हुरीबतासले डडेल्धुरा महोत्सव प्रभावित, स्टेज, स्टल र प्रवेशद्वार नै ढले

A+ A A-

बिहीबार रातिदेखि मौसममा आएको परिवर्तनसँगै डडेल्धुरा महोत्सव प्रभावित बनेको छ । नेपाल भ्रमण वर्ष २०२० लाई सफल पार्न सुरु भएको चौथो डडेल्धुरा महोत्सव लगातारको झरी र हावाहुरीले प्रभावित भएको हो । हावाहुरीले महोत्सवमा बनाइएका स्टेज, स्टल, प्रवेशद्वार ढलेका छन् ।

डडेल्धुरा उद्योग वाणिज्य संघ डडेल्धुराले भ्रमण वर्षलाई सफल बनाउन र यहाँका ऐतिहासिक, पुरातात्त्विक, सांस्कृतिक, धार्मिक एवं पर्यटकीय स्थलको प्रवर्द्धन गर्न आयोजना गरिएको महोत्सवको बिहीबार सुदूरपश्चिम प्रदेशका भौतिक पूर्वाधार विकासमन्त्री पठानसिंह बोहोराले उद्घाटन गरेका थिए ।

‘सुखी नेपाली समृद्ध नेपाल : कृषि पर्यटन उद्योग र व्यापार, समृद्धिको आधार’ भन्ने मूल नाराका साथ बिहीबारगतेदेखि सञ्चालन भएको महोत्सव मौसम खराबीका कारण प्रभावित भए पनि मौसम सफा हुनेबितिक्कै सञ्चालनमा आउने उद्योग वाणिज्य संघ डडेल्धुराका अध्यक्ष लोकराज भट्टले बताए ।

‘महोत्सवमा बनाइएका स्टेज, स्टल, प्रवेशद्वारमा सामान्य क्षति पुगेको छ । यो एक÷दुई घण्टामा बनाउन सकिन्छ,’ उनले भने, ‘आजका लागि तय भएका कलाकार जिल्लामा पुगिसकेका छन् । भोलि पर्सि आउने कलाकारहरूलाई मौसम सुधार भएपछि मात्र बोलाउँर्छौँ ।’

डडेल्धुरामा आज वर्षा ५ मिलिमिटर जल तथा मौसम पूर्वानुमान महाशाखाले जनाएको छ । महोत्सवमा लोक दोहरी हाँस्यब्यंग्य, स्थानीय लोक देउडा तथा नृत्य र साँस्कृतिक कार्यक्रम, स्थानीय उत्पादन, पर्यटक लक्षित सांस्कृतिक भेषभूषा तथा ऐतिहासिक, पुरातात्त्विक, प्राकृतिक, धार्मिक तथा विभिन्न पर्यटकीय क्षेत्रको उजागर र प्रचार–प्रसार गर्ने उद्देश्यले महोत्सव आयोजना गरिएको हो ।

राष्ट्रिय कलाकारसँगै सुदूरपश्चिम प्रदेशका कलाकारको महोत्सवमा विशेष प्रस्तुति रहने संघले जनाएको छ । महोत्सवमा बडालको चौलो, मारुनी नृत्य, छलिया नृत्य महिला परुष देउडा, झाँकी प्रदर्शन गरिने जनाइएको छ । महोत्सवमा माडा, रोटी, कोदाको रोटी, डुब्कालगायतका डोटेली खानाका विशेष परिकारहरू रहनेछन् ।

अमरगढी नगरपालिका–४, टुँडिखेलमा आयोजना भएको महोत्सवमा सर्वसाधारणका लागि ६० विद्यार्थीका लागि ४० रुपैयाँ टिकट शुल्क निर्धारण गरिएको छ । ‘क’ र ‘ख’ वर्गका अपाङ्गता भएकालाई परिचयपत्रका आधारमा निःशुल्क प्रवेशको व्यवस्था मिलाइएको छ ।

महोत्सवको टिकटबाट उठ्ने पैसाको १० प्रतिशत रकम डडेल्धुरा बहुमुखी क्याम्पसमा प्रविधिक शिक्षा सञ्चालन गर्न र डडेल्धुरामा हवाई मैदान निर्माणका लागि खर्च गरिने आयोजकले जनाएका छन् । २ लाख मान्छेले महोत्वसको अवलोकन गर्ने आयोजकको दाबी छ ।