३ एआईजीका लागि ६ डीआईजीको दौड

A+ A A-

गत बुधबार नेपाल प्रहरीले २७औँ प्रहरी प्रमुख पायो । २६औँ प्रहरी महानिरीक्षक (आईजीपी) सर्वेन्द्र खनालले ३० वर्षे सेवा अवधिका कारण मंगलबार अवकास पाएपछि २७औँ प्रहरी प्रमुखमा तत्कालीन डीआईजी ठाकुरप्रसाद ज्ञवाली नियुक्त भएका हुन् ।

विवादरहित रूपमा आईजीपी नियुक्त गरेको सरकारलाई अतिरिक्त प्रहरी महानिरीक्षक (एआईजी) बढुवामा भने सकस भएको छ । अहिले ३ जना एआईजीका लागि ६ जना डीआईजी प्रतिस्पर्धामा छन् ।

आईजीपी खनालसँगै ३ एआईजी र १७ डीआईजीले मंगलबार एकसाथ अवकास पाएका थिए । तीनै जना एआईजीले सँगै अवकास पाएपछि हाल नेपाल प्रहरी एआईजीविहीन छ । एआईजी बढुवा नहुँदा डीआईजी बढुवा हुने बाटो पनि बन्द भएको छ ।

यी हुन् एआईजीका दाबेदार

३ जना एआईजीका लागि ६ डीआईजी प्रतिस्पर्धामा छन्, जसमध्ये २ जना आईजीपी ठाकुरप्रसाद ज्ञवालीकै ब्याचका डीआईजी छन् । तारिणी लम्साल र सूर्य उपाध्याय आईजीपी ज्ञवालीका ब्याचका हुन् ।

उनीहरू दुवै जना स्वाभाविक रूपमै एआईजीका दाबेदार हुन् । त्यसैगरी उनीहरूभन्दा एक ब्याचमुनिका डीआईजीहरू हरिबहादुर पाल, शैलेश थापा क्षेत्री, प्रद्युम्न कार्की र निरजबहादुर शाही एआईजी बढुवाका मुख्य प्रतिस्पर्धी हुन् । उनीहरूमध्येबाट ३ जनालाई यही साता एआईजीमा बढुवा गर्ने तयारी सरकारको छ ।

गृह मन्त्रालय स्रोतका अनुसार सोमबार (भोलि) एआईजी बढुवाका लागि गृृहमा आन्तरिक छलफलको कार्यतालिका राखिएको छ ।

गृह स्रोतले भन्यो, ‘आइतबार गृहमन्त्री रामबहादुर थापा (बादल)ज्यू नेपालगञ्ज जाने कार्यातालिका छ । आज उतै बस्नुहुन्छ जस्तो छ, भोलि फर्किएर आएपछि मात्र एआईजी बढुवाको छलफलले ठाउँ पाउँछ ।’

स्रोतका अनुसार एआईजीमा तारिणी लम्साल, हरिबहादुर पाल र शैलेश थापाको नाम चर्चामा छ ।

बढुवासम्बन्धी यस्तो छ व्यवस्था

प्रहरी नियमावली, २०७१ अनुसार एआईजीको बढुवा सिफारिस समितिमा गृह मन्त्रालयका सचिव अध्यक्ष, प्रधानमन्त्री कार्यालयका सचिव सदस्य र आईजीपी सदस्य सचिव गरी ३ सदस्य रहने व्यवस्था छ ।

त्यसरी नै डीआईजीको बढुवा सिफारिस समितिमा गृह मन्त्रालयका सचिव अध्यक्ष, आईजीपी सदस्य र आईजीपीले तोकेको १ जना एआईजी सदस्य सचिव रहने व्यवस्था छ ।

त्यस कारण एआईजी बढुवा नभई डीआईजी बढुवाको बाटो भने बन्द छ । सुदूरपश्चि प्रदेशबाहेक अन्य प्रदेश डीआईजीविहीन छन् ।

प्रदेश प्रहरी प्रमुखमा हाल डीआईजी रहने व्यवस्था छ ।

प्रकाशित मिति: आइतबार, फागुन ४, २०७६ १४:५२