शेयर कारोबारमा प्यानः बाझियो अर्थमन्त्रालय र बोर्डको निर्णय

A+ A A-

शेयर कारोबारमा स्थायी लेखा नम्बर (प्यान) अनिवार्य गर्ने विषयमा अर्थमन्त्रालय र धितोपत्र बोर्डको निर्णय बाझिएको छ ।

अर्थमन्त्रालयले बजेटको मध्यावधि समीक्षा मार्फत २०७६ बैशाख १ गतेदेखि शेयर खरिदकर्ताले अनिवार्य रुपमा प्यान लिनुपर्ने व्यवस्था कार्यान्वयन गरिने भनेको छ । तर, पुँजी बजार क्षेत्रको नियामक निकाय धितोपत्र बोर्डले एकै पटकमा ५ लाख रुपैयाँभन्दा बढीको शेयर कारोबार गर्ने लगानीकर्ताको लागि प्यान अनिवार्य गर्ने निर्णय गरेको छ ।

अर्थमन्त्रालयले चालु आर्थिक बर्षको मध्यावधि समीक्षा मार्फत आगामी बैशाख १ गतेदेखि शेयर खरिदकर्ताले अनिवार्य रुपमा प्यान लिनुपर्ने भनेको छ । अर्थमन्त्रायलेका निर्णयमा शेयर कारोबार रकमको आधारमा प्यान अनिवार्य गरिने वा नगरिने कुनै उल्लेख छैन ।

बजेटको मध्यावधि समीक्षाका अनुसार आगामी बैशाखदेखि शेयर किन्ने व्यक्तिले मात्रै प्यान लिनुपर्छ । बेच्ने व्यक्तिले पर्दैन । तर धितोपत्र बोर्डको निर्णय अनुसार ५ लाख रुपैयाँभन्दा बढीको शेयर कारोबार गर्ने व्यक्तिले प्यान नम्बर लिनै पर्छ ।

बोर्डका अनुसार आगामी बैशाख १ गतेदेखि ५ लाख रुपैयाँभन्दा बढीको शेयर किन्ने र बेच्ने दुबै व्यक्तिले प्यान लिएकै हुनुपर्छ । किनभने बोर्डले प्रयोग गरेको ‘कारोबार गर्ने व्यक्ति’ शब्दले किन्ने र बेच्ने दुबै पक्षलाई सम्बोधन गर्छ ।

मन्त्रालय र बोर्डको निर्देशनमा दुईटा फरक विषय छन् । पहिलो भिन्नतामा अर्थले शेयर कारोबार रकमका आधारमा प्यान लगाउने भनेको छैन । बोर्डले ५ लाख रुपैयाँभन्दा बढीको कारोबारमा मात्रै प्यान चाहिने भनेको छ ।

यस्तै दोस्रो भिन्नतामा अर्थले शेयर खरिद गर्ने व्यक्तिले मात्रै प्यान लिनुपर्ने भनेको छ । बेच्नेले पर्दैन । बोर्डले प्रयोग गरेको शब्द ‘कारोबार गर्ने व्यक्ति’ले ५ लाख रुपैयाँभन्दा बढीको शेयर किन्ने र बेच्ने दुबै व्यक्तिले प्यान लिनुपर्ने बुझाउँछ ।

बोर्डले ५ लाख रुपैयाँभन्दा कमको शेयर कारोबारमा प्यान नलिए पनि हुने भनेको छ । कम लगानी गर्ने तथा साना लगानीकर्ताहरुलाई प्रोत्साहित गर्न हाललाई ऐच्छिक रुपमा गर्न सक्ने व्यवस्था गर्ने नेपाल धितोपत्र बोर्डले निर्णय गरेको प्रवक्ता निरज गिरीले जानकारी दिए ।

लगानीकर्ताहरु तथा अन्य सरोकारवालाहरुको सुझाव अनुसार नै यस्तो व्यवस्था गरिएको बोर्डको भनाइ छ ।

यो पनि हेर्नुहोस्
बैशाखपछि शेयर किन्दा आयकरको लफडा

प्रकाशित मिति: शुक्रबार, चैत १, २०७५ ०२:५७