म्याग्नेसाइट उद्योग सञ्चालनका लागि स्थानीयले सहयोग गर्ने

A+ A A-

१८ वर्षदेखि बन्द सिन्धुपाल्चोकको लामोसाँघुस्थित नेपाल ओरियन्ट म्याग्नेसाइट उद्योग सञ्चालनका लागि सरोकारवालाले सहयोग गर्ने प्रतिवद्धता व्यक्त गरेका छन् । नेपालकै ठूलो म्याग्नेसाइट उद्योग सञ्चालन गर्ने सन्दर्भमा बिहीबार भएको छलफलमा सहभागी सरोकारवालाले सहयोगको प्रतिवद्धता व्यक्त गरेका हुन् ।

छलफलमा उद्योग बन्द हुनुको कारणबारे समीक्षासँगै सञ्चालनका लागि गर्नुपर्ने कामबारे बहस भएको थियो । छलफलका अधिकांश सहभागीले कारखाना सञ्चालनका लागि केही प्राविधिक सुधारसहितका काम गर्नुपर्ने बताए । कारखाना सञ्चालन हुँदा आम्दानीसँगै ठूलो सङ्ख्यामा स्थानीय युवाले राेजगारी पाउने सरोकारवालाकाे भनाइ छ ।

छलफलमा सिन्धुपाल्चोक क्षेत्र नम्बर १ को प्रदेश २ बाट बागमती प्रदेशसभाका सदस्य एवम् अर्थ तथा विकास समितिका सभापति सुरेश नेपालले कारखानालाई प्रदेश मातहत ल्याउन सके छिटो सञ्चालन गर्न सकिने तर्क गरे । त्यस्तै, छलफलमा सहभागी बलेफी गाउँपालिकाका अध्यक्ष केदार क्षेत्रीले स्थानीय रूपमा सहयोगको वातावरण बन्नुले कारखाना चल्नका लागि सहज वातावरण तयार भएको बताए ।

लिसङखुपाखर गाउँपालिकाका अध्यक्ष कमल नेपालले कारखाना सञ्चालन गर्न पुनः सम्भाव्यता अध्ययन गर्नुपर्ने धारणा राखे । छलफलमा सहभागी नेपाल उद्योग वाणिज्य संघका केन्द्रीय सदस्य राजेन्द्र श्रेष्ठ, जिल्ला शाखाका महासचिव यादव दाहाल, कारखानाका पूर्वप्रबन्ध निर्देशक तथा हाल नेपाल ओरियण्ड म्याग्नेसाइटका सञ्चालक समितिका सदस्य दिनेश भट्टराई र पूर्वप्रमुख प्रशासक रामासिस मण्डलको पनि उपस्थिति थियो ।

भेलाले कारखाना सञ्चालनका लागि स्थानीय सरोकारहरूको प्रतिनिधिमूलक एक ‘नेपाल ओरिण्ड म्याग्नेसाइट सञ्चालन सहयोग समिति’ सर्वसम्मतले गठन गरेको छ । जसको नेतृत्व स्थानीय रामकृष्ण पराजुलीलले गरेका छन् । समितिको सचिवमा डा. विनोद नेपाल चुनिएका छन् ।

कारखाना स्थापना हुनुपूर्व भारतको उडिया कम्पनीको ४९ प्रतिशत र नेपाल सरकारको ५१ प्रतिशतमा सञ्चालन गर्ने सम्झौता भएको थियो । अहिले उक्त कम्पनी र नेपालको खेतान समूहबीचको बराबर हुनेगरी २५ प्रतिशत र नेपाल सरकारको ७५ प्रतिशत सेयर छ ।

प्रकाशित मिति: शुक्रबार, फागुन २, २०७६ १६:४९