विद्यालय तहमा ‘स्टिम एजुकेसन’

A+ A A-

विद्यालय तहमा स्टिम एजुकेसन लागू गर्नुपर्नेमा सरोकारवालाहरूले जोड दिएका छन् । डिजिटल पत्रिका शिलापत्रडटकमले शुक्रबार काठमाडौंको कमलादीस्थित युनिग्लोब कलेजमा आयोजना गरेको नेपाल एडु स्टिम कार्यशालामा सरोकारवालाहरूले विद्यालय तहमा स्टिम एजुकेसन लागू गर्नुपर्नेमा जोड दिएका हुन् ।

कार्यक्रममा पूर्वराष्ट्रपति डा. रामवरण यादवले देशको शिक्षा, स्वास्थ्य, कृषि, जंगल, वातवरण, भूगोल र भूबनावटअनुसारको शिक्षा आवश्यक रहेको बताए ।

‘साइन्स एन्ड टेक्नोलोजीबाट विकास गर्ने कि, हाम्रो देशको रिसोर्स बेसमा शिक्षाको विकास गर्ने ? वा नेचरले दिएको रिसोर्सका आधारमा बच्चालाई पढाउने ? यसबारे विद्वानहरूले राज्यसँग छलफल गर्नुपर्छ,’ पूर्वराष्ट्रपति यादवले भने ।

‘८० प्रतिशत बच्चा सामुदायिक विद्यालय र २० प्रतिशत प्राइभेटमा पढ्छन्,’ उनले भने, ‘शिक्षाको सुधारका लागि राज्यले प्रोफेसरहरूसँग छलफल गरेको छ कि छैन ?’

नेपालको रिसोर्समा आधारित भएर साइन्स र टेक्नोलोजीलाई जोडेर विद्यार्थीलाई पढाउनुपर्नेमा उनले जोड दिए ।

कार्यक्रममा नेपाल विज्ञान तथा प्रविधि प्रज्ञा–प्रतिष्ठान (नास्ट)का उपकुलपति सुनीलबाबु श्रेष्ठले जागिर खाने होइन, जागिर खुवाउने शिक्षा आवश्यक रहेको बताए ।

‘जागिर खाने होइन जागिर खुवाउने हो,’ उपकुलपति श्रेष्ठले भने, ‘यसका लागि स्टिम एजुकेसन आवश्यक छ ।’

शिक्षालाई समयसापेक्ष बनाउनुपर्नेमा उनले जोड दिए । ‘सानै उमेरदेखि बालबालिकालाई इनोभेसनमा लगाउनुपर्छ,’ उनले भने, ‘इनोभेसनका लागि नास्टले आवश्यक सहयोग गर्छ ।’

कार्यक्रममा काठमाडौं विश्वविद्यालयका प्रोफेसर बालचन्द्र लुइँटेलले गणित, विज्ञान, टेक्नोलोजीजस्ता विषय सुगारटाइ र धर्मशास्त्र पढाएजसरी पढाइने गरिएको बताए ।

‘साइन्स, म्याथम्याटिक्स, टेक्नोलोजी र इन्जिनियरिङ घोकाउने विषय होइन,’ उनले भने, ‘स्टिम एजुकेसनले विद्यार्थीलाई घोकाउने विधि सिकाउँदैन । अनुसन्धानमा आधारित मानिसको दैनिक जीवनसँग जोडिएको विषय सिकाउँछ ।’

विद्यालय तहदेखि नै स्टिम एजुकेसन आवश्यक रहेकोमा उनले जोड दिए ।

कार्यक्रममा नेपालका लागि फिनल्यान्डका राजदूत प्रिटी एन्टिनानले फिनल्यान्डमा बालबालिकालाई कम्युनिकेसन, क्रिटिकल थिङ्किङ, कोल्याबरेसन र क्रिएटिभिटीमा सक्रिय बनाएर पढाउने गरिएको बताए । स्टिम एजुकेसनका लागि नेपाललाई आवश्यक सहयोग गर्न फिनल्यान्ड तयार रहेको पनि उनले बताए ।

कार्यक्रममा युनिग्लोब कलेजका प्रिन्सिपल डा. करणसिंह ठगुन्नाले स्टिम एजुकेसन आजको विश्वको माग रहेको बताए ।

‘स्टिम एजुकेसन विश्वको माग हो,’ उनले भने, ‘अब नेपालमा शिक्षाको विकासका लागि स्टिमको करिकुलम बनाउनुपर्छ ।’ देशलाई समृद्ध बनाउन पनि स्टिम एजुकेसन आवश्यक रहेको उनको भनाइ थियो ।

कार्यक्रम १९ वटा संघसंस्था र १ सयवटा कलेजको सहभागिता रहेको थियो । युनिग्लोब कलेज, वेद, प्लान इन्टरनेसनल, ओमन इन स्टिम, सीटीएफ, कारखाना, रोबर्टिक एसोसिएसन, लिडरसिप एकेडेमी, नेपाल प्रकृति पाठशाला, स्टिम फाउन्डेसन नेपाल, ड्रो नेपाल, टिच १०१, कुलाब्स, टीएन टिच फर नेपाल, अपार टेक्नोलोजी, मिटिङ प्वाइन्ट र नयाँ पत्रिकाको सहयोगमा आयोजना भएको हो ।

एकदिने नेपाल एडु स्टिम कार्यशालामा १ सयवटा कलेजका विद्यार्थीले बनाएको विज्ञान र प्रविधिका सामग्री प्रदर्शनीमा राखिएका थिए ।