प्रदेश सरकारका दुई वर्ष : सत्ता पक्ष नै छैन सन्तुष्ट

A+ A A-

सुदूरपश्चिम सरकार गठन भएको २ वर्ष पूरा भएको छ । ५ फागुन २०७४ मा प्रदेशका मुख्यमन्त्री र ६ जना मन्त्रीहरूले पद तथा गोपनीयताको शपथ लिएका थिए । ६ फागुनमा मुख्यमन्त्रीसहित मन्त्रीहरूले पदभार ग्रहण गरेका थिए ।

निकै उत्साहका साथ मन्त्रालय सम्हालेका मन्त्रीहरूले सुरुवाती चरणमा ठूलै आश्वासन बाँडे । प्रदेश सरकारको ठीक २ वर्षे कार्यकालमा १ मन्त्री फेरिएका छन् भने एक राज्यमन्त्रीले राजीनामा दिइसकेका छन् ।

के भन्छ प्रतिपक्ष ?

प्रदेश सरकारको दुईवर्षे कार्यकाल प्रतिपक्षीको नजरमा शून्यजस्तै भएको छ । प्रदेशसभामा रहेका प्रतिपक्षी दलले सरकारबाट अपेक्षा गरेका कुनै काम हुन नसकेको बताएको छ ।

दुईवर्षे अवधिमा धेरै काम सम्पन्न गरिसक्नुपर्ने प्रदेश सरकारले एउटा पनि देखाउनलायक काम नगरेको प्रतिपक्षीको आरोप छ । प्रदेशसभामा प्रमुख प्रतिपक्षी दल नेपाली कांग्रेसका नेता डा.रणबहादुर रावल सरकारको दुईवर्षे कार्यकाल असफल रहेको बताउँछन् ।

दुई वर्षमा प्रदेशको मुहार फेरिनुपर्नेमा हालसम्म एउटा देख्ने गरी काम नगरेको उनको आरोप छ । प्रदेशसभाले ३३ वटा कानुन निर्माण गरे पनि तिनको कार्यान्वयन हुन नसकेको रावलले बताए । प्रदेशमा शान्ति सुरक्षासमेत कायम गर्न नसक्नु प्रदेश सरकारको ठूलो कमजोरी भएको नेता रावलले बताए ।

असारमा विकास बजेट खर्च गर्ने परिपाटी निम्त्याएर कार्यकर्ता पोस्ने कामबाहेक कुनै प्रगति हुन नसकेको उनको आरोप छ । पाँच वर्षका लागि बनेको सरकारले अझै ३ वर्ष यसरी नै चलाएमा संघीयता नै धरापमा पर्ने नेता रावलले बताए ।

सत्तापक्ष पनि असन्तुष्ट

प्रतिपक्षीको नजरमा सुदूरपश्चिम प्रदेश सरकार असफल देखिएका बेला सत्तापक्ष पनि सन्तुष्ट छैन । सरकार कानुनको कार्यान्वयन विषयमा होस्, बजेट खर्चको विषयमा होस्, ढिला गरिरहेको सत्तापक्षका सांसदहरूले बताएका छन् ।

सरकारले धेरै काम राम्रा गरे पनि अपेक्षाअनुसार काम हुन नसकेको सत्तापक्षी दल नेपाल कम्युनिस्ट पार्टी नेकपाका प्रमुख सचेतक तारा लामा तामाङले बताए । सरकारबाट २ वर्षे कार्यकालमा जनताले धेरै आशा पाएको उनले व्यंग्य गरे ।

प्रवक्ता भन्छन्– २ वर्ष उपलब्धिमूलक

प्रदेश सरकारले भने विभिन्न बाधा अड्चनका कारण पनि प्रदेश सरकारले थुप्रै काम गरेको दाबी गरेको छ । संवैधानिक दायित्व र कानुनले दिएका जिम्मेवारी पूरा गरेको प्रदेश सरकारले जनाएको छ ।

प्रदेशसभाले राजधानी र नामांकन गर्नु, गौरवका योजना बनाउने कुरा, खेलकुदका काममा जोडलगायत थुप्रै काममा प्रदेश सरकारले जोड दिएको प्रदेशका आन्तरिक मामिला तथा कानुनमन्त्री प्रकाशबहादुर शाहले बताए ।

पर्यटनका क्षेत्रमा प्रचारप्रसार, कृषिको विकासका लागि मुख्यमन्त्री कृषि कार्यक्रमअन्तर्गत ३ वर्षभित्र सुदूरपश्चिम प्रदेश सरकारलाई कृषिमा आत्मनिर्भर बनाउने प्रयास गरिरहेको उनले बताए ।

प्रदेश सरकारले स्वायत्त तरिकाले काम गर्न नपाइरहेको अवस्थामा पनि थुप्रै उपलब्धि हासिल भएको मन्त्री शाहको दाबी छ ।

पूरै कार्यकाल कुर्नुस् : मुख्यमन्त्री भट्ट

मुख्यमन्त्री त्रिलोचन भट्टले प्रदेश सरकार बनेको २ वर्षको अवधिमा भए गरेका कामका बारेमा सदनमा सम्बोधन गरेका छन् । भट्टले नयाँ व्यवस्थामा जनताका अपेक्षा पूरा गर्नुपर्ने भएकाले विभिन्न समस्याका बाबजुद आफू अगाडि बढेको बताए ।

त्यसमा सत्ता पक्ष, प्रतिपक्ष र आमनागरिक तथा सञ्चार माध्यमले सहयोग गरेको उनले बताए । ५० प्रतिशत कर्मचारीको जनशक्ति पदपूर्ति हुन नसकेका कारण प्रदेशमा काम जनभावनाअनुरूप काम गर्न नसकिएको भट्टले बताए ।

संघबाट नै कानुन बनाउन ढिलाइ भएका कारण प्रदेश सरकारले आफ्नो कानुन बनाएर काम अघि बढाउन नसकेको उनको दाबी छ ।

यद्यपि प्रदेश सरकार जनभावनका लागि आफ्नो लक्ष्यअनुरूप काम गर्न तत्पर रहेको उनको भनाइ छ । प्रदेशवासीको सहयोग रहे सरकारको लक्ष्य पूरा हुने उनको दाबी छ ।

उनले भौतिक पूर्वाधारतर्फ ६३ किलोमिटर सडक कालोपत्रे भएको जानकारी दिए ।

जनताको मिश्रित प्रतिक्रिया

प्रदेश सरकारको २ वर्षको अवधिलाई लिएर सत्ता पक्ष र प्रतिपक्षबीच तर्क वितर्क भइरहेका बेला नागरिक स्तरबाट भने मिश्रित प्रतिक्रिया आएको छ ।

केहीले सरकारले जन–अपेक्षाअनुसारका काम नभएको बताएका छन् भने केहीले विकास महसुस भइरहेको प्रतिक्रिया दिएका छन् ।

गौरीगंगा नगरपालिका–९, शंकरपुरका प्रेम जोशीले प्रदेश सरकार गठन भएको २ वर्ष बिते पनि जनअपेक्षाअनुसारका काम नभएको गुनासो गरे । विशेषगरी चुनावी बाचा कार्यान्वयन गर्न सरकार पछि हटेको उनको भनाइ छ ।

गौरीगंगा नगरपालिका–११ का प्रेम चौधरी भने प्रदेश सरकारको २ वर्ष उपलब्धिमूलक देखिएको बताए । प्रदेश सरकारको पहलमा सुदूरपश्चिममा आर्थिक र भौतिक विकास देखिएको बताए ।

यद्यपि बजेट कार्यान्वयन र सरकारले चुनावी घोषणापत्रअनुसार काम गर्नुपर्ने उनको भनाइ छ । बाजुराका मदन जोशीले २ वर्षको अवधिमा प्रदेश सरकार रिबन काट्नमा मात्रै ब्यस्त भएको महसुस भइरहेको बताए ।

प्रदेश सरकारका मुख्यमन्त्री र मन्त्रीहरूले कार्यकर्ता र आसेपासेलाई निकटकालाई पोस्नमै ब्यस्त भएको तर्क उनको छ ।

धनगढीका स्थानीय ठन्डी राम तिमिल्सेना सरकारले सुदूरपश्चिमको विकासका लागि काम गरिनै रहेको बताए । एक्लो सरकार र मन्त्रीले चाहँदैमा विकास नहुने बताउँदै उनले सरकारका काममा सरोकारवालाहरू र सर्वसाधारणले पनि हातेमालो गर्नुपर्ने धारणा राखे ।

शिक्षाविद् यसो भन्छन्

यस क्षेत्रका शिक्षाविदहरूको भने प्रदेश सरकार जनअपेक्षाअनुसारको काम गर्न नसकेको तर्क छ । शिक्षाविद् शिवहरि मुडभरी प्रदेश सरकारले २ वर्षको अवधिमा महसुस हुने गरी काम गर्न नसकेको बताए ।

‘गणतन्त्रपछि प्रदेश सरकारहरूको प्रावधान हामीले लागू गर्‍याैँ, यो संक्रमणकालीन अवस्था थियो, त्यो अवस्था अझै हटेजस्तो लाग्दैन,’ उनले भने, ‘सरकारको २ वर्षमा मैले कुनै परिवर्तन पाइनँ तर सरकारप्रति उत्साह भए पनि त्यो कार्यान्वयनमा थियो ।’

अझै पनि प्रदेश सरकारसँग ३ वर्षको अवधि बाँकी रहेकाले विकासको गति बढाउनुपर्ने उनको भनाइ छ । प्रदेश सरकारले अब सुदूरपश्चिमको विकासका लागि गुरुयोजना निर्माण गरी काम गर्नुपर्ने उनले बताए ।

संघीयतापछि केन्द्रिकृत शासन व्यवस्थाको अन्त्य गरी गाउँगाउँमा सिंहदरबार आउने नागरिकले अपेक्षा गरेका थिए । तर, अझै पनि अधिकांश आमनागरिक भने आधारभूत आवश्यकताबाट नै वञ्चित छन् ।

सुदूरपश्चिम प्रदेशका बाजुरा, बझाङ, अछाम र दार्चुला जिल्लाभित्रका विकट बस्तीका नागरिकलाई दुई छाक टार्न पनि धौ–धौ परिरहेको छ । यस्तो अवस्थामा सरकारले व्यवस्था परिवर्तनभन्दा देश र जनताको अवस्था परिवर्तनको बाटो अपनाउनुपर्ने आमनागरिकको सुझाव छ ।

प्रकाशित मिति: बुधबार, फागुन ७, २०७६ ११:२०