बैंकले प्रत्येक प्रदेशमा गर्दैछन् कम्तिमा ६ करोडको सामाजिक काम

A+ A A-

बैंक तथा वित्तीय संस्थाको नाफाको विषयलाई लिएर धेरै ठूलो वहस हुने गरेको छ । कतिपयले बैंकको नाफा धेरै भयो भन्ने आरोप पनि लगाउने गरेका छन् ।

बैंकको प्रमोटर आफै भए पनि बैंकले बढी नाफा गरे भन्नेहरुमा पछिल्लो समय उद्योगी व्यवसायी पनि थपिएका छन् । बैंकको नाफालाई लिएर कतिपय सन्दर्भमा नियामक निकायले पनि चासो दिने गरेको छ ।

बैंकको नाफा बढी भयो भन्ने मान्यता राखेर नै नेपाल राष्ट्र बैंकले बैंकहरुलाई आफ्नो खुद नाफाको १ प्रतिशत रकम संस्थागत सामाजिक उत्तरदायित्व (सिएसआर) मा खर्च गर्नै पर्ने नीतिगत व्यवस्था गरेको छ । बैंकहरुले सिएसआरमा खर्च गर्ने खुद नाफाको १ प्रतिशत भनिएको रकम कर लगायतका सम्पूर्ण खर्च गरेपछि बाँकी रहेको रकमबाट हो ।

बैंकले आफ्नो खुद नाफाको १ प्रतिशत रकम सिएसआरमा खर्च गर्नुपर्ने व्यवस्थामा कडाइ गरेको धेरै समय भएको छैन । चालु आर्थिक बर्षदेखि त झन नेपाल राष्ट्र बैंकले बैंकहरुलाई सिएसआरमा खर्च गर्ने कूल रकमको कम्तिमा १० प्रतिशत रकम प्रत्येक प्रदेशमा खर्च गर्नै पर्ने नीतिगत व्यवस्था गरेको छ ।

कति रकम खर्च गर्छन् बैंकले सिएसआरमा ?

बैंकहरुले सिएसआरमा कति रकम खर्च गर्छन् भन्ने हिसाब निकाल्न सबैभन्दा पहिला बैंकको खुद नाफा कति हुन्छ भन्ने पत्ता लाग्नुपर्छ ।

बैंकहरुले गत आर्थिक बर्षको पुस मसान्तमा २२ अर्ब ६० करोड ७९ लाख ५ हजार रुपैयाँ खुद नाफा गरेका छन् । यो बर्षको पुस मसान्तमा बैंकहरुको खुद नाफा २७ अर्ब ४४ करोड १५ लाख ६८ हजार रुपैयाँ छ । यसरी हेर्दा गत बर्षको पुसको तुलनामा यो बर्षको पुसमा बाणिज्य बैंकहरुले आफ्नो खुद नाफा २१.३८ प्रतिशतले बढाएका देखिन्छ ।

चालु आर्थिक बर्षमा बाणिज्य बैंकहरुले गत बर्षको तुलनामा २१.३८ प्रतिशतले खुद नाफा बृद्धि गर्ने तथ्य ६ महिनाको उनीहरुको खुद नाफाको बृद्धिदरबाट देखिन्छ ।

गत आर्थिक बर्षमा बाणिज्य बैंकहरुले ४९ अर्ब ९४ करोड ८५ लाख ८७ हजार रुपैयाँ खुद नाफा गरेका थिए । यो बर्ष त्यसमा २१.३८ प्रतिशतले बृद्धि हुँदा बैंकहरुको खुद नाफा ६० अर्ब ६२ करोड ७५ लाख ९४ हजार रुपैयाँ हुन्छ ।

बैंकहरुले सिएसआरमा खर्च गर्ने भनेको यो खुद नाफाको १ प्रतिशत हो । यसरी हेर्दा चालु आर्थिक बर्षमा बैंकहरुले ६० करोड ६२ लाख ७५ हजार रुपैयाँ सिएसआरमा खर्च गर्नेछन् ।

हालै नेपाल राष्ट्र बैंकले अर्काे पनि व्यवस्था गरेको छ । नयाँ व्यवस्था अनुसार बैंकहरुले खर्च गर्ने सिएसआर रकमको १० प्रतिशत रकम प्रत्येक प्रदेशमा खर्च गर्नै पर्छ । यसो हुदा प्रत्येक प्रदेशमा बैंकहरुले कम्तिमा पनि ६ करोड रुपैयाँको सामाजिक काम गर्नैपर्ने भएको छ ।

प्रकाशित मिति: बुधबार, फागुन २९, २०७५ २१:१९