मीठो खीर खान जाने शेरबहादुर देउवाको खीर पसल ?

A+ A A-

सेतो कपाल, झुस्स दाह्री र चाउरी परेका गाला । उमेरले ६८ वर्ष । जोस भने १६ वर्षे ।

डडेल्धुरा–अत्तरिया जोड्ने मुख्य राजमार्ग भीमदत्त राजमार्गअन्तर्गत डडेल्धुराको गन्यापधुरा गाउँपालिका– १ साहुँखर्कमा टायलले छाएको सानो कटेरो । कटेरोेभित्र खीर बेच्नमै व्यस्त छन् । गन्यापधुरा गाउँपालिकाका ६८ वर्षीय शेरबहादुर देउवा ।

राजमार्ग छेउमै रहेको उनको पसलका कोही नियमित ग्राहक हुन्छन् त कोही पसलमा राखेको ‘तपाईं कता ? बाजेको खीर पसल यता’ लेखिएको बोर्डको भाषाले आकर्षित भएर आउँछन् ।

खीर खाने इच्छा भएका जोकोही पनि उनको खीर पसलमा पुग्ने गरेका छन् । उनको पसलको नाम हो– ‘बाजेको खीर पसल ।’ उनी यहाँ ‘खीर बाजे’ नामले परिचित छन् । देउवा लाखौँ रुपैयाँ खर्चेर अरब जाने हजारौँ युवाका लागि उदाहरण हुन् । मानिसहरूले उनलाई शेरबहादुर भनेर चिन्न छाडेका छन्, खीर बाजे भनेपछि टाढाटाढाका यात्रुले पनि चिनिहाल्छन् ।

पसल र खीरको स्वाद भीमदत्त राजमार्गमा हिँड्ने सबैका लागि परिचित छ । पहाडबाट तराई झर्दा होस् वा तराईबाट पहाड उक्लिँदा, यही राजमार्ग भएर हिँड्ने सवारी साधनको रोक्ने एक मात्र स्थान पनि हो साहुँखर्क । यहाँ गाडी रोकेर यात्रुहरू खीरको स्वाद लिन्छन् अनि मात्र आफ्नो गन्तव्यतर्फ लाग्छन् ।

रातदिन नै खुला रहन्छ बाजेको पसल । रातको यात्रा गर्नेले पनि उनको खीर र चियाको स्वाद लिन पाउँछन् । कमिज, सुरुवाल र स्टकोटमा धूवाँसँग पाैँठेजोरी खेल्दै बाजेले यात्रु र परिवार दुवैको भरपूर सेवा गरेका छन् ।

विगत ३१ वर्षदेखि खीर बेच्दै आएका देउवाले आफ्नै घरमा अहिले १० वटा गड्डी भैँसी पालेका छन् । आफ्नै घरका भैँसीहरूको दूध मात्र होइन, पूरै गाउँको भैँसीको दूध सङ्कलन गरेर देउवाले खीर बनाउने गरेका छन् । भीमदत्त राजमार्ग किनारमा रहेको उक्त पसलमा खीर बनाउने र बेच्ने उनको दैनिकी नै बनेको छ ।

पूर्वप्रधानमन्त्री शेरबहादुर देउवाको गृहजिल्लाको गाउँमा बाल्यकालमा सँगै गोठालो जाने गरेको सम्झन्छन् उनी । ‘बाल्यकालमा देउवासँगै म पनि गोठालो जान्थेँ’, उनी भन्छन् । दुवैको नाम पनि एउटै । आफू गाउँ छाडेपछि तराई झरेको र तराईमा बस्ने घर ऐलानीमा परेपछि फेरि पहाड उक्लिएर सडकको किनारमै ३ वटा भैँसी पालेर खीर बनाउन सुरु गरेको उनले सुनाए ।

देउवाले चिया र खीर बनाउनका लािग दैनिक करिब ७० लिटर दूध खपत गर्ने गरेका छन् । त्यही खीर र चियाको आम्दानीले देउवाले २ छोरा र नाति–नातिना गरी १० जनाको परिवार धानेका छन् । ‘यसैबाट परिवार धानेको छु । नाति–नातिनाको पढाइ खर्च पनि खीर बेचेरै चाइरहेका छौँ’, उनले भने ।

उनलाई घरपरिवारको साथ र सहयोग त छँदै छ थप विभिन्न सरकारी तथा गैरसरकारी संस्थाहरूले दूधका नयाँ परिकार बनाउनदेखि आधुनिक रूपमा गड्डी भैँसी पालनमा सहयोग गरेको भेटेरिनरी अस्पताल तथा पशु सेवा विज्ञ केन्द्र डडेल्धुराले जनाएको छ ।

खीर बाजेको नगद आम्दानीको मूल स्रोत भने अहिले खीर नै बनेको छ । खीरको मोहले दुनियाँलाई यतिसम्म तानेको छ कि राजमार्गमा यात्रा गर्ने जोकोहीको पनि बाजेको खीर रोजाइ बनेको छ ।

जाडो यामका यात्रु भने खीर खाने वहानामा आगोको आनन्द पनि लिन पाउँछन् यहाँ । खीर खान आएको मान्छे मन सन्तुष्ट पारेर फर्कन्छन् र फेरि पनि फर्कने बाचाका साथ त्यहाँबाट घर फर्कने गरेको उनी बताउँछन् ।

प्रकाशित मिति: सोमबार, माघ २७, २०७६ ११:३२