‘साना कृषि मोडेल फार्म स्थापना’ का लागि ३९ फार्म छनोट

A+ A A-

कृषि ज्ञान केन्द्र लमजुङले ‘साना कृषि मोडेल फार्म स्थापना’ सहयोग कार्यक्रमअन्तर्गत अनुदानका लागि ३९ वटा फार्म छनोट गरेको छ ।

लमजुङबाट १ सय १० र मनाङबाट १ गरी कुल १ सय ११ वटा आवेदन परेकोमा तीमध्ये मनाङको १ सहित ३९ फार्म छनोट गरिएको कृषि ज्ञान केन्द्र लमजुङका कार्यालय प्रमुख रोहणीराज घिमिरेले बताए ।

छनोट मूल्याङ्कन समितिले किसानको घरदैलोमै पुगेर स्थलगत अध्ययन र अनुगमन गरेपछि प्रस्तुत गरेको प्रतिवेदनका आधारमा ती फार्म छनोट गरिएको उनले बताए । केन्द्रले अनुदानका लागि गएको २० साउनमा ३५ दिने सूचना प्रकाशित गरेको थियो ।

लमजुङको ८ स्थानीय तहमध्ये सुन्दरबजार नगरपालिकाका– ७, राइनास नगरपालिकाका ६, मध्यनेपाल नगरपालिकाका ६, दूधपोखरी गाउँपालिका ३, दोर्दी गाउँपालिका २, क्ब्होलासोथर गाउँपालिका– ३ र मर्स्याङ्दी गाउँपालिकाका ४ गरी ३८ तथा मनाङको नासो गाउँपालिकाका– १ गरी कुल ३९ फार्म छनोट भएको केन्द्रले जनाएको छ ।

मनाङमा तुलनात्मक रूपमा कृषि सहकारीका साथै सक्रिय कृषक समूहको कमी, फार्म दर्ता गरी कृृषि कर्म गर्ने किसानको सङ्ख्या कम भएको र आवेदन एउटा आएकोमा एउटा छनोट गरिएको कृषि ज्ञान केन्द्र, लमजुङका कृषि अर्थविज्ञ मदन रेग्मीले बताए ।

‘साना कृृषि मोडेल फार्म स्थापना’का लागि भूमि व्यवस्था, कृषि तथा सहकारी मन्त्रालय, गण्डकी प्रदेशबाट चालू आर्थिक वर्षमा यस केन्द्रलाई २ करोड रुपैयाँ आएको केन्द्रले जनाएको छ ।

ती छनोट भएका फार्मले कम्तीमा २ लाख ५० हजार रुपैयाँदेखि ३ लाख रुपैयाँसम्म सहयोग प्राप्त गर्ने छन् ।

‘साना कृृषि मोडेल फार्म स्थापना’का लागि भूमि व्यवस्था, कृषि तथा सहकारी मन्त्रालय, गण्डकी प्रदेशबाट गएको वर्ष केन्द्रलाई ७० लाख रुपैयाँ प्राप्त भएको थियो । रासस

प्रकाशित मिति: शुक्रबार, माघ २४, २०७६ १२:४२