उपत्यकाव्यापी चित्रकलामा प्रकृति प्रथम

A+ A A-

पाँचौं उपत्यकाव्यापी चित्रकला प्रतियोगितामा बाबा बोर्डिङ स्कुलकी प्रकृति राना प्रथम भएकी छन् । रिपुमर्दिनी सैनिक माध्यमिक विद्यालय, बा“सबारीकोे १५ औं वार्षिक तथा अभिभावक दिवसमा आयोजित प्रतियोगितामा १९ विद्यालयका छात्रछात्रालाई उछिन्दै उनी प्रथम भएकी हुन् ।

उपत्यकाका २० विद्यालयका छात्रछात्रा सहभागी भएको प्रतियोगितामा विजेश्वरी ज्ञानमन्दिर सैनिक महाविद्यालयकी आयुष लिम्बु द्वितीय र जेबी स्कुलका सरोज सुनार तृतीय भएका थिए ।

त्यस्तै, विज्ञान प्रदर्शनीतर्फ मोर्गन इन्टरनेसनल कलेज बसुन्धरा प्रथम, दुर्गाभवानी मावि धुम्बाराही द्वितीय, विन्डी हाउस स्कुल बालुवाटार तृतीय र मञ्जरी सेकेन्डरी बोर्डिङ स्कुल, गोल्फुटारले तृतीय स्थान प्राप्त गरेका थिए ।

प्रमुख अतिथि सैनिक श्रीमती संघ अध्यक्ष श्रीमती दीपा थापाले विद्यालयको मुखपत्र ‘रिपुमर्दिनी रिदम’ लोकार्पण गरेकी हुन् । उनले विद्यालयको वेबसाइट र मोबाइल एपसमेतको उद्घाटन गरिन् ।

प्रिन्सिपल लालबहादुर रानाले स्वागत मन्तव्यसहित विद्यालयको शैक्षिक कार्यक्रम र भावी योजनाबारे प्रकाश पारेका थिए । विद्यालयका सम्पर्क अधिकृत सेनानी विनोद चौलागाईंद्वारा प्रधानसेनापति पूर्णचन्द्र थापाको शुभकामना सन्देशसमेत पढेर सुनाइएको थियो ।

प्रमुख अतिथि थापाद्वारा विजेता विद्यार्थीलाई नगद, ट्रफी, मेडल र प्रमाणपत्र प्रदान गरिएको थियो । त्यस्तै, विभिन्न विधामा उत्कृष्ट नतिजा प्राप्त गर्ने विद्यार्थीलाई पुरस्कृत र उत्कृष्ट सेवा गर्ने ६ शिक्षकलाई कदरपत्रद्वारा सम्मान गरिएको थियो ।

सम्पर्क अधिकृत चौलागाईंले भर्खरै सम्पन्न भएका विद्यालयका पूर्वाधार र विद्यालयको भावी योजनाबारे प्रकाश पारेका थिए । कार्यक्रममा सैनिक श्रीमती संघका पदाधिकारीहरू, जिल्ला शिक्षा समन्वय इकाइका प्रतिनिधि, नेपाली सेनाका विभिन्न विभागका प्रतिनिधि र प्रधानाध्यापकहरू उपस्थिति थिए ।

प्रकाशित मिति: बिहीबार, फागुन ८, २०७६ ०९:४९