प्रदेश १ का फुटबल ‘रेफ्री’ लाई ७ दिने प्रशिक्षण, ५४ जना रेफ्रीको सहभागिता

A+ A A-

फुटबल खेल चलिरहेको बेलामा रेफ्रीको निर्णय अन्तिम हुन्छ । रेफ्रीको एउटै निर्णयले कुनै पनि टिम पराजित हुन सक्छ, या भनौँ खेल चलिरहेको बेला रेफ्री नै फुटबल खेलको मुख्य नायक हुन्छ । अनुभवी एवं दक्ष रेफ्री भएको प्रतियोगिता निर्विवाद एवं निष्पक्ष रूपमा सम्पन्न हुने गर्छ ।

यसैलाई मध्यनजर गरी अखिल नेपाल फुटबल संघ (एन्फा)को एक नम्बर प्रदेश कमिटीले प्रदेशका १३ जिल्लाका रेफ्रीलाई ७ दिने प्रशिक्षणको आयोजना गर्‍यो ।

रेफ्रीको कमीजोरीलाई सुधार्ने र पछिल्लो समय फुटबलमा लागू भएका नियमको अपडेट गराउने उद्देश्यले एन्फाले ११ फागुनसम्म रेफ्री तालिम आयोजना गरेको हो । कतिपय प्रतियोगितामा रेफ्रीको गलत निर्णयका कारण खेलाडीहरूबीच विवाद हुने, जित्नुपर्ने टिम पराजित हुने र अन्त्यमा प्रतियोगिता नै स्थगित हुनेसम्मका घटनाहरू धेरै भएकाले यसैलाई मध्यनजर गरेर रेफ्रीहरूलाई १ हप्ते तालिम राखिएको अखिल नेपाल फुटबल संघ एन्फाले जनाएको छ ।

मुलुक संघीयतामा गएपछि एन्फाले ७ वटै प्रदेशमा प्रदेशस्तरीय एन्फाको कार्यालय खोलेसँगै खेलाडी र रेफ्रीहरूलाई प्रशिक्षण दिन थालेको हो ।

जथाभावी रूपमा रेफ्रीहरूले प्रतियोगितामा निर्णय गर्र्ने गरेका कारण रेफ्रीहरूमाथि आक्रमण हुने गरेको घटना सुनाउँदै अखिल नेपाल फुटबल संघ (एन्फा)का केन्द्रीय सदस्य एवं प्रवक्ता किरण राईले रेफ्रीहरूले प्रतियोगिताको निर्णायक भूमिकाको निर्वाह गर्न जाँदा एन्फामातहतमा रहेका जिल्ला, प्रदेश र संघसँग अनुमति लिएर जान आग्रह गरे । उनले एन्फाको स्वीकृतिविना भएका प्रतियोगिताबाट कुनै अप्रिय घटना भएमा एन्फाले कुनै जिम्मेवारी नलिनेतर्फ सचेत हुन तालिममा सहभागी रेफ्रीहरूलाई सजक गराए ।

एन्फा १ नम्बर प्रदेशका अध्यक्ष किशोर राईले खेललाई व्यावसायिक नबनाएसम्म फुटबल खेलको विकास नहुने भएकाले तालिमको आयोजना गरिएको बताए । उनले भने, ‘फुटबल खेललाई पूर्ण रूपमा व्यावसायिक मात्र होइन, यसलाई रोजगारीको माध्यम पनि बनाउन जरुरी छ । फुटबलको विकास र विस्तारमा रेफ्रीको भूमिका महत्त्वपूण हुन्छ । त्यसैले उहाँहरूलाई पनि प्रशिक्षणबाट अपग्रेड गराउने जमर्को गरेका हौँ ।’

एन्फाको प्रदेश कमिटी गठन भएपछि १ नं. प्रदेशले पहिलोपटक रेफ्री प्रशिक्षण कार्यक्रम राखेको हो । धरान–१७ एन्फा एकाडेमीको हलमा सञ्चालन भइरहेको सो तालिममा खोटाङबाहेक प्रदेश १ का १३ जिल्लाका ५४ जना रेफ्रीको सहभागिता रहेको छ ।

प्रकाशित मिति: शुक्रबार, फागुन ९, २०७६ २०:१६