शताब्दी पुरुषको चित्र कोर्दै ४१ देशका बालचित्रकार

A+ A A-

ललितपुरस्थित पाटन संग्रहालयमा ४० देशका बाल चित्रकारहरू शताब्दीपुरुष सत्यमोहन जोशीका चित्र कोर्न भेला भएका छन् ।

सहयात्राले आयोजना गरेको यो चित्रकला प्रर्दशनीको प्रस्तुतकर्ता संस्था योङ्ग पिकासोका अजय देशारका अनुसार प्रदर्शनीमा नेपालका ३० जना र विभिन्न ४० देशका बालकलाकारले जोशीमा केन्द्रित ७० वटा चित्र छन् ।

वाङ्मय शताब्दी पुरुष अन्तर्राष्ट्रिय बालचित्रकला प्रदर्शनी २०२० नाम दिइएको सो प्रदर्शनीमा राखिएका नेपाली चित्रहरू गत १५ माघमा सम्पन्न ‘वाङ्मय शताब्दी पुरुष दोस्राे राष्ट्रिय चित्रकला प्रतियोगिता’ का १३ वर्षसम्म उमेर समूहबाट उत्कृष्ट ३० बालचित्रकारका चित्रहरू समावेश छन् ।

बालचित्रकलामा कार्य गर्ने इटालियन संस्था कलर फर पिसले ४० देशका चित्रहरूको संयोजन गरेको हो । प्रदर्शनीमा अबुधावी, अल्वानिया, अर्जेन्टिजा, ब्राजिल, क्यानडा, केप भर्डे, चाइना, क्रोसिया, इक्वेडर, इष्टोनिया, मिक्रोनेसिया, फ्रान्स, जर्मनी, ग्वाटेमाला, भारत, इरान, इटाली, काजकिस्तान, लिभानो, लिभिया, लग्जेम्बर्ग, मेसेडोनिया, मेक्सिको, मंगोलिया, मोरक्को, पेसेबासी, पलाउ, पानामा, पेरू, पोलोनिया, सेन्ट्रल अफ अफ्रिकाना, चेक रिपब्लिक, मोल्डोभा, रोमानिया, रसिया, सिरिया, टोङ्गा, उरूग्वे, संयुक्त राज्य अमेरिका र भानुआतुका छन् ।

प्रदर्शनीको उद्घाटन गर्दै बागमती प्रदेशका सांसद राजकाजी महर्जनले प्रदेश सरकारले कलालाई विशेष ध्यान दिएको बताए । प्रदेश सरकारबाट निकट भविष्यमा कला र संस्कृतिसँग सम्बन्धित विभिन्न कार्यक्रमहरू संचालन गर्ने तयारी भइरहेको उनको भनाइ छ ।

उद्योग वाणिज्य संघ ललितपुरका पूर्वअध्यक्ष अजरमान जोशीले शताब्दी पुरुषको सम्मानमा यस वर्ष करिब दुई दर्जन कार्यक्रम आयोजना गरिएको बताए । योङ्ग पिकासोका सल्लाहकार शाक्य सुरेनले विश्वलाई हेरेर नेपालमा धेरै कार्यक्रम गर्न सकिने बताए । योङ्ग पिकासोका निर्देशक अजय देशारले कलर फर पिसको सहकार्यले नेपालमा पहिलो पटक अन्तर्राष्ट्रिय बालचित्रकारका चित्रहरूलाई प्रदर्शनी गर्न सफल रहेको बताए ।

वाङ्मय शताब्दी पुरुषका कोरिएका प्रत्यक्ष चित्रहरूमध्ये उत्कृष्ट ३५ चित्रहरूलाई पाटन संग्रहालयको समन्वयमा डा. जोशीको जन्मोत्सवको अवसर पारेर आगामी वैशाखमा प्रदर्शनीमा राखिने सहयात्राका अध्यक्ष तथा कार्यक्रम संयोजक बालमुकुन्द आचार्यले जानकारी दिए । प्रदर्शनी आगामी २९ माघसम्म पाटन संग्रहालयमा चल्नेछ ।

प्रकाशित मिति: शुक्रबार, माघ २४, २०७६ १६:१५