एमसीसीबारे भीम रावलकाे खुलासा : हामीले दर्जनभन्दा बढी सहायक सम्झाैता फेला पार्‍याैँ

एमसीसीबारे भीम रावलकाे खुलासा : हामीले दर्जनभन्दा बढी सहायक सम्झाैता फेला पार्‍याैँ

A+ A A-

सत्तारुढ नेपाल कम्युनिस्ट पार्टीका स्थायी कमिटी सदस्य भीम रावलले मिलेनियम च्यालेञ्ज कर्पोरेसन (एमसीसी)बारे अनाधिकृत रूपमा नबोल्न शीर्ष नेतृत्वलाई आग्रह गरेका छन् । पार्टी केन्द्रीय समितिद्वारा गठित कार्यदलका सदस्यसमेत रहेका रावलले एमसीसीबारे अध्ययन भइरहेकाले यसबारे जथाभावि बाेल्दै नहिँड्न शीर्ष नेताहरुलाई आग्रह गरेका हुन् ।

नेकपाको दोस्रो पूर्ण केन्द्रीय समिति बैठकले गम्भीर विषयमा छलफल गर्ने अधिकार समितिलाई दिएको उल्लेख गर्दै रावलले केन्द्रीय समिटीको कार्यादेश विपरीत कुनै पनि व्यक्तिले अन्यथा कुरा गर्‍यो भने त्यो औचित्यहीन हुने बताए ।

केन्द्रीय समितिले दिएको अधिकारअनुसार आफूहरूले एमसीसी सम्झौता र योसँग जोडिएका विषयमा छलफल गरिरहेकाे भन्दै एमसीसीका सम्बन्धमा निर्णय सुनाउने अधिकार केन्द्रीय कमिटीले कसैलाई नदिएको उनले बताए ।

उनले भने, ‘नेकपाको पूर्ण बैठकबाट कार्यदल गठन हुने निर्णय बमोजिम गम्भीर विषयमा छलफल गर्ने कार्यादेश प्राप्त भएको छ । कार्यादेशलाई कुनै पनि व्यक्तिले अन्य अर्थ लगाएर कुरा गर्‍यो भने त्यो औचित्यहीन हुन्छ ।’

कार्यदलले समेत छलफलको समयमा सार्वजनिक अभिव्यक्ति नदिने विषयमा आचारसंहिता बनाएको उनले जानकारी दिए । कार्यदलले सुझाव र निष्कर्षसहित प्रतिवेदन बुझाउने भएकाले केन्द्रीय समितिको कार्यादेशविपरीत अभिव्यक्ति दिनु भनेको केन्द्रीय कार्यसमितिको अपमान गरेको ठहरिने रावलकाे बुझाइ छ ।

दर्जनभन्दा बढी सहायक सम्झाैता फेला पार्‍याैं

रावलले संसदमा प्रस्तुत भएकाबाहेक अन्य दर्जन भन्दा बढी सम्झौता पनि कार्यदलले फेला पारेको खुलासा गरे । अहिलेसम्म संसदमा प्रस्तुत भएकोबाहेक दर्जन बढी सम्झौता फेला परेको र अझै अरु पनि हुन सक्ने उनले बताए । संसदमा प्रस्तुत भएकोबाहेक अन्य सम्झौताहरूको विषयमा आचारसंहिताका कारण बोल्न नमिल्ने उनले बताए ।

कार्यदलको सयम १० दिनका लागि थप गरिएको छ । ‘थपिएको १० दिनमा प्रतिवेदन तयार हुन्छ ?’ भन्ने प्रश्नमा रावलले भने, सम्झौताहरूको अध्ययन गर्नुपर्ने भएकाले समथ थप गरिएको हाे र तोकिएको समयभित्रै प्रतिवेदन तयार हुन्छ भन्ने मलाइ लाग्छ ।

पहिले जानकारीमा नआएका कुराहरु पनि अध्ययनका क्रममा आएकाले समथ लागेको उनकाे भनाइ छ ।

प्रकाशित मिति: आइतबार, फागुन ४, २०७६ १८:३५