विराट एक्स्पोको तयारी पूरा, १ अर्बको कारोबार हुने अनुमान

A+ A A-

आगामी २ फागुनदेखि विराटनगरमा सुरु हुने विराट एक्स्पोको तयारी अन्तिम चरणमा पुगेको छ ।

स्थानीय उत्पादनको प्रवर्द्धन र लगानीमैत्री वातावरण निर्माण गर्ने उद्देश्यले आयोजना हुने लागेको विराट एक्स्पो कृषि तथा औद्योगिक अन्तराष्ट्रिय प्रदर्शनीको तयारी लगभग पूरा भएको छ ।

विराटनगर–२ स्थित शंकरपुर मार्गमा आयोजना हुने सो एक्स्पो तयारी लगभग पूरा भएको आयोजकले जनाएको छ ।

आयोजक संस्था उद्योग संगठन मोरङका अध्यक्ष भीम घिमिरेले कृषि र औद्योगिक उत्पादनको बजारीकरण गर्नुको साथै उत्पादित वस्तुलाई उपभोक्तासँग जोड्ने गरी आयोजना गर्न लागिएको एक्स्पोको तयारी पूरा भएको जानकारी दिए ।

उद्योग संगठन मोरङको आयोजनामा प्रदर्शनी आगामी फागुन १० गतेसम्म सञ्चालन हुनेछ । ‘आर्थिक विकासको मूल आधार उद्योग, पर्यटन, कृषि र व्यापार’ भन्ने मूल नाराका साथ सञ्चालन हुने एक्स्पोको मुख्य प्रायोजकमा नोवेल मेडिकल कलेज टिचिङ हस्पिटल प्रा.लि रहेको छ ।

एक्स्पोमा ३ लाख दर्शकले प्रत्यक्ष अवलोकन गर्ने विराट एक्सपोका संयोजक भोलेश्वर दुलालले जानकारी दिए ।

सम्भावित बजारको पहिचान, पर्यटन प्रवर्द्धन, प्रविधि पहिचान, उत्पादकहरूबीच स्वस्थ प्रतिस्पर्धा, लगानीमैत्री वातावरण निर्माणमा सहयोग, विश्वव्यापी र क्षेत्रीय अवधारणाबाट औद्योगिक क्षेत्रमा पर्ने असर र लाभका क्षेत्रको पहिचानका साथै शिक्षा, स्वास्थ्य क्षेत्रको गतिविधिबारे जानकारी दिने आयोजकले जनाएको छ ।

एक्पोमा औद्योगिक उत्पादन तथा वस्तुहरू, कृषि, जडिबुटी उत्पादन र कृषि औजार, सूचना प्रविधि, अटोमोबाइल्स तथा पार्टस, विद्युतीय, घरायसी सामग्रीहरू, गार्मेन्ट, खाद्य स्वास्थ्य, शिक्षा एवम्ं बैंक तथा वित्तीय क्षेत्रका ३ सय ४० वटा स्टल रहने उनले बताए । एक्पो अवधिभरमा १ अर्ब बढीको कारोबार हुने हुने अनुमान गरिएको आयोजकले जनाएको छ ।

राष्ट्रिय उद्योग/व्यवसाय तथा बहुराष्ट्रिय कम्पनीहरू, कृषि तथा पर्यटन व्यवसायीहरू, शिक्षा, स्वास्थ्य, बैंकिङ, होटल व्यवसायीहरू, घरेलु तथा साना उद्योगहरूका साथै अन्तर्राष्ट्रियमा भारत, बंगलादेश, पाकिस्तानमा उत्पादन भएका वस्तुहरू राखिने जनाइएको छ ।

प्रकाशित मिति: बिहीबार, फागुन १, २०७६ ०८:२७