खप्तड गोल्डकपको क्वार्टरफाइनल समीकरण पूरा

A+ A A-

सुदूरपश्चिम–११ स्पोर्ट्स क्लबको आयोजनामा भइरहेको सर्वाधिक धनराशिको नेपाल आइस सुदूरपश्चिम अन्तर्राष्ट्रिय आमन्त्रण सुदूरपश्चिम खप्तड गोल्डकपको क्वार्टरफाइनल समीकरण पूरा भएको छ ।

धनगढी रंगशालामा सोमबार भएको खेलमा गोर्खा ब्वाइज रुपन्देही आफ्नै जिल्लाको सुनौलो संगम युवा क्लबलाई टाइब्रेकरमा ५–३ ले हराउँदै अन्तिम ८ मा प्रवेश गरेको छ ।

सो खेलमा निर्धारित समयको खेल गोलरहित बराबरीमा सकिएपछि खेल टाइब्रेकरमा गएको थियो । टाइब्रेकरमा गोर्खा ब्वाइजका हरि कठायत, अनिष तामाङ, रन्दीप पौडेल, निशान न्यौपाने र उत्तम गुरुङले पेनाल्टीमा गोल गरेका थिए ।

टाइब्रेकरमा गोर्खा ब्वाइजका गोलरक्षक मनोज गुरुङ नायक बने । उनले सुनौलोका कप्तान मोहन थापाको पेनाल्टी बचाए । सुनौलोका लागि रन्जित थापा, अजित थापा, शंकर राईले गोल गरे । खेलको म्यान अफ द म्याच गोर्खा ब्वाइजका गोलरक्षक मनोज गुरुङ चुनिए । उनले १० हजार नगदसहित ट्रफी प्राप्त गरे ।

अब गोर्खा ब्वाइजले सेमिफाइनल प्रवेशका लागि हिमालयन शेर्पा क्लबको सामना गर्नेछ । यसअघि भएका खेलमा जित हात पार्दै विभागीय टिम एपीएफ क्लब, भारतको कञ्चनजंघा एफसी र नवजनजागृति क्वार्टरफाइनलमा पुगिसकेका छन् ।

यस्तै, आयोजक सुदूरपश्चिम–११ साविक विजेता नेपाल पुलिस, थ्री स्टार र हिमालयन शेर्पा क्लब भने वाई पाएर सिधै क्वार्टरफाइनलमा पुगेको हो । मंगलबारदेखि प्रतियोगितामा क्वार्टरफाइनलका खेलहरू सुरु हुनेछन् । मंगलबार हुने पहिलो क्वार्टरफाइनलमा आयोजक सुदूरपश्चिम–११ स्पोर्ट्स क्लब र कञ्चनजंघा एफसी भारतबीच खेल हुनेछ ।

नेपाल आइस मुख्य प्रायोजक रहेको प्रतियोगितालाई नेपाल टेलिकमले सहप्रायोजन गरेको छ । प्रतियोगिताको प्रायोजकमा ग्लोबल आईएमई बैंक, एभरेष्ट एकेडेमी, दिनेश सोप र सगरमाथा सिमेन्ट रहेको छ । यसैगरी हस्पिटल पाटर्नरमा कैलाली हस्पिटल, इन्स्योरेन्स पाटर्सरमा मेटलाईफ अफिसियल बैंकमा सनराइज बैंक हस्पिटालिटी पाटर्नरको रूपमा ड्रिम ग्रुप अफ म्यानेजमेन्ट रहेका छन् ।

‘सुदूरपश्चिम प्रदेशको पहिचान, फुटवल विकासको अभियान’ भन्ने नारासहित सुदूरपश्चिम– ११ स्पोर्ट्स क्लबले विगत ४ वर्षदेखि यो प्रतियोगिता आयोजना गर्दै आएको छ ।

प्रकाशित मिति: सोमबार, फागुन १२, २०७६ १९:०६