रेशमसहित ११ जना बन्दीको रिहाइको माग राख्दै धनगढीमा प्रदर्शन

A+ A A-

२०७२ सालको टीकापुर घटनापछि सेलाएको थारू आन्दोलन फेरि सुरु भएको छ । फागुन १ गतेदेखि धनगढीमा आमरण अनशन र प्रदर्शन जारी छ ।

संविधान जारी हुनुअघि २०७२ भदौमा उत्कर्षमा पुगेको थारू आन्दोलन टीकापुर घटनापछि सेलाएको थियो । तर, टीकापुर घटनाका राजबन्दीहरूलाई सरकारले धरकपड गरी फसाएको भन्दै आन्दोलन थालिएको हो ।

सांसद रेशम चौधरी र कैलाली कारागारमा रहेका ११ जना टीकापुरका बन्दीको रिहाइको माग गर्दै धनगढीमा आमरण अनशन जारी छ । धनगढीमा दिनहुँ प्रदर्शन, नाराबाजी र कोणसभा भइरहेका छन् ।

आन्दोलनमा रहेको थरूहट/थारूवान् राष्ट्रिय मोर्चाले सोमबार धनगढीमा विरोध प्रदर्शन गरेको छ । मोर्चाले धनगढीको क्याम्पस चोकदेखि एलएन चोकसम्म र्‍यालीको आयोजना गरी विरोध जनाएको हो ।

र्‍यालीपश्चात् उनीहरूले एलएन चोकमा विरोध सभाको आयोजना गरेका थिए । विरोध सभाका कारण केही समय सडक अवरुद्ध भएको थियो ।

सभालाई सम्बोधन गर्दै थरूहट/थारूवान राष्ट्रिय मोर्चाका केन्द्रीय प्रवक्ता मीनराज चौधरीले प्रदेश सरकारले पनि अनशनरत मोर्चाका संयोजक लक्ष्मण थारूको स्वास्थ्यप्रति चासो नदिएको आरोप लगाए । उनले सांसद रेशम चौधरीलगायत कैलाली कारागारमा रहेका ११ जना टीकापुरका जेल बन्दीको निःशर्त रिहाइको माग गरे ।

थरूहट प्रदे लगायतका १४ बुँदे माग पूरा नभए आन्दोलनलाई थप सशक्त बनाउने उनले चेतावनी पनि दिए ।

आन्दोलनको पाँचौँ दिन बित्दा पनि सरकार मागप्रति गम्भीर नभएको भन्दै पूर्वसांसद कृष्णकुमार चौधरीले आक्रोश पोखे ।

टीकापुर घटनाका राजबन्दीहरूको रिहाइ र संविधान संशोधन गरी थरूहट प्रदेश कायम गरिनुपर्ने आफूहरूको माग रहेको भन्दै उनले समयमै राज्यको ध्यान नगए आन्दोलनले हिंसात्मक रूप लिन सक्ने चेतावनी दिए ।

थरूहट/थारूवान् कैलाली संयोजक माधव चौधरीले पश्चिम नेपालका थारू समुदायलाई ७ प्रदेशको संरचना अमान्य भएको बताए । तराईको थारू बाहुल्य क्षेत्रको छुट्टै थरूहट/थारूवान् क्षेत्र घोषणा गरी अलग्गै प्रदेशको माग आफूहरूको रहेको उनको भनाइ छ । सरकारले आफ्ना माग सम्बोधन नगर्दासम्म आफ्नो आमरण अनशनलगायतका आन्दोलन जारी रहने उनले बताए ।

नेता रेशम चौधरीसहित ११ जना जेलबन्दीको रिहाइको माग गर्दै लक्ष्मण थारू विगत ५ दिनदेखि धनगढीमा आमरण अनशनमा छन् ।

बन्दीको रिहाइ गर्नुपर्ने, टीकापुर घटनाबारे सत्यतथ्य छानबिन गर्न पूर्वन्यायाधीश गिरीशचन्द्र लाल नेतृत्वको न्यायिक समिति, गृह मन्त्रालयद्वारा गठित अनुसन्धान विभागका पूर्वप्रमुख देवीराम शर्माको संयोजकत्वमा गठित छानबिन समितिको प्रतिवेदन र सर्वदलीय संसदीय समितिको प्रतिवेदन सार्वजनिक गर्नुपर्नेलगायत माग राख्दै मोर्चा आन्दोलनमा छ ।

आन्दोलनमा आदिवासी जनजाति महासंघ, मिसन अम्बेडकर नेपाल, खसान सङ्घर्ष समिति, खम्बूवान राष्ट्रिय मोर्चा, संघीय लोकतान्त्रिक मञ्च, नेपाल राष्ट्रिय पार्टी, संयुक्त खस क्षेत्री नेपाललगायत संघसंस्थाले ऐक्यबद्धता जनाएका छन् ।

टीकापुर घटनामा पक्राउ परेकामध्ये छुटेका लक्ष्मण चौधरीसहितका १५ जनाले फेरि थारूको आन्दोलनको नेतृत्व लिएका छन् । जेलबाट छुटेलगत्तै थारूहरूको भेला, अन्तक्र्रियामा सक्रिय भएका लक्ष्मण थारूले थरूहट/थारूवान् राष्ट्रिय मोर्चा गठन गरेर आन्दोलनको सुरुवात गरेका हुन् ।

५ भदौ २०७२ को टीकापुर घटनामा प्रहरी वरिष्ठ उपरीक्षक लक्ष्मण न्यौपानेसहित ८ सुरक्षाकर्मी र १ दुधे बालकको ज्यान गएको थियो । टीकापुर घटनापछि त्यसका योजनाकारको आरोप लागेका रेशम चौधरी फरार भए भने नेपालमा फेला परेका नेता लक्ष्मण चौधरीसहितका २६ जनालाई कारागार पठाइएको थियो ।

त्यसपछि भएको संसदीय निर्वाचनमा टीकापुर क्षेत्रबाट चुनाव जितेका रेशम चौधरी काठमाडौंको डिल्लीबजार कारागारमा छन् भने टीकापुर घटनामा पक्राउ परी जेल चलान भएका २६ जनामध्ये ११ जना अझै छुटेका छैनन् ।

प्रकाशित मिति: सोमबार, फागुन ५, २०७६ १८:२३