काम कारबाहीप्रति मुख्यमन्त्रीकै गृहजिल्लावासी असन्तुष्ट

A+ A A-

प्रदेश सरकारको काम कारबाहीप्रति प्रदेश–१ का मुख्यमन्त्री शेरधन राईको गृह जिल्ला भोजपुरवासीले नै असन्तुष्टि देखाएका छन् । सरकार गठन भएको २ वर्ष पूरा हुँदा पनि जनताले महसुस गर्ने गरी कुनै काम गर्न नसकेको उनीहरूको भनाइ छ ।

उद्घाटन र शिलान्यासमा मात्रै मन्त्रीहरू दौडिँदा दुई वर्षको अवधिमा सरकारले प्रदेशवासीका लागि सम्झनलायक कुनै काम नभएको भोजपुरवासीको गुनासो छ ।

प्रदेश नम्बर १ सरकारले आफ्नो २ वर्षे कार्यकालमा प्रदेशभित्र प्रभावकारी काम गरिरहेको दाबी गरिरहँदा पूर्वी पहाडी जिल्ला भोजपुरका जनताले भने प्रदेश सरकारले जनताको आशा र अपेक्षाअनुसार काम गर्न नसकेको बताए ।

जिल्ला समन्वय समिति भोजपुरका प्रमुख लक्ष्मण खड्काले प्रदेश सरकारले जनअपेक्षाअनुरूप काम गर्न नसकेको बताए ।

प्रदेश नम्बर १ का मुख्यमन्त्री शेरधन राईको गृहजिल्लासमेत रहेको भोजपुरका जनताले प्रदेश सरकारले २ वर्षमा विभिन्न काम गरिरहेको बताए पनि अहिलेसम्म प्रदेशको नामसमेत राख्न नसकेको उनीहरूको भनाइ छ ।

‘प्रदेश सरकारले विकास निर्माणको काम तीव्र गतिमा अघि बढेको बताउँदै आएको छ,’ भोजपुर नगरपालिका– ७ की लीलामाया तामाङले भनिन्, ‘सरकार गठन भएको २ वर्ष पूरा भए पनि प्रदेश सरकारले प्रदेशको नाम अझै राख्न सकेन ।’

विगतमा गरेका प्रतिवद्धताअनुसार काम नभएकाले जनता निराश बन्दै गएको भोजपुरकै अर्का स्थानीय शरण तामाङले बताए । ‘हाम्रै जिल्लाबाट मुख्यमन्त्री पाएका छौँ । त्यसैले अझै पनि प्रदेश सरकारले काम गर्छ भन्ने अपेक्षामा हामी छौँ,’ उनले भने, ‘प्रदेश सरकारले आगामी दिनमा चुनावमा गरेका प्रतिवद्धतालाई सम्झिएर काम गर्नुपर्छ ।’

प्रदेश सरकारबाट जनताले महसुस गर्ने गरी काम नभएको भोजपुर पौवादुङका गंगाबहादुर थापाले बताए । सरकारमा रहेको दल नेकपा र सरकारका मन्त्रीहरूले साँघुरा घेराबाट बाहिर निस्किएर जनअपेक्षाअनुसार काम गर्न जरुरी रहेको उनको भनाइ छ ।

प्रकाशित मिति: शुक्रबार, फागुन ९, २०७६ १६:३८