काभ्रेपलाञ्चोक ‘साक्षर’ जिल्ला

A+ A A-

काभ्रेपलाञ्चोक ‘साक्षर’ जिल्ला भएको छ । जिल्लाका ६ नगरपालिका र ७ गाउँपालिका साक्षर घोषणा भइसकेका छन् ।

मण्डन देउपुर नगरपालिकाले विसं २०७५ साल १३ पुसमा ‘साक्षर नगर’ घोषणा गरेपछि स्थानीय तहले क्रमैसँग साक्षर घोषणा गरेअनुसार चौँरीदेउराली गाउँपालिकाले पनि बिहीबार साक्षर पालिका घोषणा गरेपछि ७ फागुनमा साक्षर जिल्ला घोषणाको तयारी गरिएकाे छ ।

समितिका संयोजक उद्धव केसीले ७ फागुनमा ‘साक्षर जिल्ला’ घोषणाको तयारी तीव्ररुपमा भइरहेको बताए । समितिका अनुसार जिल्लाका १५ देखि ६० उमेर समूहका ९६.४८ प्रतिशत जनसङ्ख्या साक्षर भएका हुन् ।

जसमध्ये एक लाख ९६ हजार १ सय ७४ पुरुष र एक लाख ७७ हजार ५५४ महिला साक्षर भएका हुन् । विसं २०६८ को जनगणनाअनुसार जिल्लामा तीन लाख ७३ हजार ७२८ जनसङ्ख्या रहेको छ ।

जनगणनाअनुसार तत्कालीन अवस्थामा २ लाख ९२ हजार १ सय ७९ जनसङ्ख्या साक्षर भएकाेमा तत्पश्चातका वर्षमा निरक्षर जनसङ्ख्याका लागि सञ्चालन भएको सघन साक्षरता कार्यक्रमबाट आर्थिक वर्ष २०७६/७७ सम्म ३ लाख ६० हजार ५ सय ६० जनसङ्ख्या साक्षर भएको संयोजक केसीले जानकारी दिए ।

उनका अनुसार जिल्लाका १३ वटै स्थानीय तहले बाँकी रहेका तथा अभियानका क्रममा साक्षर हुन छुट निरक्षर जनसङ्ख्यालाई आगामी दिनमा साक्षर गराउने प्रतिबद्धतासहित साक्षर नगर/गाउँपालिका घोषणा गरेका हुन् ।

समितिको तथ्याङ्कअनुसार जिल्लाको मण्डन देउपुर नपाका ९५.२७, धुलिखेलका ९८.०७, बनेपा नपाका ९७.०७, पनौती नपाका ९५.०५, नमोबुद्ध नपाका ९६.४०, पाँचखाल नपाका ९८.९८ तथा खानीखोला गाउँपालिकाका ९६.७१, तेमालका ९५.९७, भुम्लुका ९५.०५, बेथानचोकका ९५.८१, महाभारतका ९७.९८, रोशीका ९८.९८ र चौँरीदेउराली गाउँपालिकाका ९६.८३ जनसङ्ख्या साक्षर भएकाे हाे ।