विवेकको ह्याट्रिकमा नव जनजागृति क्वार्टरफाइनलमा

A+ A A-

नेपाल आइस सुदूरपश्चिम अन्तर्राष्ट्रिय आमन्त्रण खप्तड गोल्डकपअन्तर्गत आइतबारको खेलमा नव जनजागृति युवा क्लब क्वार्टरफाइनलमा प्रवेश गरेको छ । नव जनजागृति क्लब मदन भण्डारी स्पाेर्ट्स एकेडेमीलाई ४–० को फराकिलो अन्तरले हराउँदै क्वार्टरफाइनलमा प्रवेश गरेको हो ।

धनगढी रंगशालामा आइतबार भएको तेस्रो खेलमा नव जनजागृतिको जितमा विवेक चौधरीले ह्याट्रिक गरे । यस्तै, १ गोल सागर चौधरीको नाममा रह्यो । पहिलो हाफमा मदन भण्डारीसँग गोल रहित बराबरी खेलेको नव जनजागृतिले दोस्रो हाफमा भने लगातार गोल गर्‍यो । खेलको ५२औँ मिनेटमा सागरले गोल गर्दै टोलीलाई अग्रता दिलाए ।

मदन भण्डारी स्पाेर्ट्सका गोलरक्षक विशाल सुनुवार अगाडि बढेको फाइदा उठाउँदै सागरले सहज गोल गरे । खेलको ५९औँ मिनेटमा विवेकले गोल गर्दै टोलीको अग्रता दोब्बर बनाए ।

मदन भण्डारीका गोलरक्षक र डिफेन्डरको तालमेल नमिल्दाको फाइदा विवेकले उठाए । खेलको ७२औँ मिनेटमा विवेकले व्यक्तिगत दोस्रो गोल गर्दै नव जनजागृतिलाई ३–० को अग्रता दिलाए । त्यसपछि खेलको ८०औँ मिनेटमा पेनाल्टीमा गोल गर्दै विवेकले ह्याट्रिक पूरा गरे र टोलीलाई ४–० को फराकिलो जित दिलाए । मदन भण्डारी स्पोर्ट्सका गोलरक्षक विशाल सुनुवारले फल गरेपछि पाइएको पेनाल्टीलाई विवेकले गोल गर्दै ह्याट्रिक पूरा गरेका हुन् ।

मदन भण्डारी स्पोर्टस एकेडेमीले भने पहिलो हाफमा पाएको पेनाल्टीमा गोल गर्न सकेन । खेलको ३५औँ मिनेटमा नव जनजागृतिका मनोज चौधरीले विवेक पुनलाई लडाएपछि पाएको पेनाल्टीमा मदन भण्डारीका कप्तान असीम गुरुङ गोल गर्न चुके । उनको प्रहार नव जनजागृतिका गोलरक्षक दिलमणि चौधरीले बचाएका थिए ।

प्रतियोगितामा पहिलो ह्याट्रिक गरेका नव जनजागृतिका विवेक चौधरी खेलको म्यान अफ द म्याच भए । उनले नगद १० हजारसहित ट्रफी प्राप्त गरे । अब सेमिफाइनल प्रवेशका लागि नव जनजागृतिले थ्री स्टार क्लबको सामना गर्नेछ ।

थ्री स्टारले पहिलो चरणमा वाई पाएको छ । प्रतियोगिताको अन्तिम क्वार्टरफाइनलमा सोमबार गोर्खा ब्वाइज रुपन्देही र सुनौलो संगम बुटवलबीच प्रतिस्पर्धा हुने आयोजक सुदूरपश्चिम– ११ स्पाेर्ट्स क्लबका अध्यक्ष सुरेश हमालले जानकारी दिए ।

फागुन २० गतेसम्म सञ्चालन हुने प्रतियोगिताको विजेतालाई २१ लाख १ रुपैयाँ तथा उपविजेतालाई १० लाख १ रुपैयाँ, ट्रफी, मेडल तथा प्रमाणपत्र प्रदान गरिनेछ । त्यस्तै, उत्कृष्ट खेलाडीलाई बेनेली मोटरसाइकल, विभिन्न विधाका उत्कृष्ट खेलाडीलाई १५/१५ हजार र प्रत्येक खेलको म्यान अफ द म्याचलाई १०/१० हजार पुरस्कार प्रदान गरिनेछ ।

प्रतियोगिता हेर्नका लागि टिकट काट्ने दर्शकहरूमध्येबाट गोलाप्रथाद्वारा एक जनाले १३ हजार ५ सय मूल्य पर्ने रियल मी मोबाइल पाइरहेका छन् भने एक/एक जना दर्शकले नेसनल प्याथ ल्याव र निःसर्ग हस्पिटलमा ५ हजारबराबरको होल बडी चेकजाँचको सुविधासमेत पाइरहेका छन् । बाराही नेटले गोल्डकपको टिकटको अर्धकट्टी देखाएमा ३ महिना निःशुल्क इन्टरनेटकोसुविधा दिइरहेको छ ।

नेपाल आईस मुख्य प्रायोजक रहेको प्रतियोगितालाई नेपाल टेलिकमले सहप्रायोजन गरेको छ । प्रतियोगिताका प्रायोजकमा ग्लोबल आईएमई बैंक, एभरेष्ट एकेडेमी, दिनेश सोप र सगरमाथा सिमेन्ट रहेका छन् ।

त्यस्तै, हस्पिटल पार्टनरमा कैलाली हस्पिटल, इन्स्योरेन्स पार्टनरमा मेटलाइफ, अफिसियल बैंकमा सनराइज बैंक, हस्पिटालिटी पार्टनरमा ड्रिम ग्रुप अफ म्यानेजमेन्ट रहेका छन् । ‘सुदूरपश्चिम प्रदेशको पहिचान, फुटबल विकासको अभियान’ भन्ने नारासहित सुदूरपश्चिम– ११ स्पाेर्ट्स क्लबले विगत ४ वर्षदेखि आयोजना गर्दै आएको छ ।

प्रकाशित मिति: आइतबार, फागुन ११, २०७६ १९:५३