प्रदेश १ मा विदेशी लगानी भित्र्याउन सरकार सफल भएको छ: मुख्यमन्त्री राई

A+ A A-

प्रदेश नम्बर १ का प्रदेश प्रमुख सोमनाथ अधिकारी प्यासीले प्रदेश सरकारले दुई वर्षको छोटो समयमा जनताको मन जित्न सफल भएको बताएका छन् ।

विराटनगरस्थित मुख्यमन्त्री कार्यालयपरिसरमा आज बिहान आयोजित प्रदेश सरकारको दोस्रो वार्षिकोत्सव कार्यक्रममा प्रदेश प्रमुख प्यासीले त्यस्तो धारणा राखेका हुन् ।

उनले शान्ति सुरक्षा, विकास निर्माण, सुशासन तथा समृद्धि कायम गर्न प्रदेश सरकार सफल भएको बताए । उनले आगामी दिनमा पनि सरकारले आफ्ना कामकारबाहीलाई प्रभावकारी रूपमा अगाडि बढाउँदै जानुपर्नेमा जोड दिए ।

प्रदेश १ सरकारका मुख्यमन्त्री शेरधन राईले सीमित साधन स्रोतका बाबजुद पनि प्रदेश सरकारको २ वर्षे कार्यकाल उल्लेखनीय र परिणाममुखी भएको दाबी गरे । ‘प्रदेश सरकार स्थापनाका बेला हामीले गुन्द्री र पिर्कामा बसेर काम गर्नुप¥यो । थुप्रै समस्याहरू थिए । संघीयता कार्यान्वयन शून्यबाट सुरु गरेका थियौँ । यो अवधिमा हामीले विकासको जग बसाइसकेका छौँ’ उनले भने ।

कानुन निर्माणदेखि जनताका न्यूनतम आकांक्षा पूरा गर्दै विकास निर्माणको कामलाई समेत गति दिन सफल भएको र प्रादेशिक संरचना व्यवस्थित गर्दै स्वदेशी तथा विदेशी लगानी प्रदेशमा भित्र्याउन प्रदेश सरकार सफल भएको मुख्यमन्त्री राईको दाबी थियो ।

उनले प्रदेश सरकारले लगानी सम्मेलन आयोजना गर्न लागेको जानकारी पनि दिए । उनले सो अवधिमा प्रदेश सरकारले २७ किलोमिटर कालोपत्रे, १ सय २९ किलोमिटर ग्रभेल, १० वटा ठूलाठूला मोटरेबल पुल, १५ वटा झोलुङ्गे पुल तथा १ सय १० वटा खानेपानी योजना प्रदेशमाा सम्पन्न गर्नुुका साथै जनता आवास कार्यक्रमअन्र्तगत १ सय ७१ वटा पक्की घरसमेत निर्माण गरेको जानकारी दिए । ३ फागुन २०७४ मा प्रदेश १ सरकार गठन भएको थियो ।

प्रकाशित मिति: शनिबार, फागुन ३, २०७६ १८:३३