डडेल्धुराको पुइलेकमा निर्माण होला त विमानस्थल ?

A+ A A-

२०७० सालबाट डडेल्धुरामा विमालस्थल निर्माण हुन्छ भन्ने चर्चा निकै चल्यो । तर, २०७६ सालसम्म डडेल्धुरामा विमालस्थल निर्माणको कुरा चर्चामा मात्रै सीमित रह्यो । विमालस्थल निर्माणका लागि कसैले चासो नदिएपछि त्यो कुरा त्यत्तिकै सेलायो ।

अहिले भने डडेल्धुराको अजयमेरू गाउँपालिका–१, पुइलेकदेखि वयलडाँडामा विमालस्थल निर्माणका लागि उपयुक्त रहेको संस्कृति, पर्यटन तथा नागरिक उड्डयन मन्त्रालयले सम्भाव्यता अध्ययनका लागि जिल्लामा पठाएको एक प्राविधिक टोलीले निष्कर्ष निकालेपछि डडेल्धुरामा विमानस्थल बन्ला या नबन्ला भन्ने विषयमा पुनः चर्चा चुलिएको छ ।

सुदूरपश्चिमका पहाडी जिल्लामा रहेका बैतडीको पाटन, डोटीको दिपायल विमानस्थललगायतका विमानस्थल अहिले पनि लथालिङ्ग अवस्थामा रहेका कारण डडेल्धुरामा विमानस्थल निर्माण हुन्छ कि हुँदैन् भन्ने आशंका पनि उब्जिन थालेका छन् ।

तर, सस्कृति पर्यटन तथा नागरिक उडड्यनमन्त्री योगेश भट्टराई सुदूरपश्चिम पुगेर डडेल्धुराको पुइलेकमा नयाँ विमानस्थल बनाउने काम तीव्र रूपमा अगाडि बढ्ने भनेपछि यहाँका कतिपय स्थानीय व्यक्ति विमानस्थल निर्माण हुनेमा विश्वस्त पनि छन् ।

सम्भाव्यता अध्ययन सुरू

डडेल्धुरामा विमानस्थल निर्माणका लागि प्रारम्भिक अध्ययनपश्चात् सम्भाव्यता अध्ययन सुरू भएको छ । जिल्लाको अजयमेरू गाउँपालिका–१, पुइलेकदेखि वयलडाँडासम्मको १२ सय मिटर जग्गामा सम्भाव्यता अध्ययन सुरू भएको हो ।

संस्कृति, पर्यटन तथा नागरिक उड्डयन मन्त्रालयले सम्भाव्यता अध्ययनका लागि जिल्लामा एक प्राविधिक टोली पठाएको छ । प्राविधिक टोलीले सम्भाव्यता अध्ययनका रूपमा स्थलगत निरीक्षण गरी लम्बाइ चौडाइ लिनुका साथै उक्त क्षेत्रको नक्सा ड्रोन क्यामरामार्फत लिएको छ ।

त्यहाँको भू–बनोटलगायत ल्यान्डिङ र टेकअफ गर्ने बेलाका लागि अपट्याकल लिमिटेसनलगायतका कुराहरूलाई हेर्दा पहाडी जिल्लाका लागि उपयुक्त स्थान रहेको अध्ययन टोलीका सदस्य इन्जिनियर नरेश शिवाकोटीले जानकारी दिए ।

‘यो पहाडी इलाकाका लागि यतिसम्मको जग्गा एकदमै उपयुक्त हो,’ उनले भने, ‘१२ सय मिटर जमिन अहिले देखिन्छ, वालहरू हालेर बढाउन पनि सकिने सम्भावना छ ।’

२०७० सालबाट डडेल्धुरामा विमालस्थल निर्माणका लागि विभिन्न स्थानमा माग राखेको भए पनि वास्ता गरिएको थिएन । अहिले आएर पुइलेकमा प्रारम्भिक अध्ययनपश्चात् सम्भाव्यता अध्ययन सुरू गराउन सकेकोमा अध्ययन टोली ल्याएर स्थलगत रुपमा पुइलेक पुगेका नेकपाका नेता डा.तारा जोशीको भनाइ छ ।

‘हामीले २०७० सालबाटै माग गरेका हौँ । योभन्दा अगाडि पनि विभिन्न स्थानहरूको अध्ययन गराएका थियौँ, उनले भने, ‘अहिले पुइलेकमा सम्भाव्यता अध्ययन सुरू भएको छ । अरू स्थानमा प्रारम्भिक अध्ययनले नहुने देखाएको छ ।’

यसका लागि आवश्यक प्रक्रिया अगाडि बढाउन केही समय लाग्ने तथा ईआईए गर्न नै एक वर्ष लाग्ने प्राविधिक टोलीको भनाइ छ । आइतबार गरेको अध्ययनको पनि पूर्ण निष्कर्ष आउन ३ महिना लाग्ने इन्जिनियर शिवाकोटीले बताए ।

विमानस्थलका लागि आवश्यक धावन मार्गको लम्बाइ, पर्याप्त मिलेको क्षेत्रफल भएको, तर जमिन भिरालो भए पनि राम्रो, धावन मार्ग, पहाडले छेक्ने सम्भावनासमेत भएको पाइएको इन्जिनियर शिवाकोटीको भनाइ छ ।

विमानस्थल निर्माणका लागि डडेल्धुराको पुइलेकमा कालोपत्रे सडक पहुँच भएकाले ४ वर्षको समयावधि लाग्न सक्ने प्राविधिक टोलीले देखाएको छ । विमालस्थल अध्ययन भइरहेका क्षेत्र डडेल्धुरा सदरमुकामबाट १२ किलोमिटर टाढा पर्छ ।

सम्भाव्यता अध्ययन सुरुसँगै स्थानीय खुसी

यसैबीच यस क्षेत्रमा प्रारम्भिक अध्ययनपश्चात् सम्भाव्यता अध्ययन सुरू भएपछि स्थानीय नागरिक खुसी भएका छन् ।

लामो समयदेखि चर्चामा रहेका स्थानमा फेरि अध्ययन सुरू भएपछि अब एयरपोर्ट बन्ने आशा लागेको स्थानीय डम्बर साउदले बताए । विमालस्थल आफ्नो स्थानमा बनाउन छिटो पहल गर्न स्थानीय टेकबहादुर ऐरको पनि माग छ ।

‘हामीले भोट दिएर पठाएको विकास गर्न हो,’ उनले भने, ‘अब हाम्रो ठाउँको विकास विमानस्थलले सम्भव छ, त्यसैले सरकारले छिटो विमानस्थल बनाउनुपर्छ ।’

डडेल्धुराको अजयमेरू–१, समैजी पुइलेक क्षेत्रमा विमानस्थल निर्माण भए ७ पहाडी जिल्ला जनताले सुविधा पुग्नेछ भने धनगढी नेपालगञ्जमा हुस्सुलगायतका कारणले उडान बन्द भए यहाँबाट उडान गर्न सकिने प्राविधिकहरूको भनाइ छ । प्राविधिकहरूका अनुसार यहाँ निर्माण हुने विमानस्थल काठमाडौंदेखि सिधै डडेल्धुरा उडान गर्न सक्ने खालको बन्नेछ ।

प्रकाशित मिति: बुधबार, माघ २९, २०७६ २०:२५