हिलाको गुनासो, ‘मदिराले गाउँ नै अशान्त बन्यो’

A+ A A-

‘अध्यक्षज्यू, दारु बन्द गरिदिनुपर्‍यो । यसले त हाम्रो घरबार नै सिध्याउन थालिसक्यो ।’ अछाम तुर्माखाँद–३ भैरवस्थान असाराघाटकी पुनादेवी बुढाले गाउँपालिका अध्यक्ष पुष्पराज शर्मालाई भनिन्, ‘मदिराकै कारण घर–घरमा आतंक छ ।

धेरै महिला दारुकै कारण घर न घाटका भएका छन् । यहाँहरूलाई यो समस्या पटक–पटक भनिसक्यौँ, अहिलेसम्म कुनै सुनुवाइ भएन ।’

वडा कार्यालय केन्द्र भैरवस्थानमा आयोजित सार्वजनिक सुनुवाइमा सहभागी हुन महिला टोलीसहित आएकी पुनादेवीले गाउँलाई मदिरामुक्त गर्नुपर्ने माग राखिन् ।

‘श्रीमान् मात्र होइन, कलिलो उमेरका छोराहरूसमेत मदिराकै लतमा छन्, यो सबैले बुझिदिनुपर्‍यो । गाउँका अधिकांश पुरुषले दारु खाएर श्रीमती कुट्छन्, रात पर्‍यो कि पुरुष सबै भट्टीतिर छिर्छन् ।’ थाल्पाटाकी कल्पनादेवी बुढाले पनि पुनादेवीको विचारमा सहमति जनाइन् ।

‘समाज शान्त बनाउन सबैभन्दा पहिले मदिरा बन्द गर्नैपर्छ,’ मञ्चमा आसिन जनप्रतिनिधि र राजनीतिक नेताहरूलाई लक्षित गर्दै उनले भनिन् ।

मदिरा सेवन गरी भदैलाई ज्वाइँले मरणासन्न हुने गरी पिटेको कल्पनादेवीले बताइन् । उनले भनिन्, ‘दिनहुँ यस्ता झगडाले महिलाको जीवन नै संकटमा पर्दै गएको छ । यहाँका अधिकांश पुरुष काम नै गर्दैनन्, गरिहाले भने पनि कमाएजति सबै मदिरा पिएर सिध्याउँछन् ।’ घरका सबै आवश्यकता पूरा गर्ने जिम्मा महिलाकै काँधमा रहेको उनले बताइन् ।

‘दोस्रो बिहे गरेर ज्वाइँले भदैमाथि दिनहुँ

कुटपिट गर्न थालेपछि न्यायको खोजीमा धेरैतिर चाहर्‍यौँ,’ उनले भनिन्, ‘तर, कतै सुनुवाइ भएन ।’ कार्यक्रममा सहभागी लक्षिनादेवी बुढाले पनि पुनादेवी र कल्पनादेवीकै कुरामै सही थपिन् । ‘यहाँका अधिकांश पुरुष दिनभर चौतारो र चियापसलमा बसेर गफ गर्ने, तास खेल्ने गर्छन् । साँझ परेपछि भट्टीतिर छिर्छन्,’ उनले भनिन् ।

मदिरा निषेध गर्छौँ : जनप्रतिनिधि

कार्यक्रममा महिलाले राखेका समस्या सुनेपछि गाउँपालिका अध्यक्ष शर्मासहित राजनीतिक दलका तर्फबाट सहभागी बमबहादुर बिसी, डम्बर बिसी र शिव बिसीसहितका नेताले मदिरा व्यवस्थापन गरेर गाउँमा शान्ति स्थापना गर्ने प्रतिवद्धता व्यक्त गरे ।