धनगढीमा खप्तड गोल्डकप सुरुः कञ्चनजंघा क्वार्टरफाइनलमा

A+ A A-

नेपाल आइस सुदूरपश्चिम अन्तर्राष्ट्रिय आमन्त्रण खप्तड गोल्डकपको चौथो संस्करण धनगढीमा शुक्रबारदेखि सुरु भएको छ । सुदूरपश्चिम प्रदेशका मुख्यमन्त्री त्रिलोचन भट्टले सो प्रतियोगिताको उद्घाटन गरेका हुन् ।

सो अवसरमा बोल्दै मुख्यमन्त्री भट्टले खप्तड गोल्डकप सुदूरपश्चिमको प्रतिष्ठासँग जोडिएकाले प्रदेश सरकारले पूर्ण सहयोग गर्ने प्रतिवद्धता जनाए ।

त्यस्तै, सुदूरपश्चिम प्रदेश सरकारका सामाजिक विकासमन्त्री र धनगढी उपमहानगरपालिका मेयर नृप ओडले पनि आफ्नो तर्फबाट हुने सहयोगको प्रतिवद्धता जनाए । प्रतियोगिताको उद्घाटनअगाडि ट्राफिक चौराहबाट धनगढी रंगशालासम्म र्‍यालीसमेत निकालिएको थियो ।

प्रतियोगिताको उद्घाटन खेलमा भारतको कञ्चनजंघा फुटबल क्लब विजयी भई क्वार्टरफाइनलमा प्रवेश गरेको छ । धनगढी रंगशालामा भएको खेलमा बागमती युवा क्लब सिरहालाई टाइब्रेकरमा ४–२ ले हराउँदै कञ्चनजंघा क्वार्टरफाइनलमा प्रवेश गरेको हो ।

निर्धारित समयसम्म दुवै टिमले गोदरहित बराबरी खेलेपछि भएको टाइब्रेकरमा कञ्चनजंघालाई जिताउन गोलरक्षक निगम सिंह नायक बने । उनले बागमतीका विपिन तुमसिङ मगर र अनिल मगरको प्रहारलाई रोके । यसअघिका दुवै हाफमा कञ्चनजंघाले अधिकांश समय बल आफ्नो पोल्टामा राखेको भए पनि गोल गर्न नसकेपछि खेल टाइब्रेकरमा गएको हो ।

खेलमा कञ्चनजंघाका निगम सिंह दिनेश सोप म्यान अफ द म्याच भए । उनले नगद १० हजारसहित ट्रफी पाए । पहिलो खेलमा जित हात पारेको कञ्चनजंघाले अब सेमिफाइनल प्रवेशका लागि आयोजक सुदूरपश्चिम–११ स्पोटर््स क्लबसँग प्रतिस्पर्धा गर्नेछ ।

प्रतियोगिताअन्तर्गत शनिबार सशस्त्र प्रहरी बल एपीएफ र न्यूरोड टिम एनआरटीबीच प्रतिस्पर्धा हुने आयोजक क्लबका महासचिव प्रकाश शाहीले जानकारी दिए ।

प्रतियोगिताको विजेतालाई २१ लाख १ रुपैयाँ तथा उपविजेतालाई १० लाख १ रुपैयाँ, ट्रफी, मेडल तथा प्रमाणपत्र प्रदान गरिनेछ । त्यस्तै, उत्कृष्ट खेलाडीलाई मोटरसाइकल, विभिन्न विधाका उत्कृष्ट खेलाडीलाई १५÷१५ हजार र प्रत्येक खेलको म्यान अफ द म्याचलाई १०÷१० हजार पुरस्कार प्रदान गरिनेछ ।

१ करोड ५० लाख खर्च लाग्ने अनुमान गरिएको सो प्रतियोगिताबारे दैनिक १० हजार दर्शकले प्रत्यक्ष तथा २ करोडले अप्रत्यक्ष रूपमा जानकारी पाउने आयोजकले दाबी गरेका छन् ।

सुदूरपश्चिम–११ स्पोटर््स क्लबको आयोजनामा सञ्चालित सो प्रतियोगिता २० गतेसम्म सञ्चालन हुनेछ ।

प्रकाशित मिति: शुक्रबार, फागुन ९, २०७६ २०:०१