अवैध प्रेम सम्बन्धमा रहेका प्रेमीबाटै सम्झनाको हत्या

A+ A A-

विराटनगर १२ स्थित उखुबारीमा माघ २४ गते मृत भेटिएकी सम्झना खत्री परियारको अवैध प्रेम सम्बन्धका कारण हत्या भएको खुलेको छ ।

सम्बन्धमा तिक्तता आएपछि सप्तरी घर भएका २५ वर्षीय सुरेन्द्र साहले उनको हत्या गरेको प्रहरी अनुसन्धानमा खुलेको छ ।

सो प्रकरणमा मृतकसँग अवैध सम्बन्ध रहेका प्रेमी सुरेन्द्र साहले आफूले सम्झनाको हत्या गरेको स्वीकार गरेका छन् ।

सप्तरीको कृष्णश्रवण गाउँपालिका–३ स्थायी घर भएर बुढीगंगा गाउँपालिका–३ मा डेरा गरी बस्दै आएका २५ वर्षीय अभियुक्त सुरेन्द्र प्रसाद साहले आफूले सम्झनाको हत्या गरेको स्थान, उनलाई लिएर आएको बाटो र हत्यामा प्रयोग गरेको हतियारका विषयमा समेत प्रहरीलाई सबिस्तार बताएका छन् ।

अभियुक्त साहले दिएको बयानलाई पुष्टि गर्न मोरङ प्रहरीका प्रमुख प्रहरी उपरीक्षक विश्व अधिकारी नेतृत्वको अनुसन्धान टोलीले अभियुक्तलाई हत्या गरेको स्थानमा लिएर पुग्दा अभियुक्तले घटना घटाएको विषयमा सविस्तार बताएका थिए ।

अभियुक्त साहले सम्झनासँग ३ वर्षअघि देखि नै आफ्नो प्रेम सम्बन्ध रहेको बताएका छन् ।

एउटै उद्योगमा काम गर्ने क्रममा आफूहरुबीच चिनजान भएको र त्यो सम्बन्ध प्रेम सम्बन्धमा बदलिएको प्रहरीसँग बताएका छन् । प्रेम सम्बन्धमा तिक्तता आएपछि अभियुक्तले सम्झनाको हत्या गरेको प्रहरी उपरीक्षक अधिकारीले बताए ।

हत्या गरिएको दिन २१ माघमा आफूलेनै सम्झनालाई बाँसबारीचोकबाट नहरको बाटो मोटरसाईकलमा लिएर आएको र घटनास्थलमा आईपुग्दा बादविवाद र झगडा भएपछि आवेशमा आएर सलले घाँटी कसेर बाँसको धारिलो चोयाले रेटेर हत्या गरेको बताएका छन् ।

हत्या गरेपछि रिङरोडकै बाटो हुँदै उत्तरतर्फ लागेका साह हत्यामा प्रयोग गरिएको बाँसको चोया विराटनगर ६ ब्रम्हपुरास्थित केशलिया पुलमाथिबाट खोलामा फालेका थिए ।

लगत्तै खोलामा झरेर अभियुक्त साहले हातमा लागेको मृतकको रगत पखालेर फेरि बुढीगंगास्थित डेरातर्फ फर्किएका थिए । हत्यामा संलग्न अभियुक्त साहलाई प्रहरीले सम्झनाको शव भेटिएकै दिन २४ गते साँझ नियन्त्रणमा लिएको थियो ।

मृतकका श्रीमानले श्रीमती हराएको निवेदन दिन जाँदा शंकास्पद व्यक्तिका रुपमा साहको नाम टिपाएका थिए ।

प्रकाशित मिति: आइतबार, माघ २६, २०७६ २१:३४