नहरको पुल जीर्ण बन्दा हजारौँ किसान सिँचाइ सुविधाबाट वञ्चित

A+ A A-

विराटनगरसँग जोडिएको कटहरी गाउँपालिका–६ स्थित थलाहा नहरमा रहेको जुडी पुल जीर्ण भएको लामो समय भयो । पुलको सुनसरी–मोरङ सिँचाइ आयोजनामा सरुवा भएर आउने हरेक प्रमुखले अनुगमन नगरेको पनि होइन । सरोकारवाला निकायले ध्यान नदिँदा पुल झनझन जीर्ण बन्दै गएको छ । थलाहा नहरमा रहेको सो जुडी पुल करिब ९० वर्ष पुरानो हो ।

स्थानीय जनसहभागिता र सुनसरी–मोरङ सिँचाइ आयोजनाको लगानीमा निर्माण भएको पुल जीर्ण भएको वर्षौं भइसकेको छ ।

नहरबाट किसानले ६ हजार ७० हेक्टर जमिनमा पानी प्रयोग गरिहेका छन् । जुडी पुलको मुनिबाट नहर निकालिएको छ । यदि यो जीर्ण हुँदै गएको पुल मर्मत नगरे कुनै पनि बेला भत्किन सक्ने खतरा देखिएको छ ।

पुल भत्किँदा जहदा गाउँपालिकास्थित महादेवकोलका हजारौँ उपभोक्ता किसानहरू खेतमा सिँचाइ गर्नबाट वञ्चित हुने स्थानीय सुरज सरदारले बताए ।

‘पुल धेरै पुरानो हो । यही पुलबाटै नहरको पानी जाने गर्छ । भत्किन लागे पनि अहिलेसम्म सरकारको ध्यान गएको छैन,’ उनले भने, ‘तत्काल मर्मत नगरिए ओहोरदोहाेरमा समस्या त हुने नै छ । त्योभन्दा बढी पुल भत्किएपछि नहरको पानी पास नहुने भएकाले हजारौँ कृषक सिँचाइबाट वञ्चित हुनेछ ।’

नहरसमेत प्रयोग भएको जुडी पुलबाट थलाहा, हुरहुरिया, केसोरिया, तकिया, मोतीपुर गाउँलगायतका हजारौँ विराटनगर आवतजावतसमेत गर्छन् । त्यति मात्र नभएर हजारौँ किसानले सिँचाइ सुविधा पाउँदै आएका थिए ।

पुलको तल्लो भाग भत्किँदा पानी नहरमा नगई जुडी खोलामा झर्ने गरेको छ । खोलामा पानी झरेका कारणले लौहन्द्रा घाटदेखि दक्षिणी क्षेत्रका कृषकहरू यतिबेला नहरको सिँचाइ गर्नबाट वञ्चित भएका छन् । जुडी पुलदेखि करिब १ किलोमिटरको दूरीमा रहेको लोहन्द्रा पुल पनि जीर्ण बनेको छ ।

पुलको मुनिबाट पनि सिँचाइ गर्नका लागि आयोजनाले नहर निकालेकोे छ । हुलाकी राजमार्गमा पर्ने लोहन्दा पुल पनि जीर्ण बनेको धेरै समय भयो । खोलामका आउने वर्षेनी बाढीले समेत सो पुल कमजोर बनेको छ । व्यस्त सडकअन्तर्गत पर्ने सो पुलसमेत मर्मत तथा पुनर्निर्माण नगरेकाले कुनै पनि बेला ठूलो दुर्घटना हुन सक्ने स्थानीय दशरथ साहले बताए ।

पुलको मर्मत नगर्दा वर्षायाममा अझ बढी समस्या हुने गरेको उनले बताए । सुनसरी–मोरङ सिँचाइ आयोजना महादेवकोल मोरङका अध्यक्ष सुजित चौधरीले जीर्ण दुवै पुलको मर्मत र पुनःनिर्माणका लागि पटक–पटक पहल गरिए पनि कुनै सुनुवाइ नभएको उनले गुनासो गरे ।

‘मर्मत गर्न धेरै ठूलो रकम खर्च हुने देखिएको छ । स्थानीय सरकारबाट यो सम्भव छैन,’ उनले भने, ‘केन्द्र सरकारले यसका लागि ठोस पहल गरोस् । हामीले पनि घच्घच्याउने काम गरिरहेका छौँ ।’

प्रकाशित मिति: शुक्रबार, माघ २४, २०७६ १२:१५