कमिसनमा मुछिएपछि प्रधानमन्त्रीले मागे सञ्चारमन्त्री बाँस्कोटाको राजीनामा

कमिसनमा मुछिएपछि प्रधानमन्त्रीले मागे सञ्चारमन्त्री बाँस्कोटाको राजीनामा

A+ A A-

सेक्युरिटी प्रेस खरिदमा कमिसन मागेको अडियो सार्वजनिक भएपछि सञ्चार तथा सूचना प्रविधिमन्त्री गोकुल बाँस्कोटालाई प्रधामन्त्री केपी ओलीले राजीनामा गराउने भएका छन् ।

स्वीस कम्पनीका एजेन्टसंँग कमिसनको बार्गेनिङ गरेको अडियो टेप बाहिर आएको छ ।

सरकारका प्रवक्तासमेत रहेका मन्त्री बाँस्कोटालाई प्रधानमन्त्रीले आजै राजीनामा गराउन लागेको बालुवाटार स्रोतले बताएको छ ।

हिजो राती बाँस्कोटाको कमसिन मागेको अडियो टेप सार्वजनिक भएको थियो ।

ओलीकै निजी निवासमा बस्दै

नेपाल सरकारका सबै मन्त्रीहरू सरकारी निवासमा बस्दै आएका छन् । ललितपुरस्थित सरकारी निवासमा बस्नुपर्ने मन्त्री बाँस्कोटा भक्तपुरको बालकोटस्थित प्रधानमन्त्री ओलीको निजी निवासमा बस्दै आएका छन् । उनी ओलीका सबैभन्दा विश्वासपात्र मानिन्छन् ।

५ फागुन काभ्रेको धुलिखेल नगरपालिकामा ३४आँै स्थापना दिवसमा सम्बोधन गर्दै प्रधानमन्त्री केपी ओलीले काभ्रे जिल्लाको धेरै प्रशंसा गरेका थिए । उनले भनेका थिए, ‘काभ्रे प्रतिभा जन्माउने ठाउँ हो । प्रतिभा जन्माउने जिल्ला हो । यो कुरा विस्तारै प्रकट हुँदै गएको छ ।’

उनी यतिमा नै रोकिएनन्, प्रशंसा गर्दै भनेका छन्, ‘आज देशमा राजनीतिक तुलो राख्ने हो भने तुलाको एकातिर गोकुल बाँस्कोटा अर्कोतिर अरू सबै भएको छ ।’

अझै प्रशंसा गर्दै प्रधानमन्त्रीले भनेका थिए, ‘सरकारको विरोध गर्नुप¥यो भने गोकुल बाँस्कोटातिर हेर्नेवित्तिकै चुप लाग्ने ।’

उसो त प्रधानमन्त्रीलाई ‘बा’ भन्नेमध्येका एक बाँस्कोटा पनि हुन् । उनै ‘छोरा’लाई राज्यमन्त्रीबाट बढुवा गरेर सरकारका प्रवक्ता बनाएका थिए ओलीले ।

बालुवाटार स्रोतका अनुसार ओलीले उक्त अडियो डेढ महिना पहिला नै सुनेको बताइन्छ । अडियो सुनेको डेढ महिना बित्दा पनि ओलीले बाँस्कोटाको प्रशंसा गर्नु आफैँमा आश्चर्य हो ।

किन लुकायो बालुवाटरले अडियो ?

बालुवाटार स्रोतले अडियो धेरै पहिला प्रधानमन्त्रीसम्म पुगेको बतायो । ‘तर, किन प्रधानमन्त्रीले बाँस्कोटालाई कारवाही गर्नुभएन अथवा राजीनामा माग्नुभएन हामी नै अचम्भित छौँ’, स्रोतले भन्यो ।

भ्रष्टाचार गर्दिनँ र गर्न दिन्नँ भन्ने प्रधानमन्त्रीले आफ्नो विश्वासपात्र रहेका बाँस्कोटालाई किन बचाए ? यो प्रश्न जीवित रहेको स्रोतले बतायो ।

प्रकाशित मिति: बिहीबार, फागुन ८, २०७६ १०:५८