विकासमा चरम लापरवाही, केमिकलयुक्त सडक १ महिना पनि टिकेन

A+ A A-

मोरङको कटहरी गाउँपालिका–६ स्थित थलाहा नहरछेउमा निर्माण गरिएको सडक निर्माणमा चरम लापरवाही भएको पाइएको छ । उक्त सडक कालोपत्रे गरेको एक महिना नबित्दै भत्किएको छ ।

प्रदेश–१ को भौतिक पूर्वाधार विकास मन्त्रालयको योजनामा निर्माण गरिएको कालोपत्रे भत्किएर गिट्टी छरपस्ट भएको छ । प्रदेश नम्बर १ को पूर्वाधार विकास कार्यालय मोरङको योजनामा निर्माण गरिएको कालोपत्रे सडकको अवस्था यतिखेर गिटी र बालुवामा सीमित हुन पुगेको छ ।

सरकारी कर्मचारी र उपभोक्ताबीचको मिलेमतोमा कालोपत्रे (केमिकलयुक्त सडक) गर्दा कमसल सामग्री प्रयोग गरिएका कारण एक महिना नपुग्दै भत्किएको स्थानीय अनिलकुमार यादव बताउँछन् । ‘एक महिना नबित्दै पिच सडक भत्किएको छ । कमसल र गुणस्तरहीन काम गरेका कारण चाँडै भत्किएको हो,’ उनले भने, ‘अनुगमनमै मिलेमतो नभई यस्तो हुन सक्दैन । यसरी विकासको काममा पूर्वाधार विकास कार्यालयले बेवास्ता गर्न मिल्छ ?’

यादवले कालोपत्रे निर्माण गर्न खटिएका कर्मचारी र केमिकल निर्यातकर्तालाई कारबाही गर्नसमेत माग गरे । जनताले तिरेको करबाट निर्माण गरिएको सडकको बजेट बालुवामा पानी खन्याएसरह भएको अर्का स्थानीय भानु श्रेष्ठ बताए । उनले सरोकारवाला निकायले तत्काल स्थलगत अनुगमन गर्नुपर्ने बताए । उक्त सडकबाट कटहरी गाउँपालिकाका ६, ७ र ग्रामथान गाउँपालिकाका–४ लगायतका दैनिक १ हजारभन्दा बढी मानिसहरूले विराटनगर आवतजावत गर्छन् ।

लोहन्द्राघाटदेखि एक किलोमिटर उत्तर सूर्य दल गण सैनिक ब्यारेकसम्म कालोपत्रे सडक निर्माण गरिएको थियो । प्रदेश नं. १ को पूर्वाधार विकास कार्यालयको मर्मत शीर्षकबाट ८३ लाख बजेट विनियोजन गरिएको थियो । यो कालोपत्रे सडक केमिकलयुक्त रहेकाले ५ वर्षसम्म टिक्नुपर्ने स्थानीय इन्जिनियर यम प्रधान बताउँछन् ।

इन्जिनियर प्रधानले भने, ‘यो सडक ५ वर्षसम्म टिक्नुपर्ने हो । तर, १ महिना नबित्दै भत्किएको छ । केमिलकल निर्यातकर्ता र इन्जिनियरको मिलेमतोमा कमसल केमिलकल प्रयोग गरिएका कारण यस्तो भएको हो ।’

कालोपत्रे सडकका लागि सीआरबीएटीएट सप्लायर्समार्फत केमिकल आएको उपभोक्ता समितिका अध्यक्ष रन्जन यादवले बताए । उनले उक्त कालोपत्रे सडक समितिमार्फत निर्माण नभएको दाबी गर्दै आफूहरूले ग्राभेल मात्र गरेको बताए ।

‘कालापत्रे गर्ने काम हाम्रो जिम्मामा थिएन । ग्राभेल मात्र उपभोक्ता समितिमार्फत भएको हो,’ उनले भने, ‘हामी नै सडकको उपभोक्ता भएकाले गुणस्तरहीन केमिकल प्रयोग गरिएको विषयमा पूर्वाधार विकास कार्यालयलाई जानकारी गराएका छौँ ।’

कम खर्चमा निर्माण गर्ने उद्देश्यले उक्त केमिकलयुक्त सडक निर्माण गरिएको पूर्वाधार विकास कार्यालय मोरङका डिभिजन इन्जिनियर सुशील श्रेष्ठले बताए ।

‘केमिकलयुक्त सडक बनाए कम्तिमा ५ वर्षसम्म टिक्ने निर्यातकर्ताको दाबी थियो । साढे १३ सय मिटरको उक्त सडकको गुणस्तरमा गुनासो आएपछि तत्काल अनुगमन गरेर केमिकल निर्यातकर्ताको भुक्तानी रोकेका छौँ,’ इन्जिनियर श्रेष्ठले भने, ‘२६ लाख ८१ हजार रुपैयाँ निकासा भइसकेको छ । अब पुनः कालोपत्रे नगरेसम्म बाँकी भुक्तानी हुँदैन ।’

प्रकाशित मिति: शनिबार, फागुन ३, २०७६ १४:५९