पुरानो सामसुङ फोन ल्याउनुस्, नयाँ लैजानुस्

तपाईंको सामसुङ स्मार्ट फोन पुरानो त भएको छैन ? यदि पुरानो भएको भए पनि चिन्ता नगर्नुहोस्, अब त्यो पुरानो फोन दिएर नयाँ लिई चलाउन सक्नुहुन्छ । ग्राहकहरूको मागलाई मध्यनजर गर्दै सामसुङ मोबाइलका लागि नेपालको आधिकारिक विक्रेता आईएमएसले यस्तो सुविधा ल्याएको हो ।

आईएमएसले आफ्ना स्मार्ट शोरूमहरूमा सामसुङ फोन साटासाट सुविधा ल्याएको जानकारी दिएको छ । कम्पनीका अनुसार ग्राहकहरूले अब आफ्नो पुराना सामसुङ मोबाइल आईएमएसका आउटलेटहरूमा गई साटेर नयाँ उचित मूल्यमा प्राप्त गर्न सक्नेछन् ।

कम्पनीले पुरानो स्मार्टफोनको उचित मूल्याङ्कन वेब पोर्टलमार्फत दिने र त्यसका लागि फाराम भरेर आफूले चाहेको मोडलको फोन छान्नुपर्नेछ । त्यसपछि ग्राहकहरूले आफ्नो पुरानो सामसुङ स्मार्टफोनको सट्टामा नयाँ सामसुङ स्मार्टफोन लिन सक्नेछन् ।

यस्ता सुविधाहरू कम्पनीका आउटलेटहरु न्यूरोड पाको, रोयल सिङ्घी होटेल आर्केड कमलादी, पिपुल्स प्लाजा खिचापोखरी, अल्का अस्पतालनजिक, जावलाखेल, शेर्पा मल, दरबारमार्ग, बौद्ध पिपलबोटचोकनजिकबाट लिन सकिने कम्पनीले जनाएको छ ।

आईएमएसका अध्यक्ष दीपक मलहोत्राले भने, ‘हाम्रो लक्ष्य सधैँ हाम्रा मूल्यवान् ग्राहकहरूलाई उहाँहरूका अनुरोध र सुझावहरूमाथि ध्यान दिएर उत्तम ग्राहक अनुभव प्रदान गर्नु हो । एउटा प्रमुख अनुरोध भनेको एक्सचेन्ज सुविधा प्रदान गर्नु हो, जसको कारणले हामीले यस सुविधा यो नयाँ वर्ष २०२० मा सुरु गर्ने निर्णय गर्‍यौँ ।’