‘मिटरब्याजी’ आरोपी रामबाबुविरुद्ध झण्डै साढे २० करोड बिगोको मुद्दा

A+ A A-

‘मिटरब्याजी’ आरोपी रामबाबु राय यादवविरुद्ध सर्लाही जिल्ला अदालतमा आज अभियोगपत्र दर्ता भएको छ । ठगी तथा आपराधिक विश्वासघात सम्बन्धीको कसुरमा यादवमाथि अभियोगपत्र दर्ता भएको सर्लाही जिल्ला अदालतका स्रेस्तेदार शिवहरि पौडेलले जानकारी दिए ।

उनका अनुसार आगामी आइतबारदेखि थुनछेक बहस सुरु हुनेछ । यादवविरुद्ध जाहेरी दिने २८ जना जाहेरवालाको तर्फबाट २० करोड ४२ लाख ८० हजार ९५ रुपियाँ बिगो दाबी गरिएको छ ।

‘मिटरब्याजी’ आरोपी यादवलाई कारबाही गर्न माग गर्दै पीडितहरूले दिउँसो सदरमुकाम मलंगवामा र्‍याली निकालेका छन् । यादवको अन्यायले उठिबास हुने अवस्था आएको भन्दै पीडितले सदरमुकाममा प्रदर्शन गरेका हुन् । उनीहरूले र्‍यालीपश्चात् प्रमुख जिल्ला अधिकारी मोहनबहादुर जिसीमार्फत प्रधानमन्त्री तथा मन्त्रिपरिषद्को कार्यालयलाई ज्ञापनपत्रसमेत बुझाई न्यायको माग गरेका हुन् ।

ऋण प्रवाह गर्दा कपाली तमसुक बनाई चर्को ब्याज असुली गरेको, ऋण लिँदा धितो राखेको जग्गा आफूहरू अर्का व्यक्तिलाई बिक्री गरेको जस्ता गुनासो आएपछि बरहथवा नगरपालिकाको गङ्गापुर निवासी यादवलाई गत पुस २३ गते प्रहरीले पक्राउ गरेको थियो ।

ऋण तिरिसक्दा पनि तमसुक फिर्ता नगरेको, ऋण लिँदा राजीनामा गरिदिएको जग्गा आफूखुसी बिक्री गरेको, ऋण दिँदा ५ गुणा बढीको कागज बनाउने गरेको लगायत गुनासो बोकेर सर्लाहीबाट एक समूह काठमाडौं गई गृहमन्त्री रामबहादुर थापा ‘बादल’ एवं प्रहरीका वरिष्ठ सुरक्षा अधिकारीलाई भेटेपछि यादवलाई गृह मन्त्रालयको ठाडो निर्देशनमा सर्लाही प्रहरीले पक्राउ गरेको हो ।

राष्ट्रिय जनता पार्टी (राजपा) नेपालका केन्द्रीय सदस्य रहेका यादव स्थानीय तह निर्वाचनमा राजपाको तर्फबाट बरहथवा नगरपालिकामा प्रमुखको प्रत्यासी थिए । पीडितहरूको समूहले सर्लाहीकै ब्रम्हपुरी निवासी सञ्जय गुप्ता रौनियारविरुद्धसमेत सोही प्रकारको पीडा दिएको गुनासो गरेका थिए । तर, रौनियार भने भारततर्फ भाग्न सफल भएको सर्लाही प्रहरीले जनाएको छ । रौनियार पनि प्रतिनिधिसभा एवं प्रदेशसभा निर्वाचनअन्तर्गत क्षेत्र नं. २ मा तत्कालीन नयाँ शक्ति पार्टीबाट संघीय सांसदका प्रत्यासी थिए ।

यसअघि सर्लाहीकै मलंगवा निवासी अर्का ‘मिटरब्याजी’ आरोपी श्याम परदेशी भनिने श्यामकृष्ण साह पनि यही आरोपमा पक्राउ परेका थिए । उनी हाल पुर्पक्षमा कारागारमा छन् ।

प्रकाशित मिति: शुक्रबार, माघ २४, २०७६ १८:५७