गण्डकीमा नाट्टा चुनावकाे सरगर्मी, दुई प्यानलबीच प्रतिस्पर्धा हुने

A+ A A-

नेपाल एसोसिएसन अफ टूर एण्ड ट्राभल एजेन्ट्स (नाट्टा) गण्डकीमा चुनावी सरगर्मी बढेकाे छ । नाट्टाको आगामी नेतृत्वका चयनका लागि शनिबार पोखरामा हुने ११औं अधिवेशनमा दुई प्यानलबीच प्रतिस्पर्धा हुने भएको छ ।

संघको नेतृत्वका लागि अध्यक्षमा सञ्जयकान्त सिग्देल र झवी अधिकारीबीच प्रतिस्पर्धा हुने भएको छ । दुवै जना छुट्टाछुट्टै प्यानल बनाएर चुनावी अभियानमा होमिएसँगै नाट्टामा आवद्ध व्यवसायीहरू २ धारमा विभाजित भएका छन् ।

अध्यक्षका उम्मेदवार सिग्देल वर्तमान कार्यसमितिमा प्रथम उपाध्यक्ष र अधिकारी द्वितीय उपाध्यक्ष भएर काम गरिरहेका छन् । सिग्देल कांग्रेस निकट र अधिकारी नेकपा निकट व्यवसायी हुन् ।

व्यावसायिक साझा संस्थामा २ प्यानलबीच चुनाव हुँदा व्यावसायिक एकतामा खलल पुग्ने र राजनीतिक हस्तक्षेप बढ्ने भन्दै केही व्यवसायीले भने दुःख व्यक्त गरेका छन् । संस्थामा पछिल्लो समय राजनीतिक हस्तक्षेप बढेको संघमा आवद्ध एक सदस्यले बताए । ‘सबैलाई मिलाएर सर्वसम्मत नेतृत्व चयन भए राम्रो हुन्थ्यो’, उनले भने, ‘संघमा राजनीति घुस्यो भने यसले सधैँ व्यवसायीलाई प्रताडित बनाउनेछ।’

त्यसैगरी, प्रथम उपाध्यक्षमा हरिराम अधिकारी र सुवास भण्डारीबीच प्रतिस्पर्धा हुने भएको छ । सिग्देलको प्यानलबाट उम्मेदवार बनेका हरिराम अधिकारी वर्तमान कार्यसमितिमा महासचिव भएर काम गरिरहेका छन् भने अधिकारीको प्यानलबाट उम्मेदवार बनेका सुवास भण्डारी निवर्तमान महासचिव हुन् ।

झवी अधिकारी प्यानलबाट द्वितीय उपाध्यक्षमा नेत्रपाणि भण्डारी (बाबुराम), महासचिवमा कुलचन्द्र शर्मा, सचिवमा चेतन कार्की, कोषाध्यक्षमा विश्वराज आचार्य, सहकोषाध्यक्षमा नवराज भण्डारी उम्मेदवार छन् ।

सदस्यहरूमा शोभाकर तिवारी, सुशीला सिग्देल, खेमबहादुर नेपाली, प्रकाश सुवेदी, फणेन्द्र थापामगर उम्मेदवार छन् ।

सञ्जयकान्त सिग्देलको प्यानलबाट द्वितीय उपाध्यक्षमा किशोर दाहाल, महासचिवमा कमला गिरी, सचिवमा संगीता पौडेल, कोषाध्यक्षमा राजेश पहारी, सहकोषाध्यक्षमा प्रदीप काफ्लेले प्रतिस्पर्धा गर्नेछन् ।