कला संस्कृतिको जगेर्ना गर्न पोखरामा खस आर्य संग्रहालय बन्ने

A+ A A-

पोखरामा कला संस्कृतिको जगेर्ना गर्दै आन्तरिक तथा बाह्य पर्यटक प्रवर्द्धन गर्ने उद्देश्यले संग्रहालय निर्माण गरिने भएको छ ।

क्षत्री समाज नेपाल केन्द्रीय कार्यालय छपरिसरमा निर्माण गरिने खस आर्य संग्रहालयको बिहीबार गण्डकी प्रदेशका आर्थिक मामिला मन्त्री किरण गुरुङले शिलान्यास गरेका हुन् । प्रदेश सरकारको आर्थिक सहयोग र विभिन्न संघसंस्थाको गरी कुल ७ करोडको लागतमा संग्रहालय निर्माण गरिनेछ ।

शिलान्यास समारोहमा बोल्दै मन्त्री गुरुङले नेपालको भौगोलिक अवस्थाअनुसार जातजातिको धर्म, संस्कृति परम्परालाई आमनेपालीले सम्मान गनुपर्ने बताए । उनले जातीय संघसस्थालाई कुनै राजनीतिक रङ नदिई संघीयता मजबुत बनाउनुपर्ने बताए । ‘आदिवासी भन्ने होडको अन्त्य गरी संघीयताको मर्म र भावनाअनुसार सबै जातिले जिम्मेवारी लिनुपर्दछ,’ उनले भने ।

पूर्वमन्त्री एवं प्रदेश सासंद कुमार खड्काले जातीय सद्भावका लागि खस आर्य संग्रहालय महत्त्वपूर्ण हुने बताए ।

प्रदेश सांसद कृष्ण थापाले सबैले स्वीकार गर्ने र सबैको सहभागिता रहने गरी संग्रहालय निर्माण गर्नुपर्ने बताए ।

प्रदेश सांसद बिन्दुकुमार थापाले विकास निर्माणमा सबै पार्टी एक हुनुपर्ने अवस्था रहेको बताए ।

क्षत्री समाज नेपालका केन्द्रीय अध्यक्ष प्रा.डा. दिलबहादुर क्षत्रीले समाजले सदैव सबै जातिको सम्मानका लागि आन्दोलन गरेकाले संग्रहालय र बहुउद्देश्यीय भवन निर्माणले थप टेवा पुग्ने बताए ।

निर्माण समितिका अध्यक्ष प्रेमबहादुर जिसीले संग्रहालय निर्माणमा प्रदेश सरकार र अन्य निकायबाट आर्थिक सहयोग संकलन गरेर १ वर्षभित्र पूर्ण रूपमा संग्रहालय सञ्चालनमा ल्याउने योजना रहेको बताए ।