक हडताल

A+ A A-

नेपाल विद्यार्थी संघ पृथ्वीनारायण (पीएन) क्याम्पस इकाइले अनिश्चितकालीन शैक्षिक संस्था बन्दको घोषणा गरेको छ।

संघले विद्यार्थी नेता एवं गत निर्वाचनमा स्ववियु सभापति पदका उम्मेदवार बनेका रेशम हमाल (राजेश) लाई क्याम्पस हाताभित्रैबाट प्रहरीले पक्राउ गरेको विरोधमा १५ फागुनदेखि कास्कीका सबै शैक्षिक संस्थाहरू अनिश्चितकालका लागि बन्द गर्ने घोषणा गरेको हो।

यही फागुन ८ गते पृथ्वीनारायण क्याम्पसमा नेविसंघका विद्यार्थी र अनेरास्ववियूका विद्यार्थीबीच झडप भएको थियो ।

उक्त झडपमा नेविसंघका हमालसहितका केही विद्यार्थीले आफूलाई कुटपिट गरेको भन्दै अनेरास्ववियूका विराट दवाडी र विशाल पन्तले जिल्ला प्रहरी कार्यालयमा उजुरी दिएपछि प्रहरीले हमाललाई पक्राउ गरेको थियो ।

नेविसंघले राजेश पक्राउ परेको विरोधमा ३ दिनदेखि चक्काजामसहितका विभिन्न विरोधका कार्यक्रम गर्दै आएको छ ।

संघले क्याम्पस प्रमुखले वार्ताका लागि बोलाएर प्रहरीलाई खबर गरी पक्राउ गराएको आरोप लगाउँदै उनको तत्कालै रिहाइको माग गर्दै शैक्षिक हडतालको घोषणा गरेको हो ।

नेपाल विद्यार्थी संघ पृथ्वीनारायण इकाइ सभापति दीपक शर्मा वाग्लेले सोमबार विज्ञप्ति जारी गर्दै प्रशासनको मिलेमतोमा पक्राउ गरिएको भन्दै विरोधस्वरुप शैक्षिक संस्था बन्दको घोषणा गरिएको जनाएका छन् ।

पीएन क्याम्पसमा नेविसंघ र अनेरास्ववियुको सांगठनिक मतभेदका कारण शैक्षिक गतिविधिमा असहज परिस्थिति सृजना भएको विज्ञप्तिमा उल्लेख छ ।

नेविसंघले नेताहरूमाथि लगाइएको झुटा र कपोलकल्पित मुद्दा खारेजी र विनाशर्त तत्काल रिहाइको माग राखी आन्दोलनको घोषणा गरिएको जनाएको छ । नेविसंघले पूर्वसञ्चारमन्त्री गोकुल बाँस्कोटालाई कडा कारबाही गर्नुपर्ने र प्रधानमन्त्री केपी शर्मा ओलीले केकमा नेपालको नक्सा बनाएर काटेकोमा माफी माग्नुपर्ने मागसमेत गरेको छ ।

१२ वटा सरकारी गाडी नियन्त्रणमा

पोखराका विभिन्न स्थानबाट नेविसंघले १२ वटा सरकारी गाडी नियन्त्रणमा लिएको छ। संघले पोखराका विभिन्न स्थानबाट सरकारी नम्बर प्लेटका गाडी नियन्त्रणमा लिएको नेविसंघ कास्कीले जनाएको छ ।

संघले नियन्त्रणमा लिएका १२ वटा गाडीमध्ये एउटा गण्डकी प्रदेशका मन्त्रीको गाडीसमेत रहेको नेविसंघका निवर्तमान केन्द्रीय सदस्य सरोज केसीले बताए ।

कार्यकर्ता पक्राउको विरोधमा उत्रीएको नेविसंघले पोखरा छिर्ने मुख्य नाकासहित महेन्द्रपुल, नालामुखलगायत ठाउँमा टायर बालेर विरोधसमेत जनाएको छ । संघले क्याम्पस प्रशासनको मुख्य गेटमा ताला लगाएको छ ।