डोटी प्रादेशिक महोत्सवको तयारी पूरा, मुख्य मन्त्रीले उद्घाटन गर्ने

A+ A A-

डोटी जिल्लाको दिपायलमा आयोजना गरिन लागेको प्रादेशिक व्यापारिक कृषि तथा पर्यटन महोत्सवको तयारी पूरा भएको छ ।

डोटी चेम्बर अफ कमर्सको आयोजनामा हुन लागेको सो महोत्सव नेपाल भम्रण वर्ष २०२० लाई सफल पार्न तथा घरेलु उत्पादन, स्थानीय धर्मसंस्कृति पर्यटन प्रवर्द्धन गर्ने उद्देश्यले आयोजना गरिएको आयोजकले बताएका छन् ।

‘सेतीको हीरा, खप्तडको मोती, व्यापार पर्यटन र जलस्रोतबाट बनाउछौँ समुन्नत डोटी’ भन्ने मूलनाराका साथ आयोजना गर्न लागिएको सो महोत्सवको उद्घाटन सुुदूरपश्चिम प्रदेशका मुख्यमन्त्री त्रिलोचन भट्टले गर्ने कार्यक्रम रहेको छ ।

महोत्सब हेर्न आउने दर्शक तथा पर्यटकको स्वागतका लागि जिल्लाको दिपायल, पिपल्ला, द्वारीखोला, एयरपोटलगायत ठाउँहरूमा स्वागत गेटहरू निर्माण गरिएको छ ।

१ फागुनदेखि १३ सम्म सञ्चालन हुने सो महोत्सवमा चर्चित राष्ट्रिय तथा स्थानीय कलाकारहरूको प्रस्तुतिसमेत रहने बताइएको छ । आयोजकका अनुसार यस वर्षको मुख्य आकर्षण प्याराग्लाइडिङ रहेको छ ।

हरेक वर्ष दिपालयको पिपल्ला क्षेत्रमा महोत्सव सञ्चालन गरिँदै आएकोमा यस वर्ष भने स्थान परिवर्तन गरिएको छ । यस वर्ष ऐतिहासिक धरोहरको रूपमा रहेको दिल्पेश्वर मठ क्षेत्रलाई लक्षित गर्दै महोत्सव आयोजना गरिने भएको छ ।

महोत्सवका अन्य आकर्षणको रुपमा सेती नदीमा र्‍याप्टिङ, डोटीका स्थानीय परिकार, रमाइलो मेला, स्थानीय झाँकी, घरेलु उत्पादन प्रदर्शनी र बिक्रीवितरण, कृषि प्रदर्शनीलगायत रहेको आयोजक संस्थाका सचिव तेज डुम्रेलले जानकारी दिए । महोत्सवमा १ करोडभन्दा बढीको आर्थिक कारोबार गर्ने लक्ष्य रहेको उनको भनाइ छ ।

प्रकाशित मिति: बुधबार, माघ २९, २०७६ २०:०७