उपमेयरको हर्कतः भत्ता नदिएको भन्दै स्वास्थ्य प्रमुखलाई धम्की, डरले अनमीले जागिर नै छोडिन्

उपमेयरको हर्कतः भत्ता नदिएको भन्दै स्वास्थ्य प्रमुखलाई धम्की, डरले अनमीले जागिर नै छोडिन्

A+ A A-

बझाङको बुङल नगरपालिकाकी उपमेयर मीना जागरीले स्वयंसेविकाले भत्ता नपाएको भन्दै कफलसेरी स्वास्थ्य चौकीका प्रमुख शिवराज खडायतलाई गाली गरेकी छन् ।

गत कात्तिक महिनामा भिटामिन ए खुवाएबापतको स्वयंसेविकालाई दिइने भत्ता नदिएको भन्दै खडायतलाई गाली गरेको अडियोसमेत सार्वजनिक भएको छ ।

करिब १२ मिनेट लामो संवादमा उपमेयर जागरीले उपमेयर को हो भन्ने कुरा भेटमा चिनाइदिने धम्की दिएकी छन् । कफलसेरी स्वास्थ्य चौकीका प्रमुख खडायतले ‘मेरो कुरा सुन्नुस्’ भन्दैगर्दा उपमेयर जागरीले ‘तेरो कुरा सुन्नु छैन...छोरा’सम्म भन्न भ्याएकी छन् ।

सबै स्वयंसेविकाको पैसा दिइसकेको भए पनि तपाईंलाई नभेटेका कारण पैसा दिन नसकेको भन्दा पनि उपमेयर जागरीले आक्रोशित गाली गरेकी हुन् ।

कुराकानीकै सिलसिलामा उपमेयर जागरीले ‘भुक्तानीका बेला किर्ते दस्तखत गर्ने कुन कानुनले दिएको छ ?’ भनेकी छन् तर उपमेयरलाई दोहोरो सुविधा लिन पाउने कानुनमा छैन भन्नेसमेत थाहा छैन ।

स्वास्थ्य चौकी प्रमुख खडायतले माफी माग्दा पनि उनको आक्रोश रोकिएन । साविक कफलसेरी गाउँ विकास समितिकी स्वयंसेविका रहेकी उपमेयर जागरी हाल बुङल नगरपालिकाकी उपमेयर हुन् । स्वयंसेविकाको पदबाट राजीनामा नदिइ उनी उपमेयर भएकी हुन् । हाल पनि उनी स्वास्थ्य चौकीले स्वयमसेविकालाई दिने भत्ता लिँदै आएकी छन् ।

उपमेयरको धम्कीपछि अनमीले जागिरै छोडिन्

घरमा सुत्केरी भएकी महिलालाई सुत्केरी भत्ता नदिएको भन्दै बङल नगरपालिकाकी उपमेयर मीना जागरीले कफलसेरी स्वास्थ्य चौकीमा कार्यरत अनमी निरुपति चौधरीलाई अभद्र व्यवहार गरेकी छन् ।
नियमानुसार घरमा सुत्केरी भएकी महिलालाई सुत्केरी भत्ता दिन नमिल्ने भनेपछि उपमेयर जागरीले अनमी चौधरीलाई तथानाम गाली गरिन् । उपमेयरको धम्कीपछि अनमी निरुपति चौधरीले पत्र लेख्दै जागिर छोडेर हिँडेको स्वास्थ्य चौकी प्रशासनले बताएको छ ।

अनमी चौधरी विगत ३ वर्षदेखि करारमा काम गर्दै आएकी थिइन् । उपमेयर जागरी स्वास्थ्य संस्थामै पुगेर अनमी चौधरीमाथि खनिएकी हुन् । एउटा अडियोमा उपमेयर जागरीले अनमी चौधरीलाई ‘बाउकी छोरी होस भने जागिर छोडेर जा’ भनेको प्रष्ट सुनिन्छ ।

अगाडिको समयमा व्यावहारिक रूपमा घरमा सुत्केरी भएकी महिलालाई पनि सुत्केरी भत्ता दिइँदै आएको सो अडियोबाट प्रष्ट हुन्छ । गरिब तथा आर्थिक अवस्था नाजुक भएकालाई व्यावहारिक रूपमा दिँदा फरक नपर्ने भन्दै उपमेयर जागरीले चौधरीलाई आग्रह गरेको तर अनमी चौधरीले दिन नमिल्ने बताएपछि उपमेयर जागरीले जागिरै छोडेर जान धम्क्याएको प्रष्ट सुन्न सकिन्छ ।

अगाडिको आर्थिकको जिम्मा आफूलाई थाहा नभएको भन्ने अनमीको जवाफमा उपमेयर जागरीले ‘मसँग बढी फुर्ती लगाउने ? तेरो बाउले दिएको उपमेयर हो’ भन्दै ‘अहिल्यै जागिर छोडेर गइहाल’ लगायतका कुरा गरेकी छन् ।

यस विषयमा जानकारी लिन खोज्दा अनमी चौधरीको फोन उठेन ।

उता उपमेयर जागरीसँग जानकारी लिँदा स्वास्थ्य क्षेत्र सुधारका लागि सामान्य भनाभन मात्र भएको बताइन् । बाहिर भन्नेले आफ्नो बेइज्जत गर्न खोजेको भन्दै आफ्नो नाम जोडेर अनावश्यक हल्ला फैलाएको दुःखेसो पोखिन् ।

उपमेयर मीना जागरीले आफूहरूको सामान्य भनाभन भएको र स्वास्थ्य चौकी व्यवस्थापन समितिको बैठकले सबै कुरा मिलाइसकेको बताइन् । अनमी चौधरीलाई जागिर नछोडन आफूले फोन गरेको पनि उपमेयरको भनाइ छ ।

उनले भनिन्, ‘जागिर छोडेर गएको भन्ने सुनेकी छु । राजनीतिक प्रतिशोधका कारण विपक्षीले नानाथरी आरोप लगाएर मलाई बदनाम गर्न खोजेका छन् । त्यसो हुँदा आक्रोशमा आएर मैले केही नराम्रो शब्द बोलेको पनि हुन सक्छु ।’

स्वास्थ्य चौकी व्यवस्थापनसमक्ष माफी

उपमेयर जागरीले अनमी चौधरीलाई जागिरबाट छोड्न बाध्य बनाएपछि कफलसेरी स्वास्थ्य चौकीको व्यवस्थापन समितिको आकस्मिक बैठक बसेको थियो । बैठकमा उपमेयर जागरीले गल्ती स्वीकार गरेकी छन् । तर यस्ता गल्तीलाई सामान्य रुपमा लिन नसकिने स्वास्थ्यकर्मी र बुङलवासीको भनाइ छ ।

सुन्नुहाेस अडियाे