चेम्बरले भन्यो: सबै क्षेत्रमा विदेशी लगानी खुल्ला गर्नुहुन्न

A+ A A-

नेपाल चेम्बर अफ कमर्शले संघीय संसदमा विचाराधिन रहेको ‘बिदेशी लगानी तथा प्रबिधि हस्तान्तरण सम्बन्धि कानुनलाई संसोधन र एकीकरण गर्न बनेको बिधेयक २०७५’ का केही प्रावधानबारे आपत्ति जनाएको छ ।

नेपालको आन्तरिक पुँजी परिचालन गरेर नै गर्न सकिने काममा पनि विदेशी लगानी खुल्ला गरिएकोप्रति चेम्बरले आपत्ति जनाएको हो । राष्ट्रको समग्र विकासको लागि विदेशी लगानी आवश्यक भएपनि नेपालीहरु नै सक्षम रहेको क्षेत्रमा विदेशी लगानी भित्र्याउन नहुने चेम्बरको भनाइ छ ।

‘राष्ट्रको समग्र बिकासको लागि वैदेशिक लगानी अपरिहार्य भए तापनि आन्तरिक पुँजी परिचालन गरी स्वदेशी शीपको जगेर्ना, प्रयोग र विकाससँग सम्बन्धित कतिपय क्षेत्रहरुमा नेपालीहरु नै सक्षम रहेकोले सबै क्षेत्रमा बैदेशिक लगानी खुल्ला गर्न आवश्यक देखिदैन,’ चेम्बरले विज्ञप्ति जारी गर्दै भनेको छ ।

आन्तरिक पुँजीले सम्भव नहुने उच्च प्रबिधियुक्त ठूला परियोजना र ‘मेगा–इन्डस्ट्री’मा विदेशी लगानी उपयुक्त हुने चेम्बरले उल्लेख गरेको छ । स्वदेशी ज्ञान, शीप र प्रबिधिको परिचालन गर्न सकिने क्षेत्रहरुमा विदेशी लगानी आवश्यक नहुने चेम्बरको भनाइ छ ।

चेम्बरले लघु उद्योग र घरेलु उद्योग अन्तर्गत कृषिका प्राथमिक उत्पादनका क्षेत्रहरु, पशु पालन, कुखुरा पालन, मत्स्य पालन, मौरी पालन, दुग्ध प्रशोधन, कार्गो सेवा एवम् शैक्षिक परामर्श जस्ता अति महत्वपूर्ण व्यवसायहरुमा विदेशी लगानी भित्र्याउँदा त्यसबाट राष्ट्रलाई फाइदाभन्दा पनि बेफाइदा नै हुन सक्ने चेम्बरको भनाइ छ । सरकारले अहिले संसदमा पेश गरेको विधेयकमा यस्ता क्षेत्रमा पनि विदेशी लगानी भित्र्याउने उल्लेख छ ।

यस्ता क्षेत्रमा विदेशी लगानी भित्र्याउँदा ती क्षेत्रहरुमा क्रियाशील स्वदेशी जनशक्तिमा निराशा पैदा भएर पुँजी निस्क्रिय हुने सम्भावना रहने चेम्बरको धारणा छ । यस्तो अबस्थामा जनशक्ति विस्थापन र पलायन हुनुका साथै स्वदेशी उद्यमशीलतामा ह्रास आउने भन्दै चेम्बरले स्वदेशी शीप, प्रविधि, जनशक्ति र पुँजी परिचालन गर्न सकिने क्षेत्रहरुमा विदेशी लगानीलाई प्रबद्र्धन नगर्न चेम्बरले सम्बन्धित सबै पक्षको ध्यानाकर्षण पनि गराएको छ ।

प्रकाशित मिति: बुधबार, फागुन २९, २०७५ ०१:५६