राप्रपाको स्वाभिमान यात्रा राजधानी प्रवेश

A+ A A-

कमल थापा नेतृत्वको राष्ट्रिय प्रजातन्त्र पार्टी नेपालले शुरु गरेको ‘मेची–महाकाली राष्ट्रिय स्वाभिमान यात्रा’ राजधानी आइपुगेको छ । १५ दिनअघि ताप्लेजुङबाट सुरु भएको यात्रा आज राजधानी आइपुगेको राप्रपाका सांसद राजेन्द्र लिङ्दनेले जानकारी दिएका छन् ।

राप्रपाले स्वाभिमान यात्राको नाम दिएको सो यात्रा सापनको एकदिन अगावै काठमाडौं आइपुगेको हो । भोली राजधानीमा सभा गरेर यात्रा समापन गर्ने कार्यक्रम तय गरिएको छ । यात्राको अध्यक्ष थापाले एक समारोहका बीच फागुन १५ गते ताप्लेजुङ सदरमुकाममा औपचारिक उद्घाटन गरेका थिए ।

यात्राको उद्देश्य हिन्दु राष्ट्रको पुनःस्थापना, राष्ट्रिय अखण्डताको रक्षा, भ्रष्टाचारको अन्त्य, स्वदेश मै पर्याप्त रोजगारीको सिर्जना गर्ने वातावरण बनाउन दबाब दिने, सबैखाले महिला हिंसा, जातीय विभेद र छुवाछुतको अन्त्यका लागि जनजागरण गर्ने लगायतका उद्धेश्य सहित यात्रा गरिएको राप्रपाले जनाएको छ ।

ताप्लेजुङबाट पाँचथर, इलाम, झापा सहित तराईका २२ जिल्ला र देशका विभिन्न भाग हुँदै सुदुर पश्चिमको कञ्चनपुर पुग्ने यात्रा कञ्चनपुरबाट फर्केर बुटवलबाट पाल्पा, स्याङ्जा, कास्की हुँदै उपत्यका प्रवेश गरेको हो । यात्रा अवधिभर राप्रपाले देशका प्रमुख शहरहरुमा आमसभा तथा विभिन्न ठाउँमा कोणसभा लगायतका कार्यक्रम गरेको थियो ।

ताप्लेजुङबाट काठमाडौं सम्मको १५ दिने यात्राले २२६० किमि दुरीको यात्रा तय गरेको राप्रपाले जनाएको छ । यात्रा हिजो नै काठमाडौं आइपुग्ने र आज समापन कार्यक्रम गर्ने भनिएपनि प्राविधिक कारणले एकदिन सरेको सो पार्टीले जनाएको छ ।