साउथवेस्टर्न स्टेट कलेजमा विज्ञान प्रदर्शनी

A+ A A-

उपप्रधान तथा रक्षामन्त्री ईश्वर पोखरेलले ‘समृद्ध नेपाल सुखी नेपाली’ बनाउनका लागि देशले परम्परागत शिक्षा पद्धतिलाई समयानुकूल परिवर्तन र परिमार्जन गरी रोजगारमूलक, श्रम र सीपयुक्त, स्वरोजगारी सिर्जना गर्ने तथा व्यवस्थापनमूलक शिक्षा नीतितर्फ राज्यले जोडदिएको बताएका छन् ।

साउथवेस्टर्न स्टेट कलेज वसुन्धरा काठमाडौंद्वारा आयोजित दशाैं साउथवेस्टर्न विज्ञान प्रदर्शनी तथा करियर इन म्यानेजमेन्ट कार्यक्रमको उद्घाटन गर्दै मन्त्री पोखरेलले पोख्रेलले सरकार बदलिरहन सक्ने तर देश बदल्नका लागि वर्तमान शिक्षा पर्याप्त नभएकाले कुशल व्यवस्थापनयुक्त, विश्वपरिवेश सुहाउँदो शिक्षाको आवश्यकता रहेको बताए ।

उनले यस्ता प्रदर्शनी तथा प्रयोगात्मक अभ्यासले विद्यार्थी र मुलुकमा विज्ञानको विकास र विस्तारप्रति गम्भीर ध्यानाकर्षण गर्नेछ भन्दै उनले नेपालले अब विकासका लागि आवश्यक दक्ष जनशक्ति उत्पादन गर्ने प्रकारका शिक्षा प्रदान गर्नुपर्नेमा जोड दिए ।

विज्ञान तथा प्रविधि प्रज्ञा प्रतिष्ठानका उपकुलपति डा.सुनीलबाबु श्रेष्ठले विज्ञान तथा प्रविधिको विकास र विस्तार गरी मुलुकलाई समृद्ध बनाउन सकिने बताए ।

विज्ञान प्रदर्शनीका विशेष अतिथि उपकुलपति श्रेष्ठले लामो समयको अन्तरालमा विज्ञान र प्रविधि क्षेत्रले नयाँ नीति प्राप्त गरेकाले यस नीतिअनुसार नास्टले विभिन्न कार्यक्रम अगाडि बढाएको र अव छिट्टै यसले देशविकासमा महत्त्वपूर्ण टेवा पुग्ने बताए ।

अमेरिकन दुतावासका प्रवक्ता आन्द्रिया डि आरमेन्टले नेपालको शिक्षा विकासमा सहयोग गर्न अमेरिकन दूतावास सधैं तयार रहेको धारणा व्यक्त गरे । नेपालमा विज्ञान र प्रविधि शिक्षामा महिला पनि उत्तिकै लागेकोमा आफूलाई खुसी लागेको विचार राखे ।

कार्यक्रममा क्याम्पस प्रमुख डा.राजेन्द्र के.सीले साउथवेस्टर्न स्टेट कलेजले हरेक वर्ष शैक्षिक पर्वका रूपमा यस विज्ञान प्रदर्शनीलाई लिएको बताउँदै विज्ञान तथा प्रविधिको विकासमा क्याम्पसले गरेको प्रयासमा निजी क्षेत्रका साथै सरकारले पनि यथेष्ट सहयोग गर्नुपर्ने विचार व्यक्त गरे ।

उनले विद्यार्थीको नवीनतम आविष्कारलाई सहयोग पुर्‍याउने उद्देश्यले प्रदर्शनी आयोजना गरिएको जानकारी दिए ।

विज्ञान तथा प्रविधिको क्षेत्रमा फड्को नमारेसम्म मुलुकले प्रगति गर्न नसक्ने भएकाले सरकारले यसलाई प्राथमिकतामा राख्नुपर्नेमा पनि जोड दिए । देशभित्र स्तरीय विज्ञान प्रविधिमूलक शैक्षिक वातावरण तयार नभएकाले प्रत्येक वर्ष हजारौँ विद्यार्थीहरू र करोडौँ रुपियाँ विदेशिइरहेकाले यसलाई रोक्न सीपमूलक, स्वरोजगारमूलक शिक्षामा जोड दिनुपर्ने बताए ।

टोखा नगरपालिका शिक्षा शाखा प्रमुख बाबुराम गौतमले विद्यार्थीलाई विश्वव्यापीरूपमा प्रतिस्पर्धा गर्नसक्ने बनाउनु नै आफूहरूको लक्ष्य भएको भन्दै नर्सरीदेखि पीएचडीसम्मको पठनपाठनलाई एउटै स्थानबाट उपलब्ध गराएर साउथवेस्टर्न स्टेट कलेजले शैक्षिक संस्था परिवर्तन गरिरहनुपर्ने झन्झटबाट विद्यार्थीलाई मुक्ति दिएको र विश्वविद्यालयको पूर्वाधार निर्माणमा कलेज अगाडि बढेको जानकारी दिए ।

कलेजका अन्तर्राष्ट्रिय सम्बन्ध प्रमुख एवम् विज्ञान प्रदर्शनी कार्यक्रम संयोजक सरिता शाक्य प्रधानले साउवेस्टर्न कलेजको स्थापनाकालदेखि नै विज्ञान प्रदर्शनी गर्दै आएको र यो दशाैं शृङ्खला रहेको बताइन् ।
विभिन्न कलेजका युवा वैज्ञानिकहरूलाई एकै स्थानमा जमघट गराएर आपसी प्रतिस्पर्धाको वातावरण तयार गर्नु र उनीहरूको सीप र जाँगरलाई अरुसमक्ष प्रदर्शन गराउनु यो कार्यक्रमको मुख्य उद्देश्य रहेको कुरा उनले बताइन् ।

गणुस्तरीय, मूल्यमान्यता तथा आवश्यकताअनुरूपका शिक्षा अनुसन्धानका आधारमा उपलब्ध गराउनु कलेजको उद्देश्य भएको उल्लेख गर्दै यसैका लागि प्रदर्शनी आयोजना गरिएको बताइन् ।

ड्रोनबाट पुष्पगुच्छा वृष्टि गरी उद्घाटन गरिएको सो कार्यक्रममा साउथवेस्टर्न स्टेट कलेजका विद्यार्थीहरूले अन्तर्राष्ट्रिय प्रतिस्पर्धामा पदक प्राप्त गर्ने स्वराज सागर प्रधान, अनिष लामिछाने र सब्बा रानी महर्जनलाई कलेजका तर्फबाट कदरपत्र प्रदान गरिएको थियो ।

दुई दिन चल्ने सो प्रदर्शनीमा राजधानीका विभिन्न विद्यालय तथा कलेजमा अध्ययन गर्ने झण्डै ३० हजार विद्यार्थीले अवलोकन गर्ने लक्ष्य राखिएको छ ।

प्रदर्शनीमा साउथवेस्टर्न स्टेट कलेज, गोल्डनगेट कलेज, ट्रिनिटी कलेजलगायत विभिन्न स्कुल तथा कलेजहरूको सहभागिता छ ।

यस कार्यक्रममा ऊर्जाशील, युवा वैज्ञानिकहरूको प्रतिभाको प्रदर्शन गरिएको छ । हेलिकोप्टर, स्थानीय साम्रगीबाट ब्रिकेट उत्पादन, हाइडोलिक क्रेन, भोटिङ मेसिन, सोलारप्लान्ट, इकोसिस्टमलगायतका स्थानीय साम्रगीबाट निर्मित, प्रविधिमैत्री प्रदर्शनीका प्रमुख आकर्षकका केन्द्र रहेका छन् ।

बिहीबारदेखि सुरू भएको दुईदिने सो प्रदर्शनी वसुन्धरास्थित साउथवेस्टर्न स्टेट कलेज परिसरमा आयोजना गरिएको छ । प्रदर्शनीमा अमेरिकन राजदूतावास, विभिन्न कजेल विद्यालय तथा संघसंस्थाका ६० भन्दा बढी स्टल रहेका छन् ।

प्रकाशित मिति: बिहीबार, माघ २३, २०७६ १७:५७