२० नेताले धानेको विप्लव नेतृत्वको नेकपा

A+ A A-

भूमिगत रूपमा विध्वंसात्मक गतिविधि गरेको भन्दै सरकारले प्रतिबन्ध लगाएको १ वर्षमै नेत्रविक्रम चन्द (विप्लव) नेतृत्वको संगठन संरचना कमजोर बनेको छ ।

एनसेल मुख्यालयमा आक्रमण गरेपछि सरकारले २८ फागुन, २०७५ मा विप्लव नेतृत्वको नेकपाका गतिविधिमा प्रतिबन्ध लगाउँदै उसका नेता कार्यकर्तालाई धमाधम पक्राउ गरिरहेको छ ।

१ वर्षको अवधिमा पार्टीका १० जना केन्द्रीय सदस्य पक्राउ परिसकेका छन् । भूमिगत र अर्धभूमिगत नेता कार्यकर्ता संगठन विस्तार र गतिविधमा भन्दा रक्षात्मक अवस्थामै केन्द्रित छन् ।

गतवर्ष १२ जेठमा राजधानीका विभिन्न स्थानमा बम विस्फोट गराएपछि सरकार विप्लवको पार्टीप्रति आक्रामक रूपमा प्रस्तुत हुन थालेको हो ।

सरकारले धमाधम नेता कार्यकर्ता पक्राउ गरेपछि पार्टी संगठन विस्तार र राजनीतिक गतिविधिमा भन्दा रक्षात्मक अवस्थामा पुगेको छ ।

एनसेल विस्फोटमा १ जनाको मृत्यु भएपछि विप्लवप्रति सरकार आक्रामक बनेको हो । विस्फोटअघि विप्लवका गतिविधिहरू अर्धभूमिगत रूपमा सञ्चालित थिए । त्यसपछि केही समय सरकार र विप्लव आमुन्नेसामुन्ने देखिए ।

प्रतिबन्ध लगाएको एक महिनामा विप्लव नेकपालाई पूर्ण रूपमा निस्तेज पार्ने बताएको सरकारले नेता कार्यकर्तालाई जहाँ भेट्यो, त्यहीँ समाउने नीति लिएपछि उसको पार्टी संगठन कमजोर बनेको हो ।

एक वर्षमा आधा केन्द्रीय सदस्य जेलमा

विप्लव नेतृत्वको नेकपालाई प्रतिबन्ध लगाएपछि सरकारले यसको नेतृत्वलाई प्रमुख निशाना बनायो । विप्लवका विश्वास पात्र भनेर चिनिएका हेमन्तप्रकाश वलीलगायतका ९ जना काभ्रेको खानीखोलाबाट गतवर्ष ९ चैतमा पक्राउ परे ।

अहिलेसम्म विप्लवका १ हजारभन्दा बढी नेता कार्यकर्ता जेलमा छन् । विप्लवले एकीकृत जनक्रान्ति गर्ने भन्दै ८ मंसिर, २०७१ मा वैद्य नेतृत्वको नेकपा क्रान्तिकारी माओवादीबाट पार्टी विभाजन गरेका थिए ।

कपिलवस्तुको जंगलमा भेला गरेर पार्टी विभाजन गर्दा उनले वैद्यले क्रान्ति गर्न नसक्ने ठोकुवा गरेका थिए । बेग्लै पार्टी गठन गरेको ५ वर्षमा केन्द्रीय संगठनको आकार २० जनामा खुम्चिएको छ ।

३० सदस्यीय केन्द्रीय कमिटीका १० जना पक्राउ परेपछि अहिले विप्लव रक्षात्मक अवस्थामा पुगेका छन् । पार्टीको आन्तरिक समस्याका कारण पनि संगठन कमजोर बनेको नेताहरू बताउँछन् ।

पार्टी प्रतिबन्धित भएपछि केन्द्रीय सदस्यहरू हेमन्तप्रकाश वली, माइला लामा, भरत बम, नवीन विक, बन्दु चन्द, प्रज्वल श्रेष्ठ, सुभाष बैठा, वीरजंग, दिपेश राई र उमा भुजेल पक्राउ परी हाल जेलमा छन् ।

केन्द्रीय सदस्यहरू महासचिव नेत्रविक्रम चन्द ‘विप्लव’, प्रवक्ता खड्कबहादुर विश्वकर्मा ‘प्रकाण्ड’, धर्मेन्द्र बाँस्तोला ‘कञ्चन’, सन्तोष बुढामगर, अनिल शर्मा विरही, निर्मल राई, सुमन लिम्बू, देवनारायण साह, सन्देश पौडेल, चिरन पुन, शीतल वली, मोहनलाल चन्द, धु्रव घिमिरे, अमर झाँक्री, बाला थापा, एटम, ओम पुन, विजय, दीपक चलाउने र आस्थाले पार्टी गतिविधि सञ्चालन गरिरहेका छन् ।

संगठनभित्र दुई लाइन संघर्षका कारण पार्टीका नेता कार्यकर्ता गिरफ्तार भएको पार्टीका एक नेता बताउँछन् । उनले संगठन कमजोर भएको स्वीकार गर्दै कार्यदिशामा गम्भीर समीक्षा गर्ने बेला आएको बताए ।

‘पार्टीभित्रै सुराकीको बिगबिगी बढ्दा नेता कार्यकर्ता पक्राउ परे र पार्टी कमजोर अवस्थामा पुगेको छ, अब कार्यदिशा र कार्यशैलीमा गम्भीर समीक्षा गर्छौं,’ उनी भन्छन् ।

प्रकाशित मिति: शुक्रबार, फागुन २, २०७६ १६:२८