अझै सुल्झिएन घिमिरे–दाहाल मृत्युको रहस्य

A+ A A-

केही महिना पहिला विराटनगरमा भएका दुईवटा शंंकास्पद मृत्यु प्रकरण प्रहरीका लागि चुनौती बनेको छ । घटना भएको लामो समय बितिसक्दासमेत प्रहरीले ती घटनाको तथ्य बाहिर ल्याउन सकेको छैन ।

७ माघमा सिंघिया खोलामा मृत भेटिएका विराटनगर–२ तीनपैनीका लेखापरीक्षक ५० वर्षीय प्रबल घिमिरे र सोही वडाका ७४ वर्षीय पत्रकार जयप्रसाद दाहालको शंकास्पद मृत्यु भएको लामो समय बितिसक्दा प्रहरीले घटनाको सत्यतथ्य बाहिर ल्याउन सकेको छैन ।

दुवै घटनाको प्रकृति हेर्दा हत्या भएको हुनसक्ने आशंका गरिएको छ । साथीहरुसँग खानपीन गर्ने भन्दै घरबाट मोटरसाईकलमा निस्किएका लेखापरीक्षक घिमिरे भोलिपल्ट ७ माघमा घर नजिकैको सिंघिया खोलामा मृत भेटिएका थिए ।

६ गते राती नगरक्षेत्रका विभिन्न होटलमा खानपीन गरी साथीकै कारमा रातको साढे १० बजे मेनरोडस्थित वडा प्रहरी कार्यालय सामुन्नेसम्म आएर प्रबल उत्रिएका थिए ।

त्यहाँबाट पूर्व–उत्तर रहेको घरतर्फ उनी पैदल हिडिरहेको सिसी टिभि फुटेजसमेत भेटिएको छ । तर, त्यस रात घिमिरे घर फर्किएनन् । बरु नजिकैको सिंघिया खोलामा भोलिपल्ट शंकास्पद अवस्थामा उनको शव भेटियो ।

घिमिरेको शंकास्पद मृत्युअघि २२ मंसिरमा विराटनगर–२ स्थित आफ्नै घरमा विभत्स अवस्थामा मृत भेटिएका ७४ वर्षीय जयप्रसाद दाहालको मृत्युको रहस्य पनि अझै खुल्न सकेको छैन ।

काठमाडौं बसोबास गर्दै आएका दाहाल २१ मंसिरमा विराटनगर आएका थिए । दाहाल विराटनगरको घर जग्गा बिक्रीका लागि भन्दै आएका थिए । उनको घरको रेखदेख विराटनगरका राधेश्याम दराकले गर्दै आएका थिए ।

२१ मंसिरको साँझ दराकको घरमा खाना खाएर फर्किएका दाहाललाई २२ मंसिरको बिहान दराकले नै भेट्न आउँदा ढोका नखोलेपछि छिमेकीलाई बोलाएर हेर्दा मृत अवस्थामा भेटिएको भन्दै प्रहरीलाई खबर गरेका थिए ।

सो घटनामा मृतक दाहालको घाँटीमा गहिरो चोट लागेको तथा नजिकै चक्कु भेटिएको थियो भने ग्यासको सिलिण्डर आगो लागेको अवस्थामा भेटिएको थियो ।

प्रहरीले अनुसन्धान जारी राखेको र छिट्टै तथ्य खुल्ने मोरङ प्रहरी प्रमुख प्रहरी उपरीक्षक (एसपी) विश्व अधिकारीले बताए । ‘ती घटनामा हामीले गम्भीर रुपले अनुसन्धान गरिरहेका छौँ । नियमित अनुसन्धानकै क्रममा छौं,’ उनले भने, ‘अब चाँडै सत्य तथ्य बाहीर आउँछ ।’

यी दुई घटनापछि भएको अन्य हत्या प्रकरणलाई प्रहरीले तत्काल खुलासा गर्न सफल भए पनि दाहाल र घिमिरे हत्या प्रकरण भने मोरङ प्रहरीका लागि चुनौतीकै विषय भएको छ ।

प्रकाशित मिति: बिहीबार, फागुन ८, २०७६ १४:३५