पाशुपत क्षेत्रमा जय शम्भो ! (फाेटाे फिचर)

A+ A A-

हिन्दु धर्मावलम्बीहरूको आस्थाको धरोहर पशुपतिमा आज बैग्लै रौनक छ । पाशुपत क्षेत्रमा लामा ताँत लागेर कोही मन्दिरभित्र प्रवेश गरिरहेका छन् त कोही त्यही लामो ताँतीमा रहेका दशर्नाथीहरूको सेवाका लागि ओहोरदोहोर गरिरहेका छन् । मन्दिर पस्दै गर्दा विभिन्न किसिमका आवाजहरू ठोक्किरहन्छन् कानमा ।

‘बाबाको फोटो खिचाउनुस् मात्र १० रूपैयाँमा...आउनुस्...आउनुस् बाबाको दर्शन गर्नुस्, फोटो खिचाउनुस्,’ एक बाबा कराइरहेका थिए । लाग्छ उनी मन्दिर दर्शनभन्दा खाने बेजोमा जोडतोडले लागेका छन् ।

यस्तै, छेवैमा अर्को आवाज सुनिन्छ, ‘ए नउभिनुस् त, त्यसरी बीच बाटोमा ।’

स्वयंंसेवकहरू कराइरहन्छन् उस्तै गरी । त्यसो त भाङ खाएका युवाहरूको आवाज पनि उस्तै सुनिन्छ । ‘पार्वती खोइ पार्वती.....!’ छेवैमा अर्को थरी कराइरहेको देखिन्छ, ‘शिव नाचेर भाङ कहाँ फुल्छ र हाँगै भाचेर ।’

भजन मण्डलीको बीचमा पसेर एक बालक कराउँदै भन्छन्, ‘दिदी क्यान्डी किनिदिनु न ।’ कोही कसैलाई कसैको मतलब छैन, सबै मस्त छन् आफ्नै धुनमा, आफ्नै काममा ।

यस्तै छ आजको पाशुपतक्षेत्रको माहौल । भक्तिभाव, श्रद्धाभाव, सेवाभाव, व्यापारभाव सबै एकै स्थानमा देख्न पाइन्छ । कारण आज हिन्दु धर्मावलम्बीहरूका आराध्यादेव महादेवको विशेष दिन अर्थात् शिवरात्रि ।

शिवरात्रिका दिन बिहानैदेखि मन्दिर दर्शन गर्न आउने दर्शनार्थीहरूको चहलपहल थेगिनसक्नुको छ । तर, यस पटक केही फरक दृश्यहरू पनि देखिएका छन् । गत वर्षहरूमा शरीर प्रदर्शन गर्दै नागा बाबाहरू यत्रतत्र बसिरहेका दृश्य देखिन्थे । तर, यस पटक भने त्यस्ता दृश्य देखिएनन् । मन्दिरको प्रवेशद्वारबाटै लाइनमा भक्तजनहरू उभिएका देखिन्थे भने असक्त वृद्धहरूलाई छुट्टै स्थानको व्यवस्था गरिएको रहेछ ।

हिन्दुहरूको आराध्यदेव महादेवको दिनमा हिन्दु मात्र नभएर अन्य धर्मावलम्बीहरूको पनि उपस्थिति बाक्लै देखिन्थ्यो । त्यहाँ आउने हरेक व्यक्तिमा फरकफरक उद्देश्य देखिन्छन् ।

कोही भक्तिभावले मन्दिर दर्शन गर्न भोकतिर्खा नै नभनी बिहानैदेखि लाइनमा देखिन्थे भने कोही भोकतिर्खा नै नभनी तिनै घण्टौँ लाइनमा बस्ने दर्शनार्थीहरूलाई सेवा गर्न लागिपरेका देखिन्थे । जुस, फलफूल लाइनमा बस्ने भक्तजनलाई मात्र नभएर पैदलयात्रुलाई पनि बाँडिरहेको दृश्य देख्न सकिन्छ ।

पाशुपत क्षेत्रको चारै स्थानबाट लाइनमा रहेका भक्तजनहरू आउनेजानेको भीडभाड छ । यत्रतत्र फुलले सजिएका स्वागतद्वारहरू जहाँ बसेर फोटो खिचाउनेको भीड उस्तै । यसरी पाशुपत क्षेत्रको दृश्य नियाल्दै जाँदा बागमती नदीपारिको मृगस्थली क्षेत्रको वातावरण भने बेग्लै देखिन्थ्यो ।

वारि भक्तजनहरूको भजन, काम्दै फूल र अक्षताको थाली बोकेको दृश्य देखिन्थ्यो भने पारिपट्टि नशामा उन्मत्त भएकाहरूको ठूलै हुल देखिन्थो । जोकोहीले अनुमान गर्न सक्छन् कि त्यहाँ शिवको प्रसाद भन्दै गाँजा भाङहरू खानेको हुल छ ।

मृगस्थली जाने सिँढीमा लहरै बसेका छन् भर्खरै १६ ÷१७ वर्ष कटेकाजस्ता देखिने बाबाहरू । जो टीका लगाइदिन आतुर देखिन्छन् । प्रसादमा भाङ दिँदै । उनीहरू टीका र प्रसादको राम्रै व्यापार गरिरहेका देखिन्थे ।

छेवैमा अचम्मको अर्को दृश्य पनि थियो । एक बाबा जो आफू भारतको गुहाटीबाट आएको बताउँदै बाबाहरूका नाङ्गा तस्वीर बेच्नमा ब्यस्त देखिन्थे । ‘एउटा फोटोको २० रूपैयाँ, लिनुस्, आउनुस् बाबाको फोटो’ भन्दै कराइरहेका देखिन्थे । भारतीय बताउने उनी नेपाली भने प्रस्टै बोल्दा रहेछन् ।

यसरी एकै स्थानमा फूलदेखि गाँजा–भाङसम्मको व्यापार खुला रूपमा भइरहेको देखिन्थ्यो । त्यही व्यापारमा छन् भक्तजनहरू, अनि त्यहीँ मिसिएका छन् सुरक्षाका निम्ति खटिएका प्रहरी तथा स्वयंसेवकहरू ।