कोरोना भाइरसबाट बच्न सुदूरपश्चिम सरकार सजग

A+ A A-

उत्तरी छिमेकी मुलुक चीनमा बढ्दै गएको कोरोना भाइरसको संक्रमणबाट हालसम्म ज्यान गुमाउनेको संख्या ९ सय ४ पुगेसँगै सुदूरपश्चिम प्रदेशमा सचेतना अपनाइन थालिएको छ ।

यसको संक्रमण सुदूरपश्चिममा पनि फैलिन सक्ने भन्दै प्रदेश सरकारले सजगता अपनाउन थालेको छ । प्रदेशको रेफरल अस्पतालका रूपमा रहेको सेती प्रादेशिक अस्पतालले नोवेल कोरोना भाइरसका संक्रमित बिरामीका लागि छुट्टै उपचार कक्ष निर्माण सुरु गरिएको छ ।

कक्षमा कडा खालको रुघा खोकी ज्वरोको लक्षण देखिएका बिरामीलाई पनि उपचार गरिने अस्पतालका सुपरिन्टेन्डेन्ट डा. हेमराज पाण्डेले बताए । डा. पाण्डेले कोरोना भाइरसबाट बच्न पूर्वतयारीका लागि ४ बेडको छुट्टै कक्ष सञ्चालन गरिएको जानकारी दिए । महाकाली अस्पतालमा पनि यसका लागि छुट्टै स्थापना गरिएको छ ।

कोरोना भाइरसले महामारीको रूप लिन थालेपछि यसको संक्रमणबाट बच्न सुदूरपश्चिम प्रदेशमा सचेतनाको प्रयास थालिएको प्रदेशको सामाजिक विकास मन्त्रालयले जनाएको छ ।

हालसम्म नेपालमा यसको संक्रमण नदेखिए पनि उच्च सतर्कताका लागि स्वास्थ्य जाँच सेवा सुरु गरिएको मन्त्रालयका स्वास्थ्य महाशाखा प्रमुख नरेन्द्र सिंह कार्कीले बताए ।

स्थानीय तहसँग समन्वय गरेर जनचेतना फैलाउने काम भइरहेको बताउँदै उनले रुघाखोकी, श्वास फेर्न गाह्रो हुनु र १ सय ४ डिग्रीभन्दा बढी ज्वरो देखिएमा स्वास्थ्य जाँच गराइहाल्न आग्रह गरे ।

रुघाखोकी तथा श्वासप्रश्वासमा समस्या भएका बिरामीको नजिक नजाने, नियमित साबुन पानीले हात धुने, खोक्दा र हाछ्यूँ गर्दा नाक र मुख छोप्ने, जङ्गली तथा घरेलु पशुपक्षीसँग सिधै सम्पर्क नगर्ने, अण्डा तथा मासु राम्ररी पकाएर मात्र खाएमा यसको जोखिमबाट बच्न सकिने स्वास्थ्य महाशाखा प्रमुख कार्कीले बताए ।

कोरोना भाइरसको जोखिम कम गर्न प्रदेश सरकारले प्रदेशभित्रका विभिन्न नाका र गेटा विमानस्थलमा स्वास्थ्य कर्मीसहितको हेल्प डेस्क स्थापना गरिने सामाजिक विकासमन्त्री कृष्णराज सुवेदीले बताए ।

सेती प्रादेशिक अस्पताल र महाकाली अस्पतालमा विशेषज्ञ चिकित्सकसहितको विशेष कक्ष सञ्चालन गर्न निर्देशन दिइसकेको बताउँदै मन्त्री सुवेदीले सीमानाका र विमानस्थलमा पनि केही दिनभित्रै हेल्प डेस्क स्थापना दाबी गरे ।

चीनको हुवेई प्रान्तबाट सुरु भएको कोरोना भाइरसको संक्रमण विभिन्न मुलुकमा फैलिँदै गएको छ । कोरोना भाइरसको संक्रमण नेपालसहित चीनका साथै अमेरिका, हङकङ, मकाउ, ताइवान, फ्रान्सलगायत १२ देशमा भेटिएको छ । हालसम्म मानवमा देखा नपरेको र उपचारको उपायसमेत पत्ता नलागेको कोरोना भाइरस संक्रमणलाई निक्कै खतरनाक मानिएको छ ।

प्रकाशित मिति: सोमबार, माघ २७, २०७६ १९:१०